Read Bibliya Yera 1951 EZEKIYELI 26 Bible Online

EZEKIYELI 26 - Bibliya Yera 1951 bible

EZEKIYELI 26

¹Mu mwaka w’icumi na rimwe, ku musi wa mbere w’ukwezi, ijambo ry’Uhoraho ryanjeko,

²riti Mwana w’umuntu, Tiro ko havuze hitamba kuri Yerusalemu ngw Awa! ngw Icār’ umwugariro w’amahanga kirahomvotse! ngo Biransenyukiyeko, ngiye gutunga, co ko gicitse imisaka;

³nuko rero, uku ni k’Umwami Uhoraho agize, ati Nzohigūra nawe, ewe Tiro; nzokuvyukiriza amahanga menshi, nk’ukw ikiyaga kivyutsa imipfunda yaco.

⁴Na bo bazosangangura inzitiro z’i Tiro, bahomvore iminara yaho: nanje umukungugu waho nzowukukumba, mpahindure urutare rugaragara.

⁵Hazosigara ar’ aho kwanikira insenga hagati mu kiyaga; ni jewe mbivuze, ni k’Umwami Uhoraho agize; hazoba inyagano y’amahanga.

⁶Kandi n’abakobga baho bari mu misozi bazoririkwa n’inkota: maze bazomenya yuko jewe nd’ Uhoraho.

⁷Uku ni k’Umwami Uhoraho agize, ati Rāba, ngira ngomorere i Tiro Nebukadineza umwami w’i Babuloni, umwami w’abami; azoza aturutse i burārūko, afise amafarasi n’imikogote ikwegwa na yo, n’abagendera ku mafarasi, n’ingabo z’abantu benshi.

⁸Abakobga bawe bari mu misozi azobaririkisha inkota: kand’ azokwubaka ibihome vyo kugutera, akurundire ibigunguzi vyo kwuririrako, kand’ azokugwako yitwaje inkinzo.

⁹Inzitiro zawe z’amabuye azozihirikakw ibiti vy’ imigogo vyo kuzihomvora, n’iminara yawe abihomvoze incabiti ziwe.

¹⁰Kandi kukw amafarasi yiwe ari menshi, umukungugu azosūra uzokuyoberanya: inzitiro zawe zizonyiganyizwa n’akariri k’abagendera ku mafarasi, n’ak’ imikogote itwara ibintu n’ak’ imikogote y’intambara, igihe azofyuka mu marembo yawe, nk’ukw abantu bitera mu gisagara giciwe ikirengero.

¹¹Azotakangisha inzira zawe zose inzāra z’amafarasi yiwe: abantu bawe azobaririkisha inkota, kand’ inkingi zanditswekw ivy’ ubutōre bgawe zizotsindwa hasi.

¹²Ubutunzi bgawe bazobugira inyagano, basahure n’ibidandazwa vyawe; kandi bazosangangura inzitiro zawe z’ amabuye, bahomvagure n’amazu yawe ahimbaye; maz’ amabuye n’ibiti n’umukungugu vy’amasakamburira yawe bazobishiburira mu kiyaga.

¹³Kandi nzozibiza ijwi ry’indirimbo zawe, kand’ ukuvuga kw’inanga zawe ntikuzosubira kwumvikana ukundi.

¹⁴Kandi nzoguhindura urutare rugaragara: uzosigara ur’ aho kwanikira insenga; ntuzosubira kwubakwa ukundi: kuko jewe Uhoraho mbivuze, ni k’Umwami Uhoraho agize.

¹⁵Uku ni k’Umwami Uhoraho abaza Tiro, ati Mbeg’ ababa ku kiyaga ntibazoshirwa mu gatengo no kwumva ugusenyerana kwawe, igihe abakomeretse bazoba baniha, habaye gusasikwa hagati muri wewe?

¹⁶Ni ho abaganwa bose bo ku kiyaga bazokwikūra ku ntebe zabo, biyambure imvune zabo, bīkūreko n’imyambaro yabo ijererenze amabara: baje mu gatengo, bicare hasi, bahinde agashitsi badahengeshanya, bumijwe nawe.

¹⁷Kandi bazocura intimba bakuririra, bakubgire, bat’ Ewe kuntu ugeseye, wewe wahora ubābgamwo n’abagenda uruja n’uruza mu kiyaga, war’ igisagara rurangiranwa, kandi war’ agakomeye ku kiyaga, mwe n’abākubamwo, abāhora bateye ubgoba ababa ku kiyaga nyene!

¹⁸Noneh’ ababa kuri co bazohinda agashitsi ku musi w’ugusenyerana kwawe; mber’ ibizinga vyo mu kiyaga bizohagarikwa umutima n’uk’ uherengeteye.

¹⁹Kuk’ ukw ari k’Umwami Uhoraho agize, at’ Igihe nzoguhindura igisagara gicitse amatongo, ukamera nk’ibisagara vyaherengeteyemw’ abantu; igihe nzokurenzakw ikiyaga, amazi menshi akakurengako,

²⁰ni ho nzokumanurana n’abamanuka baja muri rwa rwobo, usangey’ abāgiye kera, nkugerēre i kuzimu, ahantu hāhebge uhereye kera, hamwe n’ abamanuka baja muri rwa rwobo, kugira ngo ntiwongere kubābgamwo; kand’ icubahiro nzogikomeza mw isi y’abakiriho.

²¹Nzokugira agaterabgoba, kandi ntuzosubira kubah’ ukundi: naho bazokurondera, ntuzokwigera usubira kuboneka, ni k’Umwami Uhoraho agize.