Read Bibliya Yera 1951 EZEKIYELI 35 Bible Online

EZEKIYELI 35 - Bibliya Yera 1951 bible

EZEKIYELI 35

¹Ijambo ry’Uhoraho ryongera kunzako,

²riti Mwana w’umuntu, tungīra ijisho ryawe umusozi Seyiri, uwubūrire,

³uwubarire, ut’ Uku ni k’Umwami Uhoraho agize, at’ Ehe nzohigūra nawe, ewe wa musozi Seyiri, kandi ngira nkubangurirek’ ukuboko, nguhindure amatongo n’akajoreza.

⁴Ibisagara vyawe nzobigira imisaka, nawe usigare ur’ amatongo; maz’ uzomenya yuko jewe nd’ Uhoraho.

⁵Ko wāmanye inyankane idahangūra, ukagomorera inkota Abisirayeli ku musi baboneyekw ivyago, mu gihe giherahereza ibigabitanyo vyabo;

⁶nuko rero ndahiye ukubaho kwanje, ni k’Umwami Uhoraho agize, ndakugereye ibitenga vy’amaraso, kand’ amaraso azogukurikirana: k’utanse ibitenga vy’amaraso, nuko rer’ amaraso azogukurikirana.

⁷Uko ni k’umusozi Seyiri nzowuhindura akajoreza n’amatongo; kandi nzowuherengetezak’ uwahaca amaja n’amaza.

⁸Kandi nzokwuzuza imisozi yaho abahindikiranijwe baho: abāriritswe n’inkota bazogwa ku misozi yawe, no mu myonga yawe, no mu migende yawe yose y’amazi.

⁹Nzoguhindura amatongo ibihe bidashira, kand’ ibisagara vyawe ntibizosubira kugira ababibamwo: maze muzomenya yuko jewe nd’ Uhoraho.

¹⁰Ko wagize ngw Ayo mahanga ukw ar’ abiri n’ivyo bihugu ukw ari bibiri bizoba ivyawe, ngo Ni mwe muzovyiganzira; nanje Uhoraho ari yo nari:

¹¹nuko rero ndahiye ukubaho kwanje, ni k’Umwami Uhoraho agize, nzogenza nk’uk’ uburake bgawe buri, bo n’ishari werekanye mu kubanka; kandi nzokwimenyekanisha muri bo, igihe nzogucirakw iteka.

¹²Nuk’ uzomenya yuko jewe, Uhoraho, numvise ibitutsi vyawe vyose watutse imisozi y’i Bgisirayeli, uti Hahindutse amatongo, turahahawe ngo tuharye.

¹³Kandi mwanyihayagijeko n’akanwa kanyu, mumpundakw amagambo yanyu: na vyo nyene naravyumvise.

¹⁴Uku ni k’Umwami Uhoraho agize, at’ Igihe isi yose izoba inezerewe, weho nzoguhindura amatongo.

¹⁵Nk’uko witamvye hejuru y’ishamvu y’inzu ya Isirayeli kukw icitse amatongo, uko ni ko nzokugirira: nawe uzoba amatongo, ewe wa musozi Seyiri, na Edomu hose iyo hava hakagera. Maze bazomenya yuko jewe nd’ Uhoraho.