Read Bibliya Yera 1951 EZEKIYELI 25 Bible Online

EZEKIYELI 25 - Bibliya Yera 1951 bible

EZEKIYELI 25

¹Ijambo ry’Uhoraho rinzako,

²riti Mwana w’umuntu, tungīra ijisho ryawe ubgoko bg’ Abamoni, ubabūrire;

³ubarire ubgo bgoko bg’Abamoni, uti Ni mwumve ijambo ry’Umwami Uhoraho, ng’ Uku ni k’Umwami Uhoraho agize, ati Ko wagize ngw Awa! ukītamba hejuru y’ahēra hanje igihe hāhumanywa, ukītamba no ku gihugu c’i Bgisirayeli mu gihe cāba amatongo, no ku b’inzu ya Yuda igihe bambukanwa ar’ inyagano;

⁴nuko rero ngira nkugabure mu baba i burasirazuba, bakwegukire; bazogusagazamwo, bīshikire buzu; bazokurīra imirima, bakunywere n’ amata.

⁵Kand’ ahitwa i Raba nzohahindura ibirāro vy’ingamiya, n’igihugu c’Abamoni kibe ubugaramango bg’imikuku: nuko muzomenya yuko jewe nd’Uhoraho.

⁶Kuk’ ukw ari k’Umwami Uhoraho agize, ati Ko wakomye amashi, ukavuza imihamirizo, ukītamba hejuru y’igihugu c’i Bgisirayeli n’ akagaye kose ko mu mutima wawe;

⁷nuko rero, nkubānguriyek’ ukuboko kwanje, ngira nkugabure ng’ ube inyagano y’abanyamahanga; nzokurandura ngukūre mu mahanga, nguherengeteze mu bihugu, nkugeseze; maz’ uzomenya yuko jewe nd’ Uhoraho.

⁸Uku ni k’Umwami Uhoraho agize, at’ Abanyamowabu n’ab’i Seyiri ko bavuga, bat’ Ereg’ inzu ya Yuda ihwanye n’iz’ ayandi mahanga yose;

⁹nuko rero, mu gihugu c’i Mowabu, aharābana n’ibisagara vyaho, uhereye ku bisagara biri ku mbibe zaho, ari vyo biteye igihugu icubahiro, ni vyo Beti‐Yeshimoti n’i Bayali‐Meyoni n’i Kiriyatayimu, ngira mpace ikirengero,

¹⁰ngicire ab’i burasirazuba, ngo babone ingene batera Abamoni, kandi nzobatanga ngo babegukire, kugira ng’ ubgoko bg’ Abamoni bgoye kwongera kwibukwa mu mahanga.

¹¹Kandi nzoshitsa iteka nciriye kuri Mowabu, maze bazomenya yuko jewe nd’ Uhoraho.

¹²Uku ni k’Umwami Uhoraho agize, at’ Abanyedomu ko bagiriye inzu ya Yuda nabi babīhōra, bagacumura cane, mbere bakabīhōra;

¹³nuko rero, uku ni k’ Umwami Uhoraho agize, ati Nzobangurira ukuboko kwanje ku Banyedomu, mbaranduremw’ abantu n’ibitungano; kandi nzohahindura amatongo uhereye i Temani, baririkwe n’inkota gushitsa n’i Dedani.

¹⁴Abanyedomu nzobīhōra ntumye abantu banje b’ Abisirayeli; bazogirira Abanyedomu nk’uk’ uburake n’inzigo mbafitiye biri: maze bazomenya ukwīhōra kwanje ic’ ari co, ni k’Umwami Uhoraho agize.

¹⁵Uku ni k’Umwami Uhoraho agize, at’ Abafilisitiya ko bakoze ivy’ ukwīhōra, bakīhōrana akagaye kavuye mu mutima, ngo bageseze bari n’akazika kadashira;

¹⁶nuko rero, uku ni k’Umwami Uhoraho agize, ati Nzobangurira ukuboko kwanje ku Bafilisitiya, ndandure n’Abakereti, ngeseze n’amasigarira yo mu kiyaya c’ikiyaga.

¹⁷Nzobīhōra bihambaye, mbahanane ubushangashirwe; maze bazomenya yuko jewe nd’Uhoraho, igihe nzoba mbīhōye.