Read Bibliya Yera 1951 EZEKIYELI 24 Bible Online

EZEKIYELI 24 - Bibliya Yera 1951 bible

EZEKIYELI 24

¹Nuko, mu mwaka w’icenda, mu kwezi kw’icumi, ku musi ugira icumi w’ukwo kwezi, ijambo ry’Uhoraho ryongera kunzako,

²riti Mwana w’umuntu, wandike umusi, ni wo uyu musi nyene: kuk’ umwami w’i Babuloni ashitse hafi y’i Yerusalemu kur’ uyu musi nyene.

³Ab’ inzu y’ abagarariji ubacire umugani, ubabgire, ut’ Uku ni k’Umwami Uhoraho agize, ati Tereka, tereka inkono ku ziko, utek’ usukemwo n’amazi:

⁴wegeranye inkekera z’inyama uzishiremwo, mber’ igikenye cose ciza‐ciza, ukuguru n’ ukuboko; uyuzuze n’amagufa meza‐meza,

⁵uzikūye kuri nziza cane yo mu mukuku; ukomānye inkwi musi, zishe rwose; mbere kugira ngw amagufa arimwo yidohore.

⁶Nuko rero, uku ni k’Umwami Uhoraho agize, ati Kizobona ibara, ca gisagara kivisha amaraso, ni co ya nkono irimw’ ingese, ingese zayo zanse kuyivamwo! Zose uzārure imwe‐imwe, utarinze kurobanura.

⁷Kukw amaraso yaco ari hagati muri co; cayashize ku rutare rugaragara; nticayasutse mw ivu, ngw atwikirwe n’umukungugu.

⁸Nanje, kugira ngo biserure uburake bganje bgo kwīhōra, nasutse ayaco maraso ku rutare rugaragara nyene, ngo yoye gutwikirwa.

⁹Nuko rero, uku ni k’ Umwami Uhoraho agize, ati Kizobona ibara, ca gisagara kivisha amaraso! Nanje ikirundo c’inkwi ngira nkigire kinini.

¹⁰Komānya inkwi, domeka umuriro, uhīshe inyama neza, utume umufa ufatana, amagufa azigire.

¹¹Uheze uyitereke ku makara y’umuriro iri gusa, kugira ngw ishuhe cane, umuringa yacuzwemwo uhindurire, imyanda yayo iyiyagiremwo, ngw ingese zayo ziherengetezwe.

¹²Erega n’ukuruhira ubusa gusa! Ingese zayo zihambaye ntiziyivamwo; ingese zayo ntizikūrwako n’umuriro.

¹³Mu myanda yawe harimw’ ubushakanyi; kuko nagutunganije, ntutungane, nta ho uzokwongera gutunganywa ng’uvekw imyanda yawe, gushitsa aho nzoba nkwimazekw ishavu ryanje.

¹⁴Ni jewe, Uhoraho, mbivuze: bizoshika, kand’ ari jewe mbikoze; sinzokwigarura, canke ngo ngire ico nziguriza, canke ngo nicuze; nk’ukw ingeso zawe ziri, kandi nk’ ukw ibikorwa vyawe biri, ni ko bazogucira urubanza, ni k’ Umwami Uhoraho agize.

¹⁵Maz’ ijambo ry’Uhoraho rinzako,

¹⁶riti Mwana w’umuntu, rāba, ngira nkwake ico wamizakw amaso, bije giturumbuka: ntuz’ uboroge canke ng’ urire, kand’ amosozi yawe ntācundugute.

¹⁷Kuniha kwawe kuraba amapfiranda; ntuz’ ugandarire ūpfuye, wizingire igitambara cawe mu mutwe, wambare inkweto zawe, ntiwipfuke ku munwa, kandi nturye ibiryazagu.

¹⁸Nuko mu gitondo mbibarira abantu, maze ku mugoroba umugore wanje arapfa; bukeye ngenza nk’uko nabariwe.

¹⁹Maz’ abantu barambaza, bati Mbega ntiwotubarira ico ivyo bintu bidutaze, bitumye ukora urtyo?

²⁰Nuko ndababarira, nt’ Ijambo ry’Uhoraho ryanjeko,

²¹riti Bgira ab’ inzu ya Isirayeli, ut’ Uku ni k’Umwami Uhoraho agize, ngo Ngira mpumanye ahantu hanje hēra, aho mwishimira yukw ari ho bubasha bganyu, mukahamizakw amaso, imitima yanyu ikahagirira igishika; kand’ abahungu banyu n’abakobga banyu mwasizeyo bazoririkwa n’ inkota.

²²Namwe muzogira nk’ uko mmeze: ntimuzoruha mwipfuka ku munwa, canke ngo murye ibiryazagu.

²³Ibitambara vyanyu bizoba biri mu mitwe yanyu, n’inkweto muzoba muzambaye: ntimuzoboroga canke ngo murire; ariko muzoshira umunywera kubg’ ibigabitanyo vyanyu, mucurire umunihiro hamwe.

²⁴Uko ni ko Ezekiyeli azobabera ikimenyetso: ukw akoze kwose namwe ni ko muzokora: igihe ivyo bizoba, muzomenya yuko jewe nd’ Umwami Uhoraho.

²⁵Nawe, mwana w’umuntu, kur’ uwo musi, aho nzobakūrirakw icari kibabereye ububasha, ni co munezero w’icubahiro cabo, ico bāmizakw amaso, ico bashirakw imitima, ngikūrane n’abahungu babo n’abakobga babo,

²⁶kur’ uwo musi impunzi izoza kuri wewe ibikubarire.

²⁷Kur’ uwo musi akanwa kawe kazogobodokera iyo mpunzi, maz’ uzoca uvuga, ntuzokwongera kugobga ururimi: uko ni k’uzobabera ikimenyetso; na bo bazomenya yuko jewe nd’ Uhoraho.