Read Bibliya Yera 1951 EZEKIYELI 12 Bible Online

EZEKIYELI 12 - Bibliya Yera 1951 bible

EZEKIYELI 12

¹Ijambo ry’Uhoraho ryongera kunzako,

²riti Mwana w’ umuntu, uba hagati mu b’inzu y’ abagarariji, bafise amaso yo kubona ariko ntibabona, bafise amatwi yo kwumva ariko ntibumva; kukw ar’ inzu y’abagarariji.

³Nuko rero wewe mwana w’ umuntu, ni witegure ibintu vyo ku nzira, uheze ujonjore ku murango bakubona; ujonjore uve i wawe uje ahandi bakubona: kumbure vyobatera kwibaza, nah’ ar’ inzu y’abagarariji.

⁴Usohore ibintu vyawe ku murango bakubona, nk’ ibijonjoranwa: nawe ubgawe uhenge mu kagoroba usohoke bakubona, nk’ukw abantu bāmbukanywe bagenda.

⁵Uheze wimbe utobore uruzitiro bakubona, uhacane ivyo bintu.

⁶Ubishire ku rutugu bakubona, ubijane bumaze kwira; witwikire mu maso ngo ntubone igihugu: kuko nagushizeho kubera akarorero inzu ya Isirayeli.

⁷Nuko ndabigenza nk’uko nabariwe: ibintu vyanje ndabisohora ku murango, ari nk’ibintu vyo ku nzira, maze mpenga mu kagoroba, ubganje nyene ndimba n’ amaboko yanje, ntobora uruzitiro; mbihacana bumaze kwira, mbishira ku rutugu babona.

⁸Bukeye mu gitondo ijambo ry’ Uhoraho rinzako,

⁹riti Mwana w’umuntu, mbeg’ ab’ inzu ya Isirayeli, ya nzu y’abagarariji, ntibakubajije ngw Ivyo ukora n’ibiki?

¹⁰Ubishure, ut’ Uku ni k’ Umwami Uhoraho agize, at’ Izi mbūri zibūrira segaba ar’ i Yerusalemu, n’ab’ inzu ya Isirayeli bose babayo.

¹¹Uvuge uti Mbabereye akarorero: uko nagenjeje ni ko bazogirirwa; bazokwambukanwa bajanwe ar’ inyagano.

¹²Kandi segaba ari muri bo azokwikorera ku rutugu mw ijoro, asohoke: bazokwimba batobore uruzitiro ngo bahacane ibintu; na we azokwitwikira mu maso, ngo ntaz’ abone igihugu.

¹³Kandi nzomutega ururiba rwanje, afatwe n’umutego wanje; nzomujana i Babuloni mu gihugu c’Abakaludaya; kandi ntazohabona nah’ ari ho azogwa.

¹⁴Kand’ abamushagajeko bose bo kumutabara, n’imitwe y’ingabo ziwe zose, nzobashwiragiriza mu birēre vyose, kandi nzosokora inkota ibirukane.

¹⁵Maze bazomenya yuko jewe nd’Uhoraho, igihe nzobasābagiriza mu mahanga, nkabashwiragiriza mu bihugu.

¹⁶Ariko nzosiga bake muri bo mbakize inkota n’inzara n’ikīza, kugira ngo baze bāturire ibizira bākoze vyose mu mahanga aho bazoba bāraroye; kandi bazomenya yuko jewe nd’ Uhoraho.

¹⁷Ijambo ry’Uhoraho ryongera kunzako,

¹⁸riti Mwana w’umuntu, uz’ urye ivyo kurya vyawe uhinda agashitsi, kand’ uz’ unywe amazi yawe uri mu gatengo uhagaritse umutima;

¹⁹kand’ ubarire abantu bo mu gihugu, ut’ Uku ni k’ Umwami Uhoraho agize ku vy’ abar’ i Yerusalemu no mu gihugu c’i Bgisirayeli, ati Bazorya ivyo kurya vyabo bahagaritse imitima, banywe amazi yabo bumiwe, kukw igihugu kizohinduka imisaka, ivyaho bigasahurwa vyose, bazize umuryano w’abakibamwo bose.

²⁰Kand’ ibisagara vyuzuyemw’ abantu bizocika ibitongozi, igihugu na co gihinduke imisaka; namwe muzomenya yuko jewe nd’ Uhoraho.

²¹Maz’ ijambo ry’Uhoraho rinzako,

²²riti Mwana w’umuntu, uyu mugani n’uw’ iki, muca mu gihugu c’i Bgisirayeli, ngw Imisi iratevye, kandi ng’ Ukwerekwa kwose kurabuze?

²³None rer’ ubabgire, ut’ Uku ni k’Umwami Uhoraho agize, ati Nzotuma uwo mugani uzimangana, ntibongere kuwuca mu Bisirayeli nk’umugani; arik’ ubabgire, ut’ Imisi irēgereje, n’ivyerekanywe vyose bigira bishike.

²⁴Nta kwerekwa kw’ ibinyoma cank’ indagu y’akabirya bizokwongera kuba mu nzu ya Isirayeli.

²⁵Kuko jewe nd’Uhoraho: nzovuga, kand’ ijambo nzovuga rizoshika; ntirizokwongera kurekerwa mu rutendeko: kuko mu gihe canyu, mwebge ab’ inzu y’abagarariji, nzovuga kandi nshitse ico navuze, ni k’Umwami Uhoraho agize.

²⁶Ijambo ry’Uhoraho ryongera kunzako,

²⁷riti Mwana w’umuntu, ereg’ ab’ inzu ya Isirayeli baravuga, ngw Ivyo weretswe bizoshika imisi yigiyeyo, kandi ng’ubūra ivy’ ibihe bikiri kure.

²⁸Nuko rer’ ubabarire, ut’ Uku ni k’Umwami Uhoraho agize, at’ Amajambo yanje yose nta na rimwe rizosubira kurekerwa mu rutendeko, arikw ijambo nzovuga rizoshika, ni k’ Umwami Uhoraho agize.