Read Bibliya Yera 1951 EZEKIYELI 32 Bible Online

EZEKIYELI 32 - Bibliya Yera 1951 bible

EZEKIYELI 32

¹Maze mu mwaka w’icumi na kabiri, mu kwezi kw’ icumi na kabiri, ku musi wa mbere w’ukwo kwezi, ijambo ry’Uhoraho ryanjeko,

²riti Mwana w’umuntu, cura intimba uririre Farawo umwami wa Egiputa, umubgire, uti War’ ūhwanye n’umugunza w’ intambge yo mu mahanga; yamar’ umeze nk’ingona iri mu kiyaga; widimbagura mu nzūzi zawe, amazi uyatobesha ibirenge, uca iyondoyondo inzūzi zabo.

³Uku ni k’Umwami Uhoraho agize, ati Nzoguhwikiza urusenga rwanje, ndi kumwe n’igitero c’abanyamahanga benshi; kandi bazogukwegesha urusenga rwanje.

⁴Kandi nzogusiga ngaho i musozi, ngushiburire mu gahinga ka sabaderi, kandi nzotuma ibiguruka vyose vyo mu kirēre biguhundarako, n’ ibikōko vyo kw isi yose nzobihāza inyama zawe.

⁵Mbere nzokwiragiza inyama zawe ku misozi, n’ imyonga ndayuzuze ubutumbazi bgawe.

⁶Kand’ igihugu ugenda wogamwo nzogitotesha amaraso yawe gushitsa no ku misozi miremire; n’ibihoro vy’imigezi bizokwuzura wewe.

⁷Igihe nzokudorongeza, nzotwikira ijuru, n’ inyenyeri ntume zicura umwiza; izuba nzoritwikiriza igicu, kand’ ukwezi ntikuzoba kucaka umuco wakwo.

⁸Imuri zose zaka kw ijuru nzotuma zicura umwiza hejuru yawe, igihugu cawe ncubikizek’ umwiza, ni k’Umwami Uhoraho agize.

⁹Nzotuma imitima y’amahanga menshi ihagarara igihe nzokwiza ivy’ ukugesera kwawe mu mahanga, gushitsa no mu bihugu utigeze kumenya.

¹⁰Mbere nzotuma amoko menshi agutangarira, kand’ abami babo bazofatwa n’ubgoba bginshi kubgawe, igihe nzorabagiriza inkota yanje imbere yabo; bazohinda agashitsi urudaca, umuntu wese aririre amagara yiwe, ku musi wo kugesezwa kwawe.

¹¹Kuk’ ukw ari k’Umwami Uhoraho agize, at’ Inkota y’umwami w’i Babuloni izogushikako.

¹²Nzotuma ishengero ryawe riririkwa n’inkota z’ abahizi; abo bose ni bo b’agaterabgoba bo mu mahanga. Ubgibone bga Egiputa bazobuhindura ubusa, n’ishengero ryaho ryose rizohona.

¹³Kandi nzohonnya ibitungwa vyaho vyose bir’ i ruhande y’amazi menshi; kandi nta kirenge c’umuntu kizokwongera kuyatoba, n’inzāra z’ibitungwa ntizizoba zikiyatoba.

¹⁴Ni ho nzotuma amazi yaho atonganuka, ntume n’inzūzi zaho zitemba nk’ amavuta ya elayo, ni k’Umwami Uhoraho agize.

¹⁵Igihe nzohindura igihugu ca Egiputa amatongo n’imisaka, igihugu kitakirimw’ ivyahora bicuzuye, nishe abākibamwo bose, ni ho bazomenya yuko nd’ Uhoraho.

¹⁶Ako ni ko gacurantimba bazocura; abakobga b’amahanga bazocura intimba bartyo: ni ko bazocurira intimba Egiputa n’ishengero ryaho ryose, ni k’Umwami Uhoraho agize.

¹⁷Maze mur’ uwo mwaka w’ icumi na kabiri nyene, ku musi ugira icumi na gatanu w’ukwezi, ijambo ry’Uhoraho rinzako,

¹⁸riti Mwana w’umuntu, borogera ishengero ryo muri Egiputa, urikororane n’abakobga b’amahanga ya rurangiranwa, gushitsa i bgina i kuzimu, hamwe n’abamanuka baja muri rwa rwobo.

¹⁹Uti Ni nde urusha ubgiza? Manuka uryamikwe mu batākebge.

²⁰Bazohindikirana hagati y’abicishijwe inkota: Egiputa hāgaburiwe inkota: ni muhakwegane n’ishengero ryaho ryose.

²¹Abanyenkomezi bo mu bahizi bazovugana na bo bar’ epfo iyo i kuzimu, hamwe n’ abāhatabara; bat’ Abatākebge bāramanutse, barambaraye badakoma, bicishijwe inkota.

²²Uwa Ashuri ni yo ari, bo n’ ingabo ziwe zose; imva z’abiwe ziramukikije; bose n’abishwe, bahindikiranijwe n’inkota.

²³Imva zabo ziri mu bgigobeko bga rwa rwobo, kand’ ingabo ziwe zikikije imva yiwe: bose n’abishwe, bahindikiranijwe n’inkota, kand’ ari bo bār’ agaterabgoba mw isi y’ abariho.

²⁴Uwa Elamu ni yo ari, bo n’ ishengero ryiwe ryose rikikije imva yiwe: bose n’abishwe, bahindikiranijwe n’inkota, bamanutse batākebge baja i bgina i kuzimu, kand’ ari bo bār’ agaterabgoba mw isi y’abariho, bajanye ibitētērwa vyabo hamwe n’abamanuka baja muri rwa rwobo.

²⁵Bāmwubakiye uburiri hagati y’abishwe ari kumwe n’ishengero ryiwe ryose; imva z’abiwe ziramukikije; abo bose n’abatākebge, bahindikiranijwe n’inkota; kuko bār’ agaterabgoba mw isi y’abariho, kandi bājanye ibitētērwa vyabo hamwe n’abamanuka baja muri rwa rwobo: yashizwe hagati y’abishwe.

²⁶Uw’ i Mesheki n’uw’ i Tubali ni yo bari, bo n’ishengero ryabo ryose; imva z’ababo zirabakikije; bose n’abatākebge, bahindikiranijwe n’inkota, kuko bār’ agaterabgoba mw isi y’abariho.

²⁷Kandi ntibaryamye hamwe n’abahizi bāhindikiranye bo mu batākebge, bāmanukanye i kuzimu n’ibirwanishwa vyabo vy’intambara, bīseguye inkota zabo, ibigabitanyo vyabo biri ku magufa yabo; kuko bār’ agaterabgoba ku bahizi mw isi y’abariho.

²⁸Nawe nyene uzovunagurirwa hagati y’abatākebge, uryame hamwe n’abahindikiranijwe n’inkota.

²⁹Uwa Edomu ni yo ari, n’abami baho n’abaganwa baho bose, bārambitswe hamwe n’abahindikiranijwe n’inkota naho bār’ abahizi; bāryamye hamwe n’abatākebge, bo n’abamanuka baja muri rwa rwobo.

³⁰Abaganwa b’i burārūko ni yo bari bose, n’ab’i Sidoni bose, bāmanukanye n’abishwe; bāratēterewe, naho bār’ agaterabgoba kubg’ ubuhizi bgabo; barambaraye batākebge hamwe n’ abahindikiranijwe n’inkota, bajanye ibitētērwa vyabo hamwe n’ abamanuka baja muri rwa rwobo.

³¹Farawo azobibona, ashire umubabaro w’ishengero ryiwe ryose: Farawo ubgiwe nyene n’ ingabo ziwe zose, bāhindikiranijwe n’inkota, ni k’Umwami Uhoraho agize.

³²Kuko nashize ivy’ agaterabgoba kiwe mw isi y’abariho; na we azorambikwa hagati y’abatākebge, hamwe n’abahindikiranijwe n’inkota, Farawo ubgiwe n’ ishengero ryiwe ryose, ni k’Umwami Uhoraho agize.