Read Bibliya Yera 1951 EZEKIYELI 30 Bible Online

EZEKIYELI 30 - Bibliya Yera 1951 bible

EZEKIYELI 30

¹Ijambo ry’Uhoraho ryongera kunzako,

²riti Mwana w’umuntu, vuga ubūre, ut’ Uku ni k’Umwami Uhoraho agize, ati Ni muboroge, muti Yō! Ewe wa musi wo kuzobona ibara!

³Koko uwo musi uri hafi, mber’ umusi w’Uhoraho uri hafi, n’umusi wo gufurangana; igihe c’abanyamahanga kizoba kigeze.

⁴Inkota izorekurirwa kuri Egiputa, ubusinzikare buzoba muri Etiyopiya, igihe abariritswe bazohindikirana muri Egiputa; bazokūrah’ abantu baho b’isinzi, kand’ amatanguriro yaho azohomvagurwa.

⁵Etiyopiya n’i Puti n’i Ludi, n’amahanga yose y’ikivange, n’i Kubi, n’abo mu gihugu gifatanije na bo, bazogwa hamwe bariritswe n’inkota.

⁶Uku ni k’Uhoraho agize, at’ Abahagarikiye Egiputa na bo bazogwa, kand’ ubgibone buterwa n’ ububasha bgaho buzocishwa bugufi; bazogwa bariritswe n’inkota, uhereye i Migidoli ugashitsa i Sevene, ni k’Umwami Uhoraho agize.

⁷Bazosigara mu matongo hagati y’ibindi bihugu vyacitse amatongo, n’ibisagara vyaho bizoharūrwa hagati y’ibindi bisagara vyacitse imisaka.

⁸Maze bazomenya yuko nd’Uhoraho, igihe nzoba mmaze kwanda umuriro Egiputa, abatabazi babo bahonnye.

⁹Kur’ uwo musi intumwa zizova imbere yanje zigende mu māto, ngo zibe agacavutu ku Banyetiyopiya bībera ngaho ata co binona: hazoba kwembemba muri bo, nk’ ukwabaye ku musi wo muri Egiputa; kand’ ehe biraje.

¹⁰Uku ni k’Umwami Uhoraho agize, at’ Ikindi, nzoherengeteza isinzi ry’abantu bo muri Egiputa, mbikoresheje ukuboko kwa Nebukadineza, umwami w’i Babuloni.

¹¹We n’abantu biwe b’agaterabgoba bo mu mahanga, bazozanwa no kugeseza igihugu; bazosokōrera inkota zabo Egiputa, buzuze igihugu imivyimba.

¹²Inzūzi nzozikamya, igihugu nkigabure mu maboko y’abantu b’abanyakibi; kand’ igihugu n’ibirimwo vyose nzogihindura amatongo nkoresheje amaboko y’abantu b’akavantara: ni jewe, Uhoraho, mbivuze.

¹³Uku ni k’Umwami Uhoraho agize, ati N’ibigirwamana na vyo nzobihonnya, kandi nzoherengeteza ibishushanyo muri Nofu; nta muganwa azosubira kuboneka mu gihugu ca Egiputa; kandi nzoshira ibiteye ubgoba mu gihugu ca Egiputa.

¹⁴I Patirosi nzohahindura amatongo, nande umuriro i Sowani, kandi nzoshitsa amateka nciriye ku hitwa No.

¹⁵Nzorekurira uburake bganje kuri Sini, ari co gihome ca Egiputa; kand’ abantu b’isinzi bo muri No nzobarandura.

¹⁶Na Egiputa nzohanda umuriro; muri Sini hazoba kwembemba kwinshi, no muri No hazosangangurwa; kand’ i Nofu hazotsindwa n’abansi ku murango w’amaminangohe.

¹⁷Imisore yo muri Aveni n’iy’ i Pibeseti izoririkwa n’inkota: kand’ abo mur’ ivyo bisagara bazojanwa ar’ inyagano.

¹⁸I Tahapanesi hazoba ubgirakabiri, igihe nzohavunagurira ingōgo Egiputa hahatwarisha igitugu, n’ubgibone buterwa n’ ububasha bgaho buzoshirira aho nyene; igicu kizohubikiza, kand’ abakobga baho bazojanwa ar’ inyagano.

¹⁹Uko ni ko nzoshitsa amateka nciriye Egiputa; maze bazomenya yuko nd’ Uhoraho.

²⁰Nuko mu mwaka w’icumi na rimwe, mu kwezi kwa mbere, ku musi ugira indwi w’ukwo kwezi, ijambo ry’Uhoraho ryanjeko,

²¹riti Mwana w’umuntu, navunnye ukuboko kwa Farawo, umwami wa Egiputa; ntikwarushe gutubikwa canke ngo gusomōzwe imiti, ntikwanashizwekw igitambara co kugutubika ngo gukire, kubone kuzofata inkota.

²²Nuko rero, uku ni k’Umwami Uhoraho agize, at’ Ehe nzohigūra na Farawo umwami wa Egiputa, kandi nzomuvuna amaboko yompi, ukugikomeye bo n’ukwari kwavunitse; kandi nzotuma inkota yari mu kuboko kwiwe imwiyaka ikoroke.

²³Abanyegiputa nzobasābagiriza mu mahanga, mbashwiragirize mu bihugu.

²⁴Maz’ amaboko y’ umwami w’i Babuloni nzoyakomeza, inkota yanje ndayishire mu kuboko kwiwe; arikw amaboko ya Farawo nzoyavuna, kand’ azonihira imbere yiwe umuniho nk’uw’ ūkomeretse uruguma rw’intakira.

²⁵Nuko nzokomeza amaboko y’ umwami w’i Babuloni, arikw aya Farawo azodendebuka; maze bazomenya yuko nd’ Uhoraho, igihe nzoshira inkota yanje mu kuboko kw’umwami w’i Babuloni, na we akayibāngurira ku gihugu ca Egiputa.

²⁶Kand’ Abanyegiputa nzobasābagiriza mu mahanga, mbashwiragirize mu bihugu; maze bazomenya yuko nd’ Uhoraho.