Read Bibliya Yera 1951 EZEKIYELI 27 Bible Online

EZEKIYELI 27 - Bibliya Yera 1951 bible

EZEKIYELI 27

¹Ijambo ry’Uhoraho ryongera kunzako,

²riti Nawe, mwana w’umuntu, cura intimba uririre Tiro;

³ubarire Tiro, uti Yewe uba mw ishikiro ku kiyaga, ukaba n’umudandaza ugurira amahanga aba hirya no hino ku kiyaga, uku ni k’Umwami Uhoraho agize, ati Yewe Tiro, waravuze, uti Ndi mwiza vy’agahore!

⁴Mw idamba ry’ikiyaga ni ho hākubereye urubibe; abākubaje nk’ubgato bāsozereye ubgiza bgawe.

⁵Imbaho zawe zose bāzibāje mu miberoshi ivuye i Seniri; bākūye amasederi i Lebanoni bayakubāziramw’ umuringoti.

⁶Mu biti vy’imyeloni vy’i Bashani ni vyo bākubāziyemw’ ingafe; intebe zawe bāzibāje mu mbaho z’imiteyashuri zākūwe mu bizinga vyo mu kiyaga vyitwa i Kitimu, bazishazishije kuzidombagizak’ utubaru tw’amahembe y’inzovu.

⁷Igihuzu cawe c’ubgato gikozwe mu mpuzu zera derere zijererenze amabara zivuye muri Egiputa, kugira ngo kikubere ibendera; amasufe n’amashigisha vyavuye mu Banyelishahu baba ku kiyaga ni vyo vyakubereye icugamo.

⁸Ababa i Sidoni no muri Aruvadi ni bo bār’ abasoza bawe: abanyabgenge bawe baba muri wewe, ewe Tiro, ni bo bāgutumbereza nk’ubgato.

⁹Abashingantahe b’i Gebali n’abanyabgenge baho bāri muri wewe bahoma imiguma yawe: amato yose yo mu kiyaga n’abasoza bayo vyāri muri wewe, bakudandariza ibidandazwa vyawe.

¹⁰Ab’i Buperesi n’ab’i Ludi n’ab’i Puti bāri mu ngabo zawe, ar’ abahizi bawe: bāmanika muri wewe inkinzo n’ inkofero z’intambara, bakerekana ubgiza bgawe.

¹¹Abagabo bo muri Aruvadi bāri kumwe n’ ingabo zawe impande zose ku nzitiro zawe z’amabuye, n’Abagamadimu bāri mu minara yawe: bāmanika inkinzo zabo ku nzitiro zawe impande zose, bagashitsa ubgiza bgawe.

¹²Ab’i Tarushishi bādandaza nawe kubg’ ibitayega vy’ubutunzi bgawe bg’uburyo bginshi; amafeza n’ivyuma n’amabati n’amasāsu ni vyo bākāba ivyawe.

¹³Ab’i Yavani n’ab’i Tubali n’ab’i Mesheki na bo bādandaza nawe: bāshōra abagurano n’imbombovu z’ivyakozwe mu miringa bakabikāba ivyawe.

¹⁴Ab’ inzu ya Togaruma bākāba ivyawe amafarasi n’amafarasi y’intambara n’inyumbu.

¹⁵Abantu b’i Dedani na bo bādandaza nawe: ibidandazwa vy’ababa hirya no hino ku kiyaga vyari mu maboko yawe; kandi bākuzanira amahembe y’inzovu n’imbaho z’ibiti vyitwa imipingo ngo bakābe nawe.

¹⁶N’ab’i Siriya bādandaza nawe kubg’ ibitayega vy’ibintu vyavuye mu buhinga bgawe: bākāba ivyawe utubuyenge twitwa nofekina, n’impuzu z’amashigisha, n’izijererenze amabara, n’izera derere, n’utubuyenge twitwa fezaruka n’utwitwa marijani.

¹⁷N’ab’i Buyuda bo n’abo mu gihugu c’i Bgisirayeli bādandaza nawe: bākāba ivyawe ingano ziva i Miniti, n’ibishashara, n’ubūki, n’amavuta ya elayo, n’ umuti wo gusomōra.

¹⁸N’ab’i Damasiko na bo bādandaza nawe ibitayega vy’ibintu vyavuye mu buhinga bgawe, kubg’ ibitayega vy’ubutunzi bgawe bg’uburyo bginshi; bāshōra vino ziva i Heluboni n’ubgoya bg’intama bgera.

¹⁹Ab’i Vedani n’ab’i Yavani bākāba ivyawe inyuzi; ivyuma birtyorowe, n’ibimota neza vyitwa kesiya, n’imisigati, vyari mu bidandazwa vyawe.

²⁰Ab’i Dedani bar’ abadandaji bawe b’impuzu z’ igiciro kinini zo kwicarwako ku mafarasi.

²¹Abo muri Arabiya n’abaganwa bose b’i Kedari bār’ abadandaji bawe wiganziye; bākudandariza imyagazi y’intama n’ amapfizi yazo n’impene.

²²Abadandaji b’i Sheba n’i Rama bār’ abadandaji bawe; bākāba ivyawe imibavu irusha iyindi yose kwinjira, n’utubuyenge twose tw’igiciro kinini n’izahabu.

²³Ab’i Harani n’ab’i Kanehe n’abo muri Edeni n’abadandaji b’i Sheba no muri Ashuri n’i Kilumadi bār’ abadandaji bawe.

²⁴Abo ni bo badandaji bawe bāshōra ibintu vy’ intōrwa, imitamana y’amasufe ijererenze amabara, n’amasandugu yabājwe mu masederi arimw’ imyambaro y’igiciro kinini, atekejwe ibitsibo vy’imigozi; ivyo vyari mu bidandazwa vyawe.

²⁵Amato y’i Tarushishi yaseha ibidandazwa vyawe: nuk’ uranengesera, ugira uburemerezi uri hagati mw idamba.

²⁶Abasoza bawe bagushikanye mu mazi menshi: umuyaga uvuye i burasirazuba ugusābiriza mw idamba mu kiyaga.

²⁷Ubutunzi bgawe, n’ ibishōrano vyawe, n’ibidandazwa vyawe, n’abasoza bawe, n’abagutumbereza nk’ubgato, n’abahomyi bawe b’imiguma, n’abakudandariza ibidandazwa vyawe, n’abahizi bawe bose bari muri wewe, mbere n’abanyabgato bawe bose bari hagati muri wewe, bizodobera mw idamba mu kiyaga ku musi wo kugesezwa kwawe.

²⁸Imihana izohindishwa agashitsi n’urwamo rw’akāyaga k’abatumbereza bawe.

²⁹N’abakoresha ingafe bose n’ abasoza n’abatumbereza ubgato bose bo mu kiyaga bazokwururuka bave mu mato yabo, bahagarare i musozi;

³⁰bazorenza amajwi bakuririra, baboroge cane, biyorere imikungugu ku mitwe, bikumbagaze mu minyota:

³¹kandi bazokwimosha inkomvorera kubgawe, bakenyere amagunira, bakuririre batuntuye mu mitima baboroga cane.

³²Mu maborogo yabo bazogucurira intimba, bajoje, bati Ni hehe hahwanye n’i Tiro, hakamera nk’iki gisagara kidobejwe hagati mu kiyaga?

³³Hamwe ibishōrano vyawe vyahora biza bivuye mu kiyaga, wahāza amahanga menshi; watungisha abami bo mw isi ibitayega vy’ubutunzi bgawe n’ivy’ ibidandazwa vyawe.

³⁴Igihe ikiyaga cagusāvya, ukadobera i bgina mu mazi, ibidandazwa vyawe n’abanyabgato bawe bose vyadoberanye nawe.

³⁵Ababa ku kiyaga bose baragutangariye, n’abami babo bafashwe n’ubgoba bginshi, mu nyonga habo harasuherewe.

³⁶Abadandaza bo mu mahanga bakuvuzakw agahwa; wahindutse agaterabgoba, kandi ntuzosubira kubah’ ukundi.