Read Bibliya Yera 1951 EZEKIYELI 28 Bible Online

EZEKIYELI 28 - Bibliya Yera 1951 bible

EZEKIYELI 28

¹Ijambo ry’Uhoraho ryongera kunzako,

²riti Mwana w’umuntu, barira segaba w’i Tiro, ut’ Uku ni k’Umwami Uhoraho agize, at’ Umutima wawe ko wishize hejuru, kand’ ukavuga, ng’ ur’ Imana, ng’ uvyagiye ku ntebe y’Imana hagati mu kiyaga; yamar’ ur’ umuntu buntu, ntur’ Imana, naho mu mutima wawe wigereranya na yo;

³ni ko ga! Urusha Daniyeli ubgenge, nta gihishijwe uyoberwa!

⁴Ubgenge bgawe no kumenya kwawe vyaguhesheje ubutunzi, vyatumye urunda izahabu n’ifeza mu bubīko bgawe;

⁵ubgenge bgawe bginshi n’ubudandaza bgawe vyatumye ugwiza ubutunzi, maz’ ubgo butunzi bgawe bgateye umutima wawe kwishira hejuru.

⁶Nuko rero, uku ni k’Umwami Uhoraho agize, ati Ko wagereranije umutima wawe n’umutima w’Imana,

⁷nuko nanje ngira ngutēze abantu b’akavantara b’agaterabgoba bo mu mahanga, basokore inkota zabo ngo barwanye ubgiza bg’ubgenge bgawe, bafutanye igitinyiro cawe.

⁸Bazokumanura bakurokeze muri rwa rwobo; kand’ uzopfa urupfu rw’ abaguye mw idamba mu kiyaga.

⁹Mbeg’ uzosubira kuvugira imbere y’ūkwica ng’ ur’ Imana? Ushima uzoba ur’ umuntu buntu, ntuzoba ur’ Imana, ushitse mu maboko y’ ūgusogota!

¹⁰Uzopfa urupfu rw’abatākebge wishwe n’amaboko y’abanyamahanga; kukw ari jewe mbivuze, ni k’Umwami Uhoraho agize.

¹¹Ijambo ry’Uhoraho ryongera kunzako,

¹²riti Mwana w’umuntu, cura intimba uririre umwami w’i Tiro, umubgire, ut’ Uku ni k’ Umwami Uhoraho agize, ati Ni wewe war’ akaminuza ka vyose, wuzuye ubgenge, ukaba mwiza vy’agahore.

¹³Wari muri Edeni, mw itongo ry’Imana; wisakayek’ utubuyenge twose tw’igiciro kinini, twitwa odemu na pitida na yahalomu na tarushishi na shohamu na yasipi na safiro na nofekina na bareketi, bo n’izahabu: ubuhanga bgo kubāza udushako tw’ingoma n’imyironge bgar’ i wawe; vyari vyarateguwe umusi waremwako.

¹⁴War’ umukerubi usīzwe amavuta, ushānje amababa: kandi nagushizeho, uba ku musozi wera w’Imana; wacuragiza hagati y’ amabuye yaka umuriro.

¹⁵War’ agahore mu ngeso zawe zose uhereye umusi waremeweko, gushitsa igihe ibigabitanyo vyakubonetseko.

¹⁶Ibitayega vy’ibidandazwa vyawe vyatumye wuzura umuryano, maz’ uracumura: ni co catumye nguhinda nk’igihumane, nkagukūra ku musozi w’Imana; narakugesheje, yewe mukerubi ushānje amababa, ngukūra hagati ya ya mabuye yaka umuriro.

¹⁷Ubgiza bgawe ni bgo bgateye umutima wawe kwishira hejuru, igitinyiro cawe ni co cononnye ubgenge bgawe; ngutsinze hasi, nkurambitse imbere y’abami ng’ubabere akabarore.

¹⁸Kubg’ isinzi ry’ ibicumuro vyawe n’ubugunge bg’ ukudandaza kwawe, wahumanije ahēra hawe; ni co catumye ntuma umuriro uvuye muri wewe ukuyigiza, nkakugira umunyota urunze hasi imbere y’abo wabereye akabarore.

¹⁹Abakuzi bose bo mu mahanga bazogutangarira: wahindutse agaterabgoba, kandi ntuzosubira kubah’ ukundi.

²⁰Maz’ ijambo ry’Uhoraho rinzako,

²¹riti Mwana w’umuntu, tungīra ijisho ryawe i Sidoni, uhabūrire,

²²ut’ Uku ni k’Umwami Uhoraho agize, ati Nzohigūra nawe, ewe Sidoni, nzoshirwa hejuru hagati muri wewe: maze bazomenya yuko nd’ Uhoraho, igihe nzoba nshikije iteka mpaciriyeko, nkiyerekana muri bo ko nd’ Uwera.

²³Kuko nzoharekurira ikīza, nkuzuza ibitenga vy’amaraso mu nzira zaho; kand’ abakomeretse bazogwa hagati muri ho, bishwe n’inkota ihateye impande zose; maze bazomenya yuko jewe nd’ Uhoraho.

²⁴Kand’ ab’ inzu ya Isirayeli ntibazokwongera kugira umukere ubahanda, cank’ umubambangwe ubasāsāta mu babakikije bose, bāhora babagirira nabi; maze bazomenya yuko jewe nd’ Umwami Uhoraho.

²⁵Uku ni k’Umwami Uhoraho agize, at’ Igihe nzoba mpejeje gukoranya ab’ inzu ya Isirayeli, mbakūye mu mahanga aho bāri barasābagiriye, nkiyerekana muri bo ko nd’ Uwera imbere y’abanyamahanga, ni ho bazoshinga ibande mu gihugu cabo, ico nahaye umusavyi wanje Yakobo.

²⁶Bazohashinga ibande ata nkomanzi; mbere bazokwubaka amazu, batere n’inzabibu, bibere ngaho ata nkomanzi, igihe nzoba nshikije iteka nciriye ku babagirira nabi babakikije bose; maze bazomenya yuko jewe nd’ Uhoraho Imana yabo.