Read Bibliya Yera 1951 EZEKIYELI 21 Bible Online

EZEKIYELI 21 - Bibliya Yera 1951 bible

EZEKIYELI 21

¹Ijambo ry’Uhoraho rinzako,

²riti Mwana w’umuntu, tungīra ijisho ryawe i Yerusalemu, utume ijambo ryawe ahēra h’ urusengero, ubūrire igihugu c’i Bgisirayeli;

³ico gihugu ukibarire, ut’ Uku ni k’Uhoraho agize: ngw Ehe nzohigūra namwe, kandi ngira nsokōre inkota yanje mu rwubati rwayo, ndirike abagororotsi n’abanyakibi muri wewe.

⁴Nuko rero, kuko ngira ndirike abagororotsi n’abanyakibi muri wewe, ni co gituma inkota yanje igira ive mu rwubati rwayo itere abafise umubiri bose, uhereye i bumanuko ugashitsa i burārūko:

⁵maz’ abafise umubiri bose bazomenya yuko jewe, Uhoraho, nasokoye inkota yanje mu rwubati rwayo; ntizosubira muri rwo ukundi.

⁶Nukw enda niha, ewe mwana w’umuntu, unihire imbere yabo kubg’ umutima usāvye no kubg’ intuntu nyinshi.

⁷Maze ni bakubaza, ngw Igituma uniha n’ iki? uz’ ubabgire, uti Mbitewe n’ inkuru mbi y’ibigira bize; umutima wose uzohababuka, amaboko yose adendebuke; umushaha wose uzocika ivutu, n’amavi yose aregarege acike nk’amazi: ehe biraje, bigira bishireko, ni k’ Umwami Uhoraho agize.

⁸Maz’ ijambo ry’Uhoraho rinzako,

⁹riti Mwana w’umuntu, vuga ubūre, ut’ Uku ni k’Uhoraho agize, ngo ni mvuge, nt’ Inkota, inkota, irakarihijwe kand’ irartyorowe;

¹⁰yakarihijwe kugira ngw iririke; yartyorowe kugira ngw ibe nk’umuravyo: none twoja aho, tukitwengera? Inkoni y’umwana wanje igaya izindi zakūwe mu giti cose.

¹¹Iyo nkota yatanzwe ngw irtyororwe ngw ibone gukoreshwa: iyo nkota yakarihijwe, mbere yartyorowe, kugira ngw ishirwe mu kuboko kw’ūririka.

¹²Turikisha uboroge, mwana w’umuntu, kukw ibanguriwe abantu banje, ibanguriwe abaganwa bose b’Abisirayeli: bagerewe inkota hamwe n’abantu banje: shirako wishishitire.

¹³Kukw amateka aciwe: kandi namb’ iyo nkoni yagayana itakiriho, vyomera bite? ni k’Umwami Uhoraho abaza.

¹⁴Nuko rero weho, mwana w’umuntu, ubūre, ukubite amashi ku yandi: inkota n’ikubite kabiri, mbere n’ubugira gatatu, ni yo nkota ikomeretsa akagīrīre: inkota yakomerekeje ūhambaye akagīrīre, ni yo yinjiye no mu mazu yabo.

¹⁵Kand’ iyo nkota iteye ubgoba nayibanguye ku marembo yabo yose, kugira ngw imitima yabo iyagire mu nda, n’ ugutsitara kwabo kwongerekane. Yō! Imeze nk’umuravyo, yasongorewe kuririka.

¹⁶Wa nkota we, ikazanure, utere i buryo; itegure, utere i bubamfu, aho werekeye hose!

¹⁷Nanje n’uko nzokubita amashi ku yandi, kandi nzokwimara ishavu: ni jewe Uhoraho mbivuze.

¹⁸Ijambo ry’Uhoraho ryongera kunzako,

¹⁹rit’ Ikindi kandi, mwana w’umuntu, toborera inzira zibiri inkota y’umwami w’i Babuloni ngw ibone kuza; zompi zizova mu gihugu kimwe: uheze ushireh’ icapa, ugishire ah’ inzira ija ku murwa ishamikiye.

²⁰Utoborere inzira iyo nkota ngw ije ahitwa i Raba h’ubgoko bg’Abamoni, n’iyindi ngw ije i Buyuda i Yerusalemu hazitijwe inzitiro z’ amabuye.

²¹Kuk’ umwami w’i Babuloni ahagaze mu mayirabiri, ah’ izo nzira zompi zishamikiye, kugira ngw araguze: azungagiza imyampi, akaraguza ibigirwamana vyitwa terafimu, agasuzuma igitigu.

²²Mu kuboko kwiwe kw’i buryo ni ho haranze i Yerusalemu, ngw ahomvoze inzitiro zaho ibiti vy’imigogo, yasamire abazoharirikirwa, ashire hejuru avuze akarūru, ahomvoze amarembo ibiti vy’ imigogo, akirundire ibigunguzi vyo kwūririrako, yubake n’ibihome vyo kuhatera.

²³Arikw ab’i Yerusalemu bo bazovyita nk’indagu z’ ibinyoma, kubg’ indahiro bābarahiye: arikw azokwibuka ibigabitanyo vyabo, kandi ni vyo bizotuma bafatwa.

²⁴Nuko rer’ uku ni k’Umwami Uhoraho agize, ati Ko mwatumye ibigabitanyo vyanyu vyibukwa, ibicumuro vyanyu bigatwikururwa, bigatuma ivyaha vyanyu biserukira mu bikorwa vyanyu vyose, kandi ko mwibutswe, muzofatwa ukuboko.

²⁵Nawe, wa munyakibi wakomerekejwe akagīrīre, wa mwami w’Abisirayeli, washitsweko n’umusi wawe, igihe giherahereza ibigabitanyo vyawe;

²⁶uku ni k’Umwami Uhoraho agize, ati Kūra umugāra, wiyambure igitsibo; ntibizosubira kumera nk’ uko vyari bisanzwe. Icāri hasi kizoshirwa hejuru, kand’ icāri hejuru kizosubizwa hasi.

²⁷Amatongo, amatongo, nzobigira amatongo masa: kandi ni ko bizokwama, gushitsa igihe nyenevyo azozira; nanje nzobimuha.

²⁸Nawe, mwana w’umuntu, vuga ubūre, ut’ Uku ni k’Umwami Uhoraho agize ku vy’ubgoko bg’ Abamoni, no ku vy’igitutsi cabgo; maz’ uvuge, ut’ Inkota, inkota irasokowe, yartyororewe kuririka, kugira ngw imaririkanye, ibe nk’ umuravyo:

²⁹bākuroteye inzozi z’ubusa, n’indagu z’ibinyoma, ngo ni wewe uzoyibangurira ku mazosi y’abanyakibi bākomerekejwe akagīrīre, abo umusi wabo washitseko, mu gihe giherahereza ibigabitanyo vyabo.

³⁰Yisubize mu rwubati rwayo. Ahantu waremewe, mu gihugu wavukiyemwo, aho ni ho nzogucirira urubanza.

³¹Kandi nzokurekurirak’ ubushangashirwe bganje, nkwakirizek’ umuriro w’ uburake bganje, nkugabure mu maboko y’abantu bameze nk’ibikōko, bazi guhonnya.

³²Uzoba inkwi z’umuriro; n’amaraso yawe azodēngēra hagati mu gihugu; kandi ntuzosubira kwibukwa ukundi: kuko jewe Uhoraho mbivuze.