Read Bibliya Yera 1951 GUCURA INTIMBA 5 Bible Online

GUCURA INTIMBA 5 - Bibliya Yera 1951 bible

GUCURA INTIMBA 5

¹Uhoraho we, ibuka ivyatubayeko: Itegereze urābe ukuntu dutukwa.

²Ishamvu yacu yegukiwe n’ abanyamahanga, N’amazu yacu yegukiwe n’ab’ akavantara,

³Tur’ impfuvyi ntitukigira ba data, Ba mama bameze nk’abapfakazi.

⁴Tunywa amazi tuyaguze; Inkwi tuzironka ku biguzi.

⁵Abaduhīga batuguye ku gakanu: Turarushe, ntitugira akito ko kuruhuka.

⁶Twakomeye amashi Abanyegiputa, N’Abashuri kugira ngo turonke utwo kurya two kwisama.

⁷Ba data bakoze ivyaha, kandi ntibakiriho; Natwe twasubiweko n’ibigabitanyo vyabo.

⁸Abagurano ni bo basigaye batuganza: Nta wuriho wo kuturokora ngw atugobotore mu maboko yabo.

⁹Ivyo kurya tubironka duhevye amagara, Kubg’ inkota itegeye mu bugaragwa.

¹⁰Urukoba rwacu rusigaye rwirabura nk’inkono, Bitewe n’umuriro w’inzara.

¹¹Bafata abagore bo muri Siyoni ku kagōbēro, N’inkumi zo mu bisagara vy’i Buyuda.

¹²Abaganwa bāmanitswe babasungaje ukuboko kumwe: N’abatāma ntibābagirira udusoni.

¹³Imisore isigaye ikorerwa insyo, N’abana banyikizwa n’imbambo z’inkwi.

¹⁴Abatāma bāhevye kwicara ku nama, N’imisore ntikiruha icuraranga.

¹⁵Umunezero wo mu mitima yacu urashize; Imvyino zacu zahindutse amaborogo.

¹⁶Ibitsibo vyo ku mitwe yacu birakorotse: Tubonye ibara, kuko twakoze ivyaha.

¹⁷Ni co gituma imitima yacu ihondobera, Ivyo ni vyo bituma duhwera mu kajisho;

¹⁸Bitewe n’uk’ umusozi Siyoni ucitse amatongo: Imbgebge zisigaye zihatambatamba.

¹⁹Weho, Uhoraho, wamah’ ibihe bidashira; Intebe yawe ihoraho uk’ urunganwe rugenda rukurikirana.

²⁰N’iki catumye utwibagira ibihe vyose, Kand’ ukaduheba kumara igihe kirekire kingana girtyo?

²¹N’utwigarukanire, Uhoraho we, natwe turakugarukira; Dukomōrere imisi yacu nk’ iyo twahoranye ubga mbere,

²²Shiti waradutaye ruhebga, Ukaturakira birenze urugero.