Read Bibliya Yera 1951 GUCURA INTIMBA 4 Bible Online

GUCURA INTIMBA 4 - Bibliya Yera 1951 bible

GUCURA INTIMBA 4

¹Ewe kuntu izahabu yafyirifyitiye! Ukuntu izahabu nziza yahindutse ukundi! Amabuye y’ahēra h’urusengero yasābagijwe mu mayirabiri yose.

²Abahungu b’igikundiro b’i Siyoni, abāri bameze nk’ izahabu nziza, Ewe kuntu bagereranywa n’ imibindi y’imibumbano, igikorwa c’amaboko y’umubumvyi!

³Imbgebge zo ziha ivyana vyazo amabgabga, zikavyonsa; Umukobga w’ubgoko bgacu we agira icīra, nk’ibisīga vyo mu bugaragwa vyitwa imbuni.

⁴Ururimi rw’umwana yonka rufatanye n’uruhekenyero, ruguye ubukagashi: Abana bato basaba utwo kurya, ariko nta wubaha.

⁵Abāri bamenyereye gufungura ibigemānije basigaye bagwira isari mu nzira; Abārerewe mu mpuzu z’ inyambarabami basigaye barambarara ku macukiro.

⁶Kukw ibigabitanyo vy’umukobga w’ubgoko bgacu bikomeye gusumba icaha c’i Sodomu, Ari ho hākomvomvowe mu kanya isase, ata kuboko kuhakozeko.

⁷Abaganwa biwe bāhora bakayangana kurusha shelegi,[1] bakarusha n’amata kwera, Imibiri yabo yabonerana kurusha utubuyenge twitwa marijani, bāri basēnnye nk’ utwitwa safiro.

⁸Noneho mu maso habo hasigaye harusha imivyiro kwirabura; ntibakimenyekana mu nzira: Urukoba rwabo rumatanye n’ amagufa; rwārūmye nk’igiti.

⁹Abicwa n’inkota ni bo bapfa rwiza kuruta abicwa n’ inzara; Kukw abo bo bagenda bashirira hejuru, bakicwa no kubura utwo bokweza mu mirima.

¹⁰Abagore bāri bafise ikigongwe basigaye bafata abana bīvyariye, bakabateka, Bakaba ivyo kurya vyabo, igihe umukobga w’ubgoko bgacu yagesezwa.

¹¹Uhoraho yashikije ubushangashirwe bgiwe, yarekuye uburake bgiwe bg’inkazi; Kandi yadometse umuriro muri Siyoni, utongora n’ amatanguriro yaho.

¹²Abami bo mw isi, bo n’ababa kw isi bose, nta ho bokwemeye Kw abarwanizi n’abansi bofyutse mu marembo y’i Yerusalemu.

¹³Vyatewe n’ivyaha vya ba kamenyi baho, n’ibigabitanyo vy’abaherezi baho, Bāvishirije amaraso y’abagororotsi hagati muri ho.

¹⁴Badandabagirana mu nzira zaho nk’impumyi, bihumanishije amaraso, Bituma abantu batagishobora gukora ku myambaro yabo.

¹⁵Barabahāniranwa, bati Ni mwīgireyo, mwa bihumane mwe! Ni mwīgireyo, ni mwīgireyo, ntimugire ico mukorako! Igihe bāhunga bayerera, abantu bo mu mahanga baravuga, bati Ntibabe bakiba hano.

¹⁶Igitsure c’Uhoraho carabashwiragije; ntagisubira kubashirak’ umutima: Na bo ntibubashe abaherezi, ntibāsoneye abatāma.

¹⁷Amaso yacu yakobowe no kurereka ugutabarwa kwacu, kand’ ata co bitumariye: Mu kurereka kwacu twiteze ihanga ridashobora gukiza.

¹⁸Baraturyamiye, bituma tudashobora guca mu nzira zacu: Iherezo ryacu riri hafi, imisi yacu irashize; ni koko iherezo ryacu rirashitse.

¹⁹Abaduhīga barusha inkukuma[2] zo mu kirēre kunyaruka: Badukinagiza ku misozi miremire, bakaducira ibico mu bugaragwa.

²⁰Uwar’ atubereye nk’impwemu duhumeka, uwari yararobanujwe amavuta n’Uhoraho, yakorokeye mu vyobo vyabo, Kand’ ari we twari twishimiye, ngo mu gitūtu ciwe ni ho tuzoba, uko turi hagati mu mahanga.

²¹Ni winezererwe, uhimbarwe, ewe mukobga, Edomu we, wibereye mu gihugu c’i Uzi! Nawe igikombe kizodōbēra kiruhe kigushikeko; uzoborerwa, ute agahuzu.

²²Igihano c’ukugabitanya kwawe kirarangiye, weho mukobga, Siyoni we; Ntazokwongera kukujana kure ur’ inyagano: Ariko wewe mukobga, Edomu we, azoguhanira ibigabitanyo vyawe; Azogaragaza ivyaha vyawe.