Read Bibliya Yera 1951 EZEKIYELI 3 Bible Online

EZEKIYELI 3 - Bibliya Yera 1951 bible

EZEKIYELI 3

¹Nukw arambarira, ati Mwana w’umuntu, ico ubonye ukirye; urye uwo muzingo, uheze ugende, ubarire inzu ya Isirayeli.

²Nuko nasamika akanwa, angaburira uwo muzingo.

³Arambarira, ati Mwana w’umuntu, hāza inda yawe, n’amara yawe uyuzuze uyu muzingo nguhaye. Nuko ndawurya; mu kanwa unsosera nk’ubūki.

⁴Maz’ arambgira, ati Genda, ushikīre ab’ inzu ya Isirayeli, ubabarire amajambo yanje.

⁵Kuko ntagutumye kw ihanga ry’abavuga imvugo itumvikana n’ururimi rugoye, ariko ni ku b’inzu ya Isirayeli;

⁶si ku mahanga menshi avuga imvugo zitumvikana n’indimi zigoye, abo mudashobora kwumvikana mu majambo. N’ukuri, iyaba ari bo ngutumyeko, bo bokwumviye.

⁷Arikw inzu ya Isirayeli ntizokwumvira, kuko nanje banse kunyumvira: kukw ab’ inzu ya Isirayeli bose mu ruhanga rwabo ar’abanyakadāda, bikomantaje imitima.

⁸Ehe mpinduye mu maso hawe ngo hakomere hahangare mu maso habo, n’uruhanga rwawe ngo rukomere ruhangare impanga zabo.

⁹Uruhanga rwawe ndaruhaye gukomera nk’intosho rurushe isare: ntuz’ ubatinye canke ng’ urandurwe umutima n’igitsure cabo, nah’ ar’ inzu y’abagarariji.

¹⁰Maz’ arongera arambarira, ati Mwana w’umuntu, amajambo yanje yose nzogenda nkubarira uz’ uyākīre mu mutima wawe, uyumvishe n’amatwi yawe.

¹¹Uheze ugende, ushikīre abo mu bgoko bganyu b’abanyagano, uvugane na bo ubabgire, bovyumva, batovyumva, ut’ Uku ni k’Umwami Uhoraho agize.

¹²Maze Mpwemu aranterura, numva inyuma yanje ijwi rihinda cane, rivuga, ng’ Ubgiza bg’ Uhoraho bushemagirizwe ahantu hiwe.

¹³Kandi numva uguhinda kw’amababa ya vya binyabugingo yagenda arakomanako, n’uguhinda kwa ya makurudumu yar’ i ruhande yavyo, mbere kwar’ uguhinda kw’ugusūma gukomeye.

¹⁴Nuko Mpwemu aranterura, aranjana; ngenda nshavuye, nitonganya; arik’ ukuboko kw’Uhoraho kwari kunshikamiye.

¹⁵Maze nshikīra ba banyagano i Telabibu, bāba ku ruzi Kebari, nshika aho hantu bāba; mpamara imisi ndwi numiwe nicaye hagati yabo.

¹⁶Nukw iyo misi ndwi ishize, ijambo ry’Uhoraho rinzako,

¹⁷riti Mwana w’umuntu, nkugize umushibamyi w’inzu ya Isirayeli; nuko wumve ijambo riva mu kanwa kanje, ubammenyeshereze ivyo mbabūrira.

¹⁸Ni nabgira umunyakibi, nti Ntuzobura gupfa: nawe ugaheza ntumubūrire, canke ng’ ugire ico uvuga co kubūrira umunyakibi ngw ave mu nzira yiwe mbi, ng’ ukize ubugingo bgiwe, uwo munyakibi azopfira mu bigabitanyo vyiwe; arikw amaraso yiwe nzoyakuronderako.

¹⁹Ariko ni wabūrira umunyakibi, ntahindukire ngw areke ibibi vyiwe, canke ngw ave mu nzira yiwe mbi, azopfira mu bigabitanyo vyiwe; ariko weho uzoba urokoye ubugingo bgawe.

²⁰Ikindi, umugororotsi ni yahindukira akareka ubugororotsi bgiwe, agakora ivy’ ukugabitanya, nanje ngashira igitsitaza imbere yiwe, azopfa: kuk’ utāmubūriye, azopfira mu caha ciwe; kand’ ibikorwa vyiwe bigororotse yakoze ntazobiharūrwako, arikw amaraso yiwe nzoyakuronderako.

²¹Yamara ni wabūrira umugororotsi, uwo mugororotsi ngo yoye gukora icaha, na we ntagikore nyene, ntazobura kubaho, kuko yemeye kubūrirwa; kandi nawe uzoba urokoye ubugingo bgawe.

²²Aho hantu nyene ni ho ukuboko kw’Uhoraho kwanziyeko; arambarira, ati Va hasi, uje mu kiyaya, iyo ni ho nja kubonanira nawe.

²³Nca mva hasi nja mu kiyaya; mbona ubgiza bg’Uhoraho buhahagaraye, bumeze nk’ubgiza naboneye ku ruzi Kebari: maze nikubita hasi nubamye.

²⁴Nuko Mpwemu anyinjiramwo, ampagarika n’ibirenge vyanje; avugana nanje, arambarira, ati Genda wiyugaranire mu nzu yawe.

²⁵Ariko rero, mwana w’umuntu, bazoguta mu migozi, bayikuboheshe, nawe ntuzobona uk’ usohoka ng’ uje muri bo.

²⁶Nzotuma ururimi rwawe rufatana n’uruhekenyero, ugobge ururimi, woye kubabera imbūri; kukw ar’inzu y’ abagarariji.

²⁷Arikw igihe nzovugana nawe, nzogobotora akanwa kawe, nawe uz’ uheze ubabarire, ut’ Uku ni k’Umwami Uhoraho agize, ng’ Ūgomba kwumva ni yumve, ūtabigomba n’areke: kukw ar’ inzu y’abagarariji.