Read Bibliya Yera 1951 GUCURA INTIMBA 3 Bible Online

GUCURA INTIMBA 3 - Bibliya Yera 1951 bible

GUCURA INTIMBA 3

¹Nd’ umuntu yabonye umubabaro uzanywe n’inkoni y’uburake bgayo.

²Yaranjanye ancisha mu mwiza, atari mu muco.

³N’ukuri yashishikaye kumbangurira ukuboko vuba na vuba burinda bgira.

⁴Yasāzishije inyama zanje n’ urukoba rwanje; yavunaguye amagufa yanje.

⁵Yaranziguje, ankikiza indurwe n’umubabaro.

⁶Yangerereye ahantu h’umwiza nk’abapfuye kera.

⁷Yankubakuvye impande zose ngo sincārūke; yatumye umunyororo wanje undemēra.

⁸Mber’ iyo ndamutakambiye ndamutabaza, ugusenga kwanje akwugaranira hanze.

⁹Yajibije inzira zanje ibibuye bibājwe; yagoretse inzira zanje.

¹⁰Ammereye nk’igikōko citwa idubu kibundiye kwica, nk’ intambge itegeye mu bibundo.

¹¹Yakikamitse inzira zanje, kandi yarantabaguye; yangize inkōkōre.

¹²Yamfōreyek’ umuheto, anshinga nk’uruti rw’icumu, antimbisha imyampi yiwe.

¹³Imyampi yo mu mutana wiwe ayintobekeranije mu mafyigo.

¹⁴Nahindutse ak’ amenyo mu bgoko bgacu bgose, n’ akavyino kabo umusi ukīra.

¹⁵Yanyujuje ibamba, ampāza umururazi.

¹⁶Amenyo yanje yayahongoje urusekebuye, yanyubitse mu munyota.

¹⁷Kand’ ubugingo bganje bgatandukanijwe n’amahoro, ukuroranirwa narakwibagiye.

¹⁸Maze ndavuga, nt’ Inkomezi zanje zirashize, n’ivyizigiro nari mfise k’Uhoraho na vyo biraheze.

¹⁹Ibuka umubabaro wanje n’ intuntu yanje, umururazi n’ indurwe.

²⁰Umutima wanje wama uvyibuka, ugenda wicurikiriye muri jewe.

²¹Ibi ni vyo nibuka, bikantera ivyizigiro:

²²N’ukw imbabazi z’Uhoraho ari zo zatumye tudaherengetezwa, kukw ikigongwe ciwe kidahera:

²³Cama ari gisha uko bukeye; ingen’ ar’ umwizigirwa bīratangaje.

²⁴Uhoraho ni we mugabane wanje, ni k’umutima wanje wama uvuga; ni co gituma nzohora mmwizigira.

²⁵Uhoraho agirira neza abamwiteze, n’imitima imurondera.

²⁶Ni vyiza k’umuntu yizigira, akitega agakiza k’Uhoraho atekereje.

²⁷Ni vyiza k’umuntu amenyerezwa ingōgo yo kuganzwa akiri muto.

²⁸Ni yicare wenyene, acereze, kukw ar’ Uhoraho yayimwambitse.

²⁹N’ashikane umunwa wiwe mu mukungugu, namba kumbure harih’ ivyizigiro.

³⁰N’ategere umusaya ūmukubita; bamuhāze ibitutsi.

³¹Kuk’ Umwami Imana ata ho azota umuntu ruhebga.

³²Naho yomubabaza, arikw azomugirira ikigongwe, nk’ ukw isinzi ry’imbabazi ziwe riri.

³³Kukw atababaza abantu abigomba, canke kubatera intuntu.

³⁴Gusiribanga imbohe zose zo mw isi,

³⁵Canke kugoreka urubanza rw’ umuntu mu nyonga z’Īsumba vyose,

³⁶Canke kurya urubanza rw’ umuntu, Umwami Imana ntabishima.

³⁷Ni nde yovuga ikintu, kikaboneka, kand’ Umwami Imana atari we yabigeze?

³⁸Mbega mu kanwa k’Īsumba vyose ntihavamw’ ivyago n’ivyiza?

³⁹Umuntu akiriho, iy’ ahaniwe ivyaha vyiwe, yokwidogera iki?

⁴⁰Enda ni dusesangure ingeso zacu, tuzisuzume, tugaruke k’Uhoraho.

⁴¹Ducurūrire imitima yacu Imana yo mw ijuru, tuyitarikiye amaboko,

⁴²Tuti Twaracumuye, turagarariza; ntiwaduharira.

⁴³Wadutwikiriye uburake, uradutōta; waratwishe, nta mbabazi watugirira.

⁴⁴Witwikiriye igicu, kugira ng’ ugusenga kwacu ntikumenēre ngo kugushikīre.

⁴⁵Waduhinduye nk’udukokorwa n’umwavu hagati y’amahanga.

⁴⁶Abansi bacu bose baratwasamiye.

⁴⁷Ibiteye ubgoba n’urusumanyenzi bidushitseko, bo n’ ubugesera no kuranduka.

⁴⁸Amaso yanje atemberanamw’ inzūzi z’amosozi, kubgo kuririra ukuranduka kw’ umukobga w’ubgoko bgacu.

⁴⁹Amaso yanje aracunduguta, ntasigaho, ntahengeshanya,

⁵⁰Gushitsa igihe Uhoraho azokwitegereza, akarāba hasi ari mw ijuru.

⁵¹Amaso yanje aransābije kubgo kuririra abakobga bose bo mu gisagara cacu.

⁵²Abanyankira ubusa bampīze cane nk’inyoni,

⁵³Batsinze ubugingo bganje mw ibohero i bgina, banyubikakw ibuye.

⁵⁴Amazi yarandenze ku mutwe; maze ndavuga, nti Ndapfuye.

⁵⁵Natakambiye izina ryawe, ewe Uhoraho, nd’ i bgina kure mw ibohero.

⁵⁶Wumva ijwi ryanje; ntukinge ugutwi kwawe ngo ntiwumve kuniha kwanje n’ugutaka kwanje.

⁵⁷Umusi nagutakambira waranyegereye; uravuga, uti Nta co utinya.

⁵⁸Mwami, wabūranye urubanza rw’umutima wanje; wacunguye ubugingo bganje.

⁵⁹Uhoraho, wabonye ukuntu ngiriwe nabi: n’uncire urubanza.

⁶⁰Wabonye guhōra kwabo kwose n’imigabo bangīra yose.

⁶¹Wumvise ibitutsi vyabo, Uhoraho we, n’imigabo bangīra yose,

⁶²N’amagambo y’abahagurutswa no kuntera, n’inama zabo zose bangīra umusi ukīra.

⁶³Ni witegereze iyicara ryabo n’īva hasi ryabo: mbaye akavyino kabo.

⁶⁴Uhoraho we, uzobasubiriza mu nkōko ibihwanye n’ibikorwa vy’amaboko yabo.

⁶⁵Uzobaha umutima ukomantaye, umuvumo wawe ushike kuri bo.

⁶⁶Uzobirukana uri n’uburake, uzobaherengeteza musi y’ ijuru ryawe, ewe Uhoraho.