Read Bibliya Yera 1951 EZEKIYELI 15 Bible Online

EZEKIYELI 15 - Bibliya Yera 1951 bible

EZEKIYELI 15

¹Maz’ ijambo ry’Uhoraho rinzako,

²riti Mwana w’ umuntu, igiti c’umuzabibu, ico kirusha ikindi giti cose n’iki, cank’ ishami ryaco rirusha iki ibindi biti vyo mu kibira?

³Har’ igiti co kubāza cobonekamwo ngo kigire ico gikora? Har’ abogicak’ urumambo rwo kumanikakw ikintu?

⁴Erega n’ico gutererwa mu muriro nk’inkwi: umuriro uragitongora epfo na ruguru, no hagati yaco hagasha: none coba kigifise ikimazi ku gikorwa na kimwe?

⁵Rāba, kikir’ umurava nta co covuyemwo cokoreshwa, nkanswe ubu, umuriro umaze kugitongora, kigasha, har’ ico coba kikivamwo cokoreshwa?

⁶Nuko rero, uku ni k’Umwami Uhoraho agize, ati Nk’ukw igiti c’umuzabibu kimeze mu bindi biti vyo mu kibira, ico natanze kuba inkwi z’umuriro, uko ni ko nzotanga ababa i Yerusalemu.

⁷Kandi nzobatungīra igitsure; bazova mu muriro basubire mu wundi ubatongore; kandi namwe muzomenya yuko jewe nd’ Uhoraho, abo ni nabatungīra igitsure.

⁸Kand’ igihugu nzogihindura amatongo, kuko bācumuye, ni k’Umwami Uhoraho agize.