Read Bibliya Yera 1951 GUCURA INTIMBA 2 Bible Online

GUCURA INTIMBA 2 - Bibliya Yera 1951 bible

GUCURA INTIMBA 2

¹Ewe kuntu Umwami Imana yaratse, akūbikiza igicu ku mukobga w’i Siyoni! Yatsinze hasi ubgiza bg’ Abisirayeli abuhanuye kw ijuru, Kandi ntiyibutse indava y’ ibirenge vyiwe kur’ uwo musi w’uburake bgiwe.

²Umwami Imana asanganguye amazu yose ya Yakobo ata kagongwe; Yahenuranye uburake ibihome vy’umukobga w’i Buyuda; Arabitsinda gushitsa hasi: Abami n’abaganwa babo yabahinduye ibihumane.

³Kubg’ uburake bgiwe bg’inkazi yakondoye ihembe ryose ry’Abisirayeli; Yapfunye ukuboko kwiwe kw’i buryo imbere y’abansi: Kandi yaturiye Yakobo, amumerera nk’umuriro w’ikibengebenge utongora impande zose.

⁴Yamufōreye umuheto nk’ umwansi, yahagaze abanguye ukuboko kw’i buryo nk’umurwanizi, Yishe abanyagikundiro bose: Yasutse ubushangashirwe bgiwe mw ihema ry’umukobga w’i Siyoni nk’umuriro.

⁵Umwami Imana yahindukiye i Bgisirayeli nk’umwansi, arahayongobeza; Yayongobeje ingoro zaho zose, yasanganguye ibihome vyaho: Yongerekanije akabonge n’ ugucura intimba vy’umukobga w’i Buyuda.

⁶Yashikuye ihema ryiwe nk’ ah’ ar’ umutara wo mu murima; Yasanganguye ahantu hiwe h’ikoraniro: Uhoraho yatumye imisi mikuru n’amasabato vyibagirana i Siyoni, Kand’ ubushangashirwe bgiwe bg’inkazi bgatumye atītūra umwami n’umuherezi wese.

⁷Umwami Imana yashibuye igicaniro ciwe, yazinutswe ahēra hiwe, Yagabuye mu maboko y’ abansi ibigo vy’ingoro z’i Siyoni: Bāyogoreye mu ngoro y’ Uhoraho, nko ku musi mukuru washinzwe.

⁸Uhoraho yagabiye gusangangura uruzitiro rw’umukobga w’i Siyoni: Yahageresheje umugozi, ntararuha apfunya ukuboko ngw areke guhonnya; Yateye igihome n’uruzitiro kuboroga; vyiheburiye hamwe.

⁹Amarembo yaho anyikiye mu kuzimu; ibihindizo vyaho yaravyononye, arabivunagura: Umwami waho n’abaganwa baho bari mu mahanga; nta vyagezwe bikiriho: Mber’ abavugishwa n’Uhoraho ntibakigira ivyo beretswe na we.

¹⁰Abashingantahe b’umukobga w’i Siyoni bicaye hasi, baguye mu gahwi; Biyoreye imikungugu ku mitwe; bakenyeye amagunira; Abakobga b’i Yerusalemu bajondamitse imitwe hasi.

¹¹Amaso yanje yakobowe n’ amosozi, amara yanje aradobangana, Umutima wanje usanzariye hasi kubgo kugesezwa kw’ umukobga w’ubgoko bgacu; Kukw abana bato n’abonka barabiraniye mu nzira zo mu gisagara.

¹²Babaza ba nyina, bati Nta duheke na vino vyobaho? Bagaca barabiranira mu nzira zo mu gisagara nk’abakomeretse, Imitima yabo igahondoberera mu bikiriza vya ba nyina.

¹³Nokubarira iki? Nokugereranya n’iki, ga mukobga Yerusalemu we? Noguhwanya n’iki kugira ngo nguhūmurize ga nkumi Siyoni we? Kuk’ uruguma rwawe ari runini nk’ikiyaga: ni nde yoshobora kukuvūra?

¹⁴Ba kamenyi bawe bākurotoreye ivy’ ubusa n’ivy’ ubupfu; Kandi ntibāguseruriye ibigabitanyo vyawe, ngo ntuje mu kinyago: Ariko bākurotoreye imbūri z’ubusa, n’ibikuzanira gucibga.

¹⁵Abahita bose bakwitamba ku muvyimba bakubita amashi ku yandi; Bakavuza agahwa, bakazunguriza imitwe umukobga w’i Yerusalemu, Bati Mbeg’ iki ni ca gisagara abantu bāhora batazira, ngo Ni Nyamwiza w’agahore, ngo Ni Munezero w’isi yose?

¹⁶Abansi bawe bose barakwasamiye cane, Bavuza agahwa, bagahekenya imisaya, bati Twarahayongobeje; Bati N’ukuri uyu ni wo musi twari twiteze; none turawushitseko, turawiboneye.

¹⁷Uhoraho yakoze ico yagabiye; Yashikije ijambo ryiwe yashinze mu misi ya kera; Yagukubise hasi ata kagongwe; Yahaye umwansi kukwitamba hejuru, Yashize hejuru ihembe ry’ abarwanizi bawe.

¹⁸Umutima w’ab’ i Yerusalemu watakambiye Uhoraho; Bat’ Ewe wa ruzitiro rw’umukobga w’i Siyoni, reka amosozi asendanishe nk’ uruzi ku murango no mw ijoro; Nturuhe uruhuka na gatoya; imbone y’ijisho ryawe ntitenzekanye.

¹⁹Va hasi uboroge mw ijoro, uhereye igihe amaterama atanguye; Usuke umutima wawe nk’ amazi imbere y’Umwami Imana: Tega ibiganza umusabire ubugingo bg’abana bawe, Barambitswe n’inzara mu mayirabiri yose.

²⁰Uhoraho we, rāba witegereze uwo wagiriye ivyo! Mbeg’ abagore borya abo bāvyaye, utwana bākuyakuya mu maboko yabo? Mbeg’ umuherezi n’ūvugishwa n’Imana bokwicirwa ahantu hēra h’Umwami Imana?

²¹Umusore n’umutāma barambaraye hasi mu nzira; Abigeme banje n’imisore yanje bahindikiranijwe n’ inkota; Wabatikije ku musi w’uburake bgawe; warabariritse ata kagongwe.

²²Wampamagariye ibinteye ubgoba irya n’ino, nk’uko wahamagara ikoraniro ku musi mukuru washinzwe, Kandi nta warokotse canke ngw asigare kur’ uwo musi w’uburake bg’Uhoraho; Abo nakuyakuya nkabarera, umwansi wanje yarabampēkūye.