Read Bibliya Yera 1951 EZEKIYELI 31 Bible Online

EZEKIYELI 31 - Bibliya Yera 1951 bible

EZEKIYELI 31

¹Maze mu mwaka w’icumi na rimwe, mu kwezi kwa gatatu, ku musi wa mbere w’ukwo kwezi, ijambo ry’Uhoraho ryanjeko,

²riti Mwana w’umuntu, barira Farawo umwami wa Egiputa, n’ ishengero ryiwe, uti Ni nde munganya kuba agahambaye?

³Ehe rāba, Umwashuri yari nk’igiti c’isederi c’i Lebanoni c’amashami meza, c’igitūtu kinini, kandi c’ inganzamarumpu, ubushorishori bgaco bgashika mu bicu.

⁴Catungwa n’amazi, amazi menshi yaragikuza: inzūzi zatembera irya n’ino y’aho catewe, zikarekurira imigende yazo ku biti vyose vyo mu gahinga.

⁵Ni co catumye uburebure bgaco bushirwa hejuru y’ibiti vyose vyo mu gahinga; n’ amasango yaco agatagarara, n’ amashami yaco agashibuka kubgo kugira amazi menshi ayakuza.

⁶N’ibiguruka vyose vyo mu kirēre bikārika mu mashami yaco; n’ ibikōko vyose vyo mw ishamba bikavyarira ivyana vyavyo musi y’amashami yaco, n’amahanga yose ahambaye akibera mu gitūtu caco.

⁷Uko ni ko cabaye ciza mu kuba agahambaye, no mu gushibuka kw’amashami yaco: kukw imizi yaco yar’ ishōreye mu mazi menshi.

⁸Amasederi yandi yo mw itongo ry’Imana nta yashobora kucababa; n’imiberoshi ntiyaruha ingana n’ amasango yaco, cank’ imyarumoni ngw ihwane n’amashami yaco; kandi nta giti co mw itongo ry’ Imana cari gihwanije na co ubgiza.

⁹Nakigize ciza kubg’ isinzi ry’amashami yaco, bitume ibiti vyose vyo muri Edeni, vyari mw itongo ry’Imana, bikigirira ishari.

¹⁰Nuko rero, uku ni k’Umwami Uhoraho agize, ati Ko cabaye kirekire, ubushorishori bgaco bugashika mu bicu, kand’ uburebure bgaco bugatuma umutima waco wishira hejuru:

¹¹nuko rero nzokigabura mu kuboko kw’umuhizi wo mu mahanga; azokigira ukw agomba; nacirukanye ngihōye ivyaha vyaco.

¹²Kand’ abantu b’akavantara b’agaterabgoba bo mu mahanga baragiciye, bagisiga ngaho: amashami yaco asanzara ku misozi no mu myonga yose, n’ amasango yaco avunagurikira ku migende y’amazi yose yo mu gihugu; kand’ amahanga yose yo mw isi ava mu gitūtu caco agisiga ngaho.

¹³Ibiguruka vyose vyo mu kirēre bizohundara kuri co aho cahomvagurikiye, n’ibikōko vyose vyo mw ishamba bizokwibera ku mashami yaco:

¹⁴kugira ngo hoye kugira igiti na kimwe co ku nkengēra y’amazi cishira hejuru kubg’ uburebure bgaco ubgaco, canke ngo gitume ubushorishori bgaco bushika mu bicu, canke ngo hagire ibihambaye vyo muri vyo bihagarara vyishimiye uburebure bgavyo, ari vyo vyose bitungwa n’amazi: kuko vyose vyatanzwe ngo bipfe, bije i bgina i kuzimu, bifadikanijwe n’abantu buntu, n’ abamanuka baja muri rwa rwobo.

¹⁵Uku ni k’Umwami Uhoraho agize, at’ Umusi camanuka kija i kuzimu, nageze ko kiborogerwa; natumye mw idamba hitwikira kubgaco, mbuza inzūzi zaho gutemba, n’amazi menshi arahagarikwa; ntuma i Lebanoni hakigandarira, ibiti vyose vyo mu gahinga bigakabirana kubgaco.

¹⁶Natumye amahanga ashirwa mu gatengo no kwumva ugusenyerana kwaco, igihe nagishiburira i kuzimu hamwe n’abamanuka baja muri rwa rwobo; maz’ ibiti vyose vyo muri Edeni, n’ivyateretswe bisumba ibindi ubgiza vy’i Lebanoni, mber’ ibitungwa n’amazi vyose, bimarirwa umubabaro aho bir’ i kuzimu.

¹⁷Na vyo bimanukana na co i kuzimu, bihamvya abāriritswe n’inkota; mbere ni bo bari bakibereye ububasha, bakāma bibera mu gitūtu caco hagati mu mahanga.

¹⁸Mu biti vyo muri Edeni n’ ikihe munganya kugira icubahiro no kuba agahambaye? Yamar’ uzomanukanwa hamwe n’ibiti vyo muri Edeni ushike i kuzimu: uzoryama hagati mu batākebge, hamwe n’abāriritswe n’inkota. Uwo ni we Farawo n’ishengero ryiwe ryose, ni k’Umwami Uhoraho agize.