Read Bibliya Yera 1951 EZEKIYELI 1 Bible Online

EZEKIYELI 1 - Bibliya Yera 1951 bible

EZEKIYELI 1

¹Mu mwaka wa mirongwitatu, mu kwezi kwa kane, ku musi ugira gatanu w’ukwo kwezi, nari kumwe n’abājanywe ar’ inyagano turi ku ruzi Kebari; ijuru riruguruka, maze mbona ivyo neretswe bivuye ku Mana.

²Kur’ uwo musi ugira gatanu w’ukwo kwezi, hāri mu mwaka ugira gatanu umwami Yehoyakina yambukanywe ar’ inyagano,

³ijambo ry’ Uhoraho ryanjeko jewe umuherezi Ezekiyeli mwene Buzi, ndi mu gihugu c’Abakaludaya ku ruzi Kebari; kand’ aho hantu nyene ni ho ukuboko kw’Uhoraho kwaziye kuri jewe.

⁴Ngize ntya, mbona umuyaga w’ikirura uje uturutse i burārūko, igicu kininiya kirabagizamw’ umuriro, gikikijwe n’ibibatsi bituruka hagati muri wo, biboneka nk’ umuringa w’umujumbu, bituruka hagati mur’ uwo muriro.

⁵Kandi muri wo hagati havamw’ ishusho y’ibinyabugingo bine. Kand’ uku ni ko vyasa: vyari bifise ishusho y’umuntu.

⁶Kimwe‐kimwe cari gifise mu maso hane, kandi kimwe‐kimwe nyene cari gifise amababa ane.

⁷Kand’ ibirenge vyavyo vyar’ inambi; mu bgōro bg’ ibirenge vyavyo hari hameze nk’ imbere mu nzāra z’inyana: kandi vyakayangana nk’umuringa w’ umwakaka.

⁸Kandi vyari bifise amaboko nk’ay’ umuntu musi y’amababa yavyo mu mpande zavyo ukw ari zine; ivyo ukw ari bine, uku ni ko mu maso havyo n’ amababa yavyo vyari bimeze:

⁹amababa yavyo yar’ asomanye; nta ho vyahindukira iyo bigenda; vyose vyagenda bibanze.

¹⁰Mu maso havyo uko hāsa, vyari bifise mu maso nk’ah’ umuntu; kand’ ukw ari bine, vyari bifise mu maso nk’ah’ intambge mu ruhande rw’i buryo; kand’ ukw ari bine, vyari bifise mu maso nk’ah’ inka mu ruhande rw’i bumoso; kand’ ukw ari bine, vyari bifise mu maso nk’ ah’ inkukuma.[1]

¹¹Kandi mu maso havyo n’amababa yavyo vyari bihānye inta ahahera hejuru; amababa abiri ya kimwe‐kimwe yasomana n’ay’ ikindi, yandi abiri agatwikira umubiri waco.

¹²Kandi vyose vyagenda bibanze; aho Mpwemu yerekeje ni ho vyaja; nta ho vyahindukira iyo bigenda.

¹³Kandi ku vy’ishusho y’ivyo binyabugingo uko yar’ imeze, vyasa n’amakara y’umuriro yaka, kandi vyasa n’imuri; uwo muriro waca hirya no hino hagati y’ivyo binyabugingo: uwo muriro wakayangana cane, kandi muri wo havamw’ imiravyo.

¹⁴Ivyo binyabugingo vyariruka bigakimirana, bisa n’imiravyo irabagiza.

¹⁵Nuko ncitegereza ivyo binyabugingo, mbona amakurudumu ahagaze hasi, imwe‐imwe i ruhande y’ivyo binyabugingo, imbere mu maso yavyo ukw ari bine.

¹⁶Ayo makurudumu, ishusho yayo n’ uburyo yakozwe vyari bimeze nk’ akabuyenge kitwa tarushishi; kandi yose ukw ar’ ane yarasa: ishusho yayo n’uburyo yakozwe, vyasa n’ah’ umenga n’ikurudumu isobekeranye n’iyindi.

¹⁷Iy’ agiye, yagenda yerekeye mu mpande zayo ukw ari zine: nta ho yahindukira iy’ agenda.

¹⁸Ahihese hayo hāshika hejuru biteye ubgoba; kandi yose ukw ar’ ane, ahihese hayo hāri huzuyekw amaso impande zose.

¹⁹Kand’ ivyo binyabugingo iyo bigiye, ya makurudumu yagendera i ruhande yavyo: kand’ iy’ ivyo binyabugingo biteruwe ngo bive kw isi, na ya makurudumu yaraterurwa.

²⁰Aho Mpwemu yerekeje hose ni ho vyaja, ari ho nyene Mpwemu yerekeje kugenda: ya makurudumu akagenda ateruwe i ruhande yavyo, kukw impwemu y’ikinyabugingo cose yari mu makurudumu.

²¹Iyo bigiye na yo yaragenda; vyahagarara agahagarara; vyaterurwa ngo bive kw isi, na ya makurudumu agaterurwa i ruhande yavyo, kukw impwemu y’ ikinyabugingo cose yari mu makurudumu.

²²Hejuru y’imitwe y’ ivyo binyabugingo hār’ ikimeze nk’itāzānure ry’ijuru, gisa n’urubona ruca mu jisho, kibamvye hejuru y’imitwe yavyo.

²³Kandi musi y’iryo tāzānure, amababa yavyo yaranambikiriye, rimwe ryerekeye irindi: kimwe‐kimwe cari gifise abiri atwikiriye umubiri.

²⁴Kand’ iyo bigiye, numva guhinda kw’amababa yavyo, ni nko guhinda kw’amazi menshi, nk’ ijwi ry’Īshobora vyose, nk’uguhinda kw’ingabo: iyo bihagaze vyabumba amababa yavyo.

²⁵Kandi hirya y’itāzānure ry’ijuru ryo hejuru y’imitwe yavyo hār’ ijwi: nuko vyarahagarara bikabumba amababa yavyo.

²⁶Hirya y’iryo tāzānure ryo hejuru y’imitwe yavyo hār’ igisa n’intebe y’ubgami imeze nk’akabuyenge kitwa safiro; kandi hejuru kur’ ico kintu casa n’intebe y’ubgami hār’ igisa n’umuntu.

²⁷Uhereye ahobaye mu rukenyerero rwiwe ugasubiza ahahera haruguru, mbona ibiboneka nk’ umuringa w’umujumbu, n’igisa n’ umuriro umuziguje impande zose; kand’ uhereye ahobaye mu rukenyerero rwiwe ugasubiza ahahera hepfo, mbona umenga har’ ibisa n’umuriro, kand’ ibibatsi vyamukikiza hirya no hino.

²⁸Nk’uk’ umunywamazi wo ku gicu usa ku musi w’imvura, ni k’ugukayangana kwari kumukikije hirya no hino kwasa. Ivyo vyari bimeze nk’ibisa n’ubgiza bg’Uhoraho. Mbibonye, nikubita hasi nubamye, numva ijwi ry’ūvuga.