Read Bibliya Yera 1951 GUCURA INTIMBA 1 Bible Online

GUCURA INTIMBA 1 - Bibliya Yera 1951 bible

GUCURA INTIMBA 1

¹Ewe kuntu igisagara cari cuzuye abantu gisigaye cicaye ubusa! Ukuntu cahindutse nk’umupfakazi! Icar’ agakomeye mu mahanga, kikaba umwamikazi mu ntāra, Ukuntu gisigaye gishikanira abandi!

²Kirāra kirarira mw ijoro, amosozi agacunduguta ku matama; Mu bakunzi baho bose ntihafise uwo kuhirura: Abagenzi baho bose bāraharyarutse, Bahindutse abansi baho.

³Abayuda bajanywe ar’ inyagano, bitewe n’agahahazo no kuja mu buja bukomeye; Baba mu banyamahanga, ntibahabona uburuhukiro: Ababadendereza bose bābahambirije ahantu h’inkōnywa.

⁴Inzira z’i Siyoni ziraboroga, kukw ata wukiruha aza mu misi mikuru yashinzwe; Amarembo yaho yose arasivye, abaherezi baho baraniha: Inkumi zaho zifise umubabaro, na ho ubgaho hari n’ intuntu.

⁵Abarwanizi baho bahagiye hejuru, abansi baho bararoraniwe; Kuk’ Uhoraho yahababaje ahahōye ibicumuro vyaho vy’isinzi: Abana baho bashorewe ar’ inyagano imbere y’abarwanizi.

⁶Icubahiro cose c’umukobga ari we Siyoni camuvuyeko: Abaganwa baho bahindutse nk’impongo zibuze ubgatsi, Bānyavūse batagifise intege imbere y’ababirukana.

⁷Mu gihe c’umubabaro waho n’ivyago, Yerusalemu hibutse Ibihimbaro vyaho vyose hāhoranye uhereye kuva kera. Hamwe abantu baho bākorokeye mu maboko y’umurwanizi, ntihabone ūhatabara, Abarwanizi bārahabona, bakahatwengera mw ijigo ko habaye imisaka.

⁸Yerusalemu hakoze ivyaha birengereje; ni co catumye hahinduka nk’ikintu giteye iseseme: Abāhora bahubaha bose basigaye bahakēngēra, kuko babonye ubgambure bgaho: N’ukuri haraniha, hakarora irya.

⁹Ibiteye isoni vyaho vyashitse no ku myambaro yaho; ntihāri hārībajije ivy’ amaherezo yaho; Ni co catumye hacishwa bugufi bitangaje; ntihagira ūhahūmuriza. Uhoraho we, itegereze umubabaro wanje; kuk’ umwansi yishize hejuru.

¹⁰Umurwanizi yashingirije ukuboko kwiwe ibintu vyaho vyose bihimbara: Kandi hitegereje ingen’ abanyamahanga binjiye ahantu haho hēra, Abo wari warahakaniye ko badakwiye kwinjira mw ikoraniro ryawe.

¹¹Abantu baho bose baraniha, bayerera utwo kurya; Ibintu vyabo vyābahimbara bābitanze ku two kurya ngo basame amagara yabo: Uhoraho we, rāba witegereze: nahindutse ikigawa.

¹²Yemwe mwese abīhitira, mbega nta co murushe muvyibazako? Enda ni mwitegereze, murābe ko hoba umubabaro uhwanye n’uyu wanje wanshitseko, Uwo Uhoraho yambabarishije ku musi w’uburake bgiwe bg’inkazi.

¹³Yarungitse umuriro mu magufa yanje uvuye iyo hejuru, urayayigiza: Yateze ibirenge vyanje umutego, ansubiza inyuma; Yangize inkōkōre, anca intege umusi urīra.

¹⁴Ukuboko kwiwe kwamboheyekw ingōgo y’ibicumuro vyanje; Vyarasobekeranye, binshika mw izosi; yacobogoje inkomezi zanje: Umwami Imana yangabuye mu maboko y’abo ntashoboye kurindana na bo.

¹⁵Umwami Imana yatītūye abahizi banje bose bāba i wanje; Yarungitse abaza kungirirak’ umusi mukuru ngo bafyonyagure imisore yanje: Umwami Imana yahonyanze umukobga w’inkumi w’i Buyuda, nk’ūganira vino mu bgato.

¹⁶Ivyo ni vyo bindiza; amaso yanje, amaso yanje yisuka amosozi; Kuk’ uwompūmurije akandemesha umutima ambaye kure: Abana banje barapfapfanye, kuk’ umwansi yanyigamvye.

¹⁷Siyoni hata amaboko, ntihabona uwohahūmuriza; Uhoraho yashinze ivya Yakobo, kw abamukikije bose bamubera abarwanizi: Yerusalemu habamereye nk’ ikintu giteye iseseme hagati muri bo.

¹⁸Uhoraho aragororotse, ariko jeho nagararije ivyagezwe vyiwe: Ni mwumve ndabinginze, mwebge mwa mahanga yose, mwitegereze umubabaro wanje: Abakobga banje n’abahungu banje bagiye ar’ inyagano.

¹⁹Natabaje abūzure banje, ariko barampemukira: Abaherezi banje n’abashingantahe banje bahwerereye mu gisagara, Bakiriko barayerera utwo kurya two gusama amagara yabo.

²⁰Uhoraho we, ni witegereze, kuko ndi mu magorwa; amara yanje aradobangana; Umutima wanje urandida mu nda; kuko nagararije birengereje: Hanze inkota iraririka, no mu nzu na ho har’ urupfu.

²¹Ni wumve ingene nniha; nta wo kumpūmuriza ngira; Abansi banje bose bumvise ivyago mbonye; baranezerwa kukw ari wewe wabikoze: Uzotuma umusi washinze ushika, na bo bamere nkanje.

²²Ububi bgabo bgose ni bushike imbere yawe; Ubagirire nk’uko wangiriye umpōra ibicumuro vyanje vyose: Kuko kuniha kwanje ari kwinshi, kand’ umutima wanje ukaba udendebutse.