Read Bibliya Yera 1951 EZEKIYELI 36 Bible Online

EZEKIYELI 36 - Bibliya Yera 1951 bible

EZEKIYELI 36

¹Nuko mwana w’umuntu, menyesha imisozi y’i Bgisirayeli ibizoba, uti Yemwe mwa misozi y’i Bgisirayeli, ni mwumve ijambo ry’Uhoraho.

²Uku ni k’Umwami Uhoraho agize, at’ Umwansi ko yabashinyaguriye, ngw Awa! ngo Ya misozi miremire yamyeho kera izoba iyacu twiganziye:

³nuko rero, shirak’ ubivuge, ut’ Uku ni k’Umwami Uhoraho agize, ati N’ukuri ko babagize amatongo, bakabayongobeza babaturutse impande zose, mukaba inyegu ayandi mahanga yegukiye, mugatorwakw ikineguro n’akanwa k’imvuzi, mugahinduka agatwengo ku bantu;

⁴nuko rero, yemwe misozi y’i Bgisirayeli, ni mwumve ijambo ry’Umwami Uhoraho: Uku ni k’Umwami Uhoraho abarira imisozi n’uturambi, n’imigende y’amazi n’imyonga, n’ahasigaye ar’ amatongo n’ibisagara vyacitse imisaka, bigahinduka inyagano n’ agatwengo ku masigarira y’amahanga abikikije;

⁵mbere, uku ni k’Umwami Uhoraho agize, ati N’ukuri mvuganye ifuhe rimeze nk’umuriro ku vy’ayandi mahanga no ku vy’Abanyedomu bose bīhaye igihugu canje kw inyegu, bari n’ umunezero wuzuye imitima, n’ akagaye kose ko mu mushaha, ngo bagitange gisahurwe.

⁶Kubg’ ivyo, vuga ibizoba ku gihugu c’i Bgisirayeli, ubgire imisozi n’uturambi, n’imigende y’amazi n’ imyonga, ut’ Uku ni k’Umwami Uhoraho agize, ati Rāba, mvuganye ifuhe n’uburake, kuko mwamāramājwe n’amahanga:

⁷ni co gitumye mbimanikiye ukuboko nkarahira, ni jewe Umwami Uhoraho mbivuze, nti N’ukuri, ayo mahanga nyene abakikije, na yo azomāramāzwa.

⁸Ariko mweho, yemwe misozi y’i Bgisirayeli, muzohūrika amashami yanyu, mutengengere ivyo gutunga abantu banje b’Abisirayeli; kuko bagira baze.

⁹Ehe mpagaze mu ruhande rwanyu, ngira mbahindukirire, kandi muzorimwa mubibgeko.

¹⁰Kandi nzobagwizakw abantu, ni bo nzu ya Isirayeli yose iyo bava bakagera; kand’ ibisagara bizogerērwamwo, n’amatongo azokwubakwa.

¹¹Nzobagwizakw abantu n’amatungo, bigwire birondoke: nzotuma musagazwako, mumere nk’ uko mwari mumeze ubga mbere; kandi nzobagirira neza kuruta uko nabagirira ubga mbere: maze muzomenya yuko jewe nd’ Uhoraho.

¹²Mbere nzotuma abantu bagendagenda kuri mwebge, ni bo bantu banje b’Abisirayeli; namwe muzoba ishamvu yabo, mubabere umwandu, kandi nta ho muzosubira kubīcira abana ukundi.

¹³Uku ni k’Umwami Uhoraho agize, ati Ko bababarira, bat’ Ur’ igihugu kimiragura abantu, kigatuma ihanga rikibamwo riba imbura;

¹⁴ni co gituma utazokwongera kumiragura abantu ukundi, canke gutuma ihanga rikubamwo ryongera kuba imbura, ni k’Umwami Uhoraho agize.

¹⁵Kandi sinzokundira agashinyaguro k’abanyamahanga ko wongera kwumva kakugarutseko, cank’ ibitutsi vy’amoko ko bisubira kukuzako, kand’ ihanga rikubamwo ntuzosubira kuritsitaza ukundi, ni k’Umwami Uhoraho agize.

¹⁶Kand’ ijambo ry’Uhoraho ryongera kunzako,

¹⁷riti Mwana w’umuntu, ab’ inzu ya Isirayeli igihe bāba mu gihugu cabo, bācononesha ingeso zabo n’ibikorwa vyabo: ingeso zabo imbere yanje zambereye nk’umugore ari mu miziro.

¹⁸Ni co catumye mbasendanishak’ uburake bganje mbahōye amaraso bāsendanishije mu gihugu, n’uko bācononesheje ibigirwamana vyabo;

¹⁹maze mbasābagiriza mu mahanga, bashwiragirira mu bihugu: nabaciriye urubanza ruhwanye n’ingeso zabo n’ibikorwa vyabo.

²⁰Kandi bamaze gushika mu mahanga bāgiyemwo, bātukishije izina ryanje ryera; kukw abantu bābavuga, ngw Aba n’abantu b’Uhoraho, kandi ngo Bavuye mu gihugu ciwe.

²¹Ariko natinyiriye izina ryanje ryera, iryo ab’ inzu ya Isirayeli batukishije mu mahanga bagiyemwo.

²²Nuko rero, barira ab’ inzu ya Isirayeli, ut’ Uku ni k’ Umwami Uhoraho agize, at’ Ibi simbikora kubganyu, yemwe ab’ inzu ya Isirayeli, ariko ni kubg’ izina ryanje ryera, iryo mwatukishije mu mahanga mwagiyemwo.

²³Kandi nzokwubahiriza izina ryanje rikuru ryatukishijwe mu mahanga, iryo mwatukishije hagati muri yo; nukw amahanga azomenya yuko jewe nd’ Uhoraho, igihe nzokwiyerekanira muri mwebge imbere yayo ko nd’ Uwera, ni k’ Umwami Uhoraho agize.

²⁴Kuko nzobakūra mu mahanga, mbakoranirize hamwe mbakūye mu bihugu vyose, mbajane mu gihugu canyu bgite.

²⁵Kandi nzobamijakw amazi meza, mushire imvyiro: nzoboza imyanda yanyu yose, n’ibigirwamana vyanyu vyose.

²⁶Kandi nzobaha umutima musha, mbashiremw’ impwemu nsha; nzokūra umutima ukomeye nk’ibuye mu mibiri yanyu, mbahe umutima woroshe nk’ inyama.

²⁷Kandi nzobashiramwo Mpwemu wanje, ndabagendeshereze mu vyagezwe vyanje, namwe muzokwitondera amabgirizwa yanje, muyashitse.

²⁸Kandi muzokwibera mu gihugu nahaye ba sogokuruza, mube abantu banje, nanje mbe Imana yanyu.

²⁹Kandi nzobakiza ibibanduza vyose, mbahurumbirize ingano ndazikikimvye, kandi sinzobatēza inzara.

³⁰Nzokikimvya ivyama ku biti biribga, n’uburumbuke mu mirima, kugira ngo mwoye gusubira kuba igitutsi mu mahanga c’uko muhoramw’ inzara.

³¹Ni ho muzokwibukira ingeso zanyu mbi, n’ibikorwa vyanyu bitari vyiza; kandi muzokwiyanka urunuka, kubg’ ibigabitanyo vyanyu n’ibizira mwakoze.

³²Ivyo simbikora kubganyu, mubimenye, ni k’Umwami Uhoraho agize; mutēterezwe, mumāramāzwe n’ ingeso zanyu, yemwe ab’ inzu ya Isirayeli.

³³Uku ni k’Umwami Uhoraho agize, at’ Umusi nzoboza ibigabitanyo vyanyu vyose nzotuma ibisagara bigerērwamwo, n’ amatongo yubakwe.

³⁴Kand’ igihugu cār’ imisaka kizorimwa, naho cābonekera abāhaca bose ar’ imisaka.

³⁵Bazovuga, bat’ Iki gihugu cahoze ar’ imisaka gihindutse nka rya tongo ryari muri Edeni; kand’ ibisagara vyari bicitse amatongo n’imisaka bigasanganguka, none bikikijwe inzitiro, bibamw’ abantu.

³⁶Maz’ amahanga azoba akibakikije azomenya yukw ari jewe Uhoraho nubatse ahāri hārasenyutse, ngateragira imbuto ahāri hārasivye: ni jewe Uhoraho mbivuze, kandi nzobishitsa.

³⁷Uku ni k’Umwami Uhoraho agize, at’ Ab’ inzu ya Isirayeli bazosubira kunsigūza ivyo, kugira ngo mbibakorere: nzobagwiriza abantu nk’umukuku.

³⁸Ibisagara vyari vyarahomvotse bizokwuzuramw’ abantu nk’imikuku, bameze nk’imikuku y’ibimazi vyo gutangirwa i Yerusalemu mu misi mikuru yashinzwe: maze bazomenya yuko jewe nd’ Uhoraho.