Read Bibliya Yera 1951 Yeremiya 50 Bible Online

Yeremiya 50 - Bibliya Yera 1951 bible

Yeremiya 50

¹Ijambo Uhoraho yavuze ku vy’i Babuloni, no ku vy’igihugu c’Abakaludaya, arivugishije Yeremiya.

²Mubitāngāze mu mahanga, muvyamamaze, mushinge ibendera; muvyamamaze, ntimubihishe, mut’ I Babuloni haratsinzwe, ikigirwamana Beli kiratēterewe, Merodaki kiravunaguritse; ibishushanyo vyaho biratēterewe, ibigirwamana vyaho biravunaguritse.

³Kukw i burārūko hazoturuka ihanga rije kuhatera, rizohindura igihugu caho amatongo, kandi nta wuzoba akihaba; abantu bo n’ibitungwa bizohunga bigende.

⁴Kuko mur’ iyo misi no mur’ ico gihe, ni k’Uhoraho agize, Abisirayeli bazoza, bazananye n’ Abayuda; bazogenda barira ingenda, barondera Uhoraho Imana yabo.

⁵Bazobaza ivy’ i Siyoni bahērekeje amaso, bat’ Enda ni muze mwifatanye n’Uhoraho musezerane isezerano ritazoshira ritazokwibagirana.

⁶Abantu banje bābaye intama zizimiye; abungere babo bārabajimije, bābahubirije ku misozi: bāva ku musozi baja ku wundi, bibagiye uburuhukiro bgabo.

⁷Abābabonye bose bāgiye babatsontsomera; abarwanizi babo bāvuze, bati Nta caha dukoze, kuko bācumuye k’Uhoraho, ari we i wabo w’ubugororotsi, k’Uhoraho, ari we vyizigiro vya ba sekuruza.

⁸Muhunge muve hagati y’i Babuloni, muve mu gihugu c’ Abakaludaya, mube ba kizigenza nk’impfizi z’impene mu mukuku.

⁹Kuko rāba, nzoyagamvya ikoraniro ry’amahanga ahambaye aturutse i burārūko, ngw adūge atere i Babuloni: kandi bazotonda urugamba kuharwanya; bazohatsinda bahereye kur’ urwo ruhande: imyampi yabo izoba nk’iy’ umuhizi w’umuhanga: nta wuzogwa hasi.

¹⁰I Bukaludaya hazohinduka isahu: abahasahura bose bazohāga, ni jewe Uhoraho mbivuze.

¹¹Kuko vyabanezereye, bikabahimbara, mwebge abanyaga ishamvu yanje; kuko mwikirigita nk’inka y’iriza yo mu magarama, mukaroherana nk’amafarasi y’inkomezi;

¹²nuko rero nyoko azogira ibitētērwa vyinshi, uwabavyaye azomāramāra: rāba, azosigara ar’ uw’ inyuma y’ayandi mahanga, abe ubugaragwa, igihugu kigadutse, n’ubgeranyange.

¹³Kubg’ uburake bg’ Uhoraho ntihazosubira kugerērwa, ariko hazohebga rwose: umuntu wese azohita kuri Babuloni azojorerwa, azovuza agahwa kubg’ ivyago vyaho vyose.

¹⁴Mwebge mwese abarashi, mutondere urugamba Babuloni irya n’ino; muharase, ntimuzigurize imyampi: kuko hācumuye k’Uhoraho.

¹⁵Muhīrahire mur’ irya n’ino; hazokoma amashi, ibihome bihakingiye bizotemba, inzitiro zaho zisangangurwe: kukw ar’ uguhōra kw’ Uhoraho; namwe muhīhōre; nk’ uko hakoze abe ari ko muhasubiriza mu nkōko.

¹⁶Murandure i Babuloni umubivyi, bo n’ūtemesha umuhoro mu gihe c’iyimbura. Kubgo gutinya inkota iririka, bazohunga, umuntu wese asubire mu bgoko bgabo, umuntu wese asubire mu gihugu cabo.

¹⁷Abisirayeli n’intama zisābagiye; intambge zarabasanzaje: umwami w’i Ashuri ni we yabanje kubarotsa, ubuheruka Nebukadineza uyo, umwami w’i Babuloni, yabajanjaguye amagufa.

¹⁸Nuko rero, uku ni k’Uhoraho Nyen’ ingabo agize, ni we Mana y’Abisirayeli, ati Rāba nzohana umwami w’i Babuloni n’igihugu ciwe, nk’uko nahannye umwami w’i Ashuri.

¹⁹Kandi nzogarukana Abisirayeli mu canya cabo, na bo bazorīsha i Karumeli n’i Bashani, bafore amabondo bari ku misozi y’i Efurayimu n’i Gileyadi.

²⁰Mur’ iyo misi no mur’ ico gihe, ni jewe Uhoraho mbivuze, ibigabitanyo vy’Abisirayeli bizoronderwa, bibure; n’ivyaha vy’Abayuda na vyo ntibizoboneka: kuko nzoharira abo nashigaje kuba amasigarira.

²¹Dūga utere igihugu c’i Meratayimu, uhatere, utere n’ababa i Pekodi: ubakurikirane, ubice, ubatotore rwose, ni jewe Uhoraho mbivuze, ubagirire nk’ivyo nkubariye vyose.

²²Akarūru k’ intambara kari mu gihugu, bo n’ ak’ ukugeseza gukomeye.

²³Ewe kuntu ya nyundo yar’ igeramiye isi yose ivunitse, imenaguritse! Ewe kuntu i Babuloni hahindutse ibitongozi hagati mu mahanga!

²⁴Naguteze umutego, nawe uca urafatwa ata co winona, ewe Babuloni: wararushe uraboneka, utak’ urafatwa, kuko warwanije Uhoraho.

²⁵Uhoraho yuguruye ububīko bg’ibirwanishwa vyiwe, asohoye ibirwanishwa vy’ubushangashirwe bgiwe: kuk’ Umwami, ari we Uhoraho Nyen’ ingabo, afise igikorwa co gukora mu gihugu c’ Abakaludaya.

²⁶Ni muze muhatere, muturutse impande zose, mwugurure ibigega vyaho: muhace nk’ibirundo vy’amasakamburira, muhatotore rwose, ntihagire ikihasigara.

²⁷Ni mwice amakombe yaho yose; n’amanuke aje kubāgwa. Babonye ibara! Kuk’ umusi wabo washitse, ni wo gihe co kūzirwa kwabo.

²⁸Ni mwumve ingene bahunga, bacika bava mu gihugu c’i Babuloni, ngo bamamaze i Siyoni uguhōra kw’Uhoraho Imana yacu, uguhōra yahōye urusengero rwiwe!

²⁹Ni muhamagare abarashi bakoranire kurwanya Babuloni, abazi gufora imiheto bose; musagaze hirya no hino yaho; ntihagire uwaho acika: muhīhōre ibikwiranye n’ibikorwa vyaho, muhasubirize mu nkōko ibikwiranye n’ivyo hākoze; kuko hinantaje k’Uhoraho, k’Uwera w’ Abisirayeli.

³⁰Ni co gitumye imisore yaho izohindikirana mu nzira zaho, n’abahizi bose bazozibizwa kur’ uwo musi, ni k’Uhoraho agize.

³¹Ehe tuzohigūra twe nawe, wa munyabgibone we, ni jewe Umwami Uhoraho Nyen’ ingabo mbivuze; kuk’ umusi wawe ushitse, ni wo gihe nkūziye.

³²Umunyabgibone azotsitara atembe, ntihagire ūmuvyutsa: kandi nzokwanda umuriro ibisagara vyiwe, uzotongora abamukikije bose.

³³Uku ni k’Uhoraho Nyen’ ingabo agize, at’ Abisirayeli n’Abayuda bāhaharijwe hamwe; ababajanye kw inyagano bārabagumije, banse kubarekura.

³⁴Arik’ Umucunguzi wabo arakomeye: Uhoraho Nyen’ ingabo ni ryo zina ryiwe; azobītsa mu manza zabo, kugira ngw ahe isi kuruhuka, arikw atere ababa i Babuloni imitima ihagaze.

³⁵Inkota iri ku Bakaludaya, ni k’Uhoraho agize, no ku baba i Babuloni, no ku baganwa baho, no ku banyabgenge baho.

³⁶Inkota iri ku birata, kandi bazoyinga; inkota iri ku bahizi baho, kandi bazoranduka imitima.

³⁷Inkota iri ku mafarasi yabo, no ku mikogote yabo, no ku b’ikivange c’amoko bari hagati muri ho, kandi bazohinduka nk’ abagore; inkota iri ku butunzi bgaho, kandi bazobunyagwa.

³⁸Ikigatwa kizoba ku mazi yaho, kand’ azogaduka; kukw ar’ igihugu c’ibishushanyo bibājwe, bāciwe ntema n’ibigirwamana.

³⁹Ni co kizotuma ibikōko vyo mu bugaragwa bizobanayo n’amabingira, n’ibisīga vyitwa imbuni na vyo bizohaba: ntihazosubira kugerērwa gushitsa ibihe vyose, kandi nta wuzoba akihaba uk’ urunganwe rwabo ruzogenda rukurikirana.

⁴⁰Nk’uko vyabaye hamwe Imana yakomvomvora i Sodomu n’i Gomora, bo n’ibisagara bihereranye na ho, ni kw ata muntu azobayo, canke ngo hagire umwana w’umuntu azoba akihaba, ni k’Uhoraho agize.

⁴¹Eh’ ubgoko buraje buvuye i burārūko; ihanga rikomeye n’ abami benshi bazovyutswa bave ku mpera y’isi.

⁴²Bābiriye imiheto n’amacumu; ni ba ruburakigongwe, nta mbabazi bagira; ijwi ryabo ribomborana nk’ikiyaga, kandi bagendera ku mafarasi; bāzira mu rugamba icarimwe, nk’ umuntu umwe, kugira ngo bagutere, ewe mukobga Babuloni.

⁴³Umwami w’i Babuloni yumvise inkuru zavyo, amaboko yiwe arareganuka: uburibge buramufashe, nk’ibise vy’umugore aramutswe.

⁴⁴Eh’ azodūga nk’intambge ivuye kuri Yorodani iyo rwigize akagabo, ngw atere ahantu h’itsitsi hakomeye: ariko nzotuma bahunga bahave giturumbuka, kand’ uwo nzotoranya ni we nzoshinga ngw ahaganze: none ni nde ahwanye nanje? Kandi ni nde azonshingira igihe? Kandi ni nde mwungere yohangara guhagarara imbere yanje?

⁴⁵Nuko rero ni mwumve inama Uhoraho yarunduye kuri Babuloni, n’imigabo yagabiye y’ ivyo azogirira igihugu c’Abakaludaya: ati N’ukuri bazobakwega nk’imyagazi yo mu mukuku; n’ ukuri azobagesezanya n’aho baba.

⁴⁶Isi ihindishwa agashitsi no kwumva gutsindwa kw’i Babuloni: amarūru yaho yumvikana mu mahanga.