Read Bibliya Yera 1951 EZEKIYELI 29 Bible Online

EZEKIYELI 29 - Bibliya Yera 1951 bible

EZEKIYELI 29

¹Mu mwaka w’icumi, mu kwezi kw’icumi, ku musi ugira icumi na kabiri w’ukwo kwezi, ijambo ry’Uhoraho ryanjeko,

²riti Mwana w’umuntu, tungīra ijisho ryawe Farawo umwami wa Egiputa, umubūrire, ubūrire na Egiputa hose:

³uvuge, ut’ Uku ni k’Umwami Uhoraho agize, at’ Ehe nzohigūra nawe, ewe Farawo mwami wa Egiputa, wa ngona ihambaye, yigaramangira hagati y’inzūzi zayo, wagize ng’ Uruzi rwawe n’urwawe bgite, kandi ngo Ni wewe warwiremeye ubgawe.

⁴Ehe ngira nshire igera mu mibangabanga yawe, ntume amafi yo mu nzūzi zawe amatana n’ibigaragamba vyawe; kandi nzokuroba ngukūre mu nzūzi zawe, n’amafi yose yo mu nzūzi zawe amatanye n’ibigaragamba vyawe.

⁵Kandi nzogushiburira mu bugaragwa, mwe n’amafi yose yo mu nzūzi zawe: uzogwa mu gahinga ka sabaderi; ntuzoruha unobga canke ngo wēgeranywe; naragutanze ng’ ube ivyo kurya vy’ibikōko vyo kw isi n’ibisīga vyo mu kirēre.

⁶Maz’ ababa muri Egiputa bose bazomenya yuko nd’Uhoraho; kuko wabereye inzu ya Isirayeli inkoni y’ irenga.

⁷Igihe bakwifadikiza mu kuboko waravunitse, utobekeranya ibitugu vyabo vyose: ngo bakwishimikize urakenyuka, utuma imikinya yabo yose itetera.

⁸Nuko rero, uku ni k’Umwami Uhoraho agize, at’ Ehe ngira ngutērēre inkota, nkuranduremw’ abantu n’ ibitungano.

⁹Kand’ igihugu ca Egiputa kizohinduka amatongo n’ imisaka: maze bazomenya yuko nd’ Uhoraho. Ko wavuze ng’ Uruzi n’urwawe, ngo Ni wewe waruremye;

¹⁰nuko rero, rāba, tuzohigūra, mwe n’inzūzi zawe, kand’ igihugu ca Egiputa nzogihindura imisaka vyeruye n’ amatongo, uhereye ku munara w’i Sevene ugashitsa ku rubibe rwo muri Etiyopiya.

¹¹Nta kirenge c’umuntu kizoba kikihahita, cank’ urwara rw’igitungwa, kandi hazomara imyaka mirongwine ata kikihaba.

¹²Kandi nzohindura igihugu ca Egiputa amatongo hagati y’ibindi bihugu vyacitse amatongo, n’ibisagara vyaho biharūwe mu bindi bisagara vyacitse imisaka, bizoba amatongo kumara imyaka mirongwine: kand’ Abanyegiputa nzobasābagiriza mu yandi mahanga, mbashwiragirize mu bindi bihugu.

¹³Kuk’ ukw ari k’Umwami Uhoraho agize, at’ Imyaka mirongwine ni yashira, nzokoranya Abanyegiputa mbakūre mu mahanga iyo bāsābagirijwe;

¹⁴kandi nzotuma Abanyegiputa bahindukira, bave mu ngoyi zabo, mbasubize mu gihugu c’i Patirosi, ari co c’amāmo yabo; maze bazohagirira ubgami bg’inkēngērwa.

¹⁵Buzoba ubgami bukēngēretse hanyuma y’ubundi bgose, kandi nta ho bazokwongera kwishira hejuru ku yandi mahanga: nzobahindura inkehwa, kugira ngo ntibaze basubire kuganza ayandi mahanga ukundi.

¹⁶Kandi ntibazokwongera kubera ab’ inzu ya Isirayeli ivyizigiro, ngo batume ibigabitanyo vyibukwa vy’igihe bābīsunga: maze bazomenya yuko nd’ Umwami Uhoraho.

¹⁷Maze mu mwaka wa mirongwibiri n’indwi mu kwezi kwa mbere, ku musi wa mbere w’ukwo kwezi, ijambo ry’Uhoraho ryanjeko,

¹⁸riti Mwana w’umuntu, Nebukadineza, umwami w’i Babuloni, yakoresheje ingabo ziwe igikorwa gikomeye aho yatera i Tiro: imitwe yazo yose yatobotse ubuhanza, no ku rutugu hose haramyoka: yamara nta ngororano yabonye, cank’ ingabo ziwe, mu vy’i Tiro, kubg’ igikorwa gikomeye yakoze, aho yahatera.

¹⁹Nuko rero, uku ni k’Umwami Uhoraho agize, at’ Eh’ igihugu ca Egiputa ngira nkigomorere Nebukadineza umwami w’i Babuloni; azojana abantu baho b’isinzi ar’ inyagano, ajane n’iminyago yaho n’ isahu yaho; ivyo bizoba ingororano z’ingabo ziwe.

²⁰Ndamuhaye igihugu ca Egiputa kw ingororano c’ivyo yankoreye, kukw ari jewe bākoreye, ni k’Umwami Uhoraho agize.

²¹Kur’ uwo musi nzomereza ab’ inzu ya Isirayeli ihembe; nawe nzoguha guteranurira akanwa hagati muri bo; maze bazomenya yuko nd’ Uhoraho.