Read Bibliya Yera 1951 EZEKIYELI 22 Bible Online

EZEKIYELI 22 - Bibliya Yera 1951 bible

EZEKIYELI 22

¹Ijambo ry’Uhoraho ryongera kunzako,

²riti Nawe, mwana w’umuntu, mbega ntiwogicira urubanza, ntiwogicira urubanza, ca gisagara kivisha amaraso? Nuk’ ukimenyeshe ibizira vyaco vyose.

³Kand’ uvuge, ut’ Uku ni k’Umwami Uhoraho agize, at’ Ewe wa gisagara kivishiriza amaraso hagati muri co kugira ngw igihe caco gishike, kikīronderera ibigirwamana ngo ciyanduze!

⁴Wikwegeye gucirwakw iteka kubg’ amaraso wavishije, kandi wiyandurishije ibigirwamana wirondereye; ni wewe wateye kw igihe cawe kigushikako, mber’ ushitse ku ntozo y’imyaka yawe: kubg’ ivyo nguhinduye igitutsi mu mahanga, n’agatwengo mu bihugu vyose.

⁵Abari hafi yawe n’abari kure yawe bazogucokora, wewe uw’ izina ryanduye, wuzuyemw’ imivurungano.

⁶Rāba abaganwa b’Abisirayeli baba muri wewe uko bangana bakoresha ububasha bgabo kuvisha amaraso.

⁷Ababa muri wewe bakēngēra ba se na ba nyina; muri wewe ni ho bahahariza umuntu w’akavantara; muri wewe ni ho barīra impfuvyi n’ abapfakazi.

⁸Watītūye ivyera vyanje, uzirūra n’amasabato yanje.

⁹Muri wewe haba abarementaniriza abandi ngo babicishe; muri wewe haba abarīra mu bitabo ku misozi; hagati muri wewe bāhakoreye ivy’ ubushakanyi.

¹⁰Muri wewe bonona baka se; muri wewe bafata abagore bari mu miziro.

¹¹Umuntu akorana ibizira n’ umugore w’umubanyi wiwe; uwundi yononesha ubushakanyi umukazana wiwe; uwundi wo muri wewe afata mushiki we basangiye se.

¹²Muri wewe bābīra ingurire yo kuvisha amaraso; waka ay’ inyungu ku ngurāne, ukāka n’ ibirenzeko, uronka inyungu kuri bagenzi bawe ku gahotoro, ariko jewe waranyibagiye; ni k’Umwami Uhoraho agize.

¹³Nuko rero, ehe rāba, kubg’ inyungu z’ubugunge waronse, no kubg’ amaraso yaviriye muri wewe, bitumye nkubita amashi ku yandi.

¹⁴Mbeg’ umutima wawe uzoshobora kwihangana, cank’ amaboko yawe azokomera, mu misi nzobikubaza? ni jewe Uhoraho mbivuze, kandi nzobikora.

¹⁵Nzogushwiragiriza mu mahanga, ngusābagirize mu bihugu; kandi nzokumaramw’ ubuhumane bgawe.

¹⁶Ni wewe ubgawe uzoba wariyandurije imbere y’amahanga; maz’ uzomenya yuko jewe nd’ Uhoraho.

¹⁷Ijambo ry’Uhoraho rinzako,

¹⁸riti Mwana w’umuntu, inzu ya Isirayeli yampindukiye nk’ inkamba: bose ni nk’imiringa n’ amabati n’ivyuma n’amasāsu, biri hagati mu ziko ryo mu ruganda; bahindutse nk’inkamba z’ifeza.

¹⁹Nuko rero, uku ni k’Umwami Uhoraho agize, ati Mwese ko mwahindutse nk’inkamba, nuko rāba, ngiye kubakoraniriza muri Yerusalemu hagati.

²⁰Nk’uko bakoraniriza ifeza n’imiringa n’ivyuma n’amasāsu n’amabati hagati mu ziko, bakabivugutira n’umuriro ngo bishonge, uko ni ko namwe nzobakoraniriza hamwe mfise uburake n’ubushangashirwe, mbarambikeho mbashongeshe.

²¹Mbere nzobakoraniriza hamwe, mbavugutire n’umuriro w’uburake bganje, mushongere hagati muri Yerusalemu.

²²Nk’ukw ifeza ishongera hagati mu ziko, ni ko namwe muzoshongera hagati muri ho; kandi muzomenya yuko jewe Uhoraho nabarekuriyek’ ubushangashirwe bganje.

²³Nukw ijambo ry’Uhoraho rinzako,

²⁴riti Mwana w’umuntu, ico gihugu ukibgire, ut’ Ur’ igihugu kidatunganye, kitazoronka imvura ku musi w’uburake.

²⁵Abaganwa baho bagīriye inama y’ubugarariji hagati muri ho, nk’ukw intambge itabagura ico ihīze: batsontsomeye abantu; banyaze ubutunzi n’ivy’ igiciro; bapfakaje benshi hagati muri ho.

²⁶Abaherezi baho bishe ivyagezwe vyanje ku manyama, bazirūye ivyera vyanje: ntibashize itandukaniro hagati y’ivyera n’ibitar’ ivyera, canke ngo bamenyeshe abantu uko bakwiye gutandukanya ibihumanye n’ibidahumanye, kandi n’amasabato yanje barayirengagije; nuko nsigaye nkēngēretse muri bo.

²⁷Abaganwa baho bameze nk’amabingira atabagura ico ahīze; bavisha amaraso, bagahonnya abantu, ngo bironkere inyungu.

²⁸Na ba kamenyi baho babahomeshereje ingwa, berekwa ubusa, babaragurira ibinyoma, bat’ Uku ni k’ Umwami Uhoraho agize, kand’ Uhoraho ata co yavuze.

²⁹Abantu b’abanyagihugu barahahaza bakambura; mbere bakagirira nabi umugorwa n’umukene, bakadendereza umuntu w’akavantara.

³⁰Kandi narondeye umuntu muri bo yosana uruzitiro, agahagarara imbere yanje mu kirengero ahagarariye igihugu, ngo noye kugihonnya; ariko nta n’umwe nabonye.

³¹Ni co catumye mbarekurirak’ ubushangashirwe bganje, nkabamarisha umuriro w’uburake bganje: ingeso zabo nazibashubije ku mitwe, ni k’Umwami Uhoraho agize.