Read Bibliya Yera 1951 EZEKIYELI 37 Bible Online

EZEKIYELI 37 - Bibliya Yera 1951 bible

EZEKIYELI 37

¹Ukuboko kw’Uhoraho kwanjeko, ansohokana ndi muri Mpwemu wiwe, anshira hagati mu kiyaya cuzuye amagufa,

²ancisha irya n’ino yayo: maze mbona ari menshi cane mur’ ico kiyaya; kandi yari yumye rwose.

³Maz’ arambaza, ati Mwana w’umuntu, mbeg’ aya magufa yoshobora kuba mazima? Ndishura, nti Mwami Uhoraho, ni wewe wobimenya.

⁴Arongera arambarira, ati Vugira kur’ aya magufa, uyabarire, uti Yemwe mwa magufa yumye, ni mwumve ijambo ry’Uhoraho.

⁵Uku ni k’Umwami Uhoraho abarira aya magufa, at’ Ehe ngira nshire impwemu muri mwebge, nuko muraba bazima.

⁶Kandi ngira mbashirekw imitsi, mbazanekw inyama, mbarenzek’ urukoba, mbashiremw’ impwemu, nuko muraba bazima; kandi muramenya yuko jewe nd’ Uhoraho.

⁷Nuko nca mvuga nk’uko mbariwe: maze nkiriko ndavuga, haba umuturagaro, mbona isi itigita, amagufa arafatana, igufa na rigenzi ryaryo.

⁸Ngize ntya mbona arikw imitsi, maz’ inyama ziyazako, urukoba ruzirengako, ariko nta mpwemu zaribgajemwo.

⁹Maz’ arambarira, ati Vugira ku muyaga, vuga, mwana w’umuntu, ubarire umuyaga, ut’ Uku ni k’Umwami Uhoraho agize, ati Ngwino muve ku miyaga ine, mwa mpwemu, muhumekere kur’ abo bishwe, babe bazima.

¹⁰Nuko nca mvuga nk’ukw ambariye, impwemu zibinjiramwo, baba bazima, baravyuka barahagarara, ar’ ingabo nyinshi cane.

¹¹Nukw arambarira, ati Mwana w’umuntu, ayo magufa ni wo muryango wose wa Isirayeli: ehe baravuga, bat’ Amagufa yacu arūmye, n’ivyizigiro vyacu birabuze, turashize rwose.

¹²None vuga, ubabarire, ut’ Uku ni k’ Umwami Uhoraho agize, at’ Ehe, nzorangaza imva zanyu, mbadūze muve mu mva zanyu, mwa bantu banje; kandi nzobashikana mu gihugu c’i Bgisirayeli.

¹³Nuko muzomenya yuko jewe nd’ Uhoraho, igihe nzoba ndangaje imva zanyu, nkabadūza mukava muri zo, mwa bantu banje.

¹⁴Kandi nzobashiramwo Mpwemu wanje, mube bazima, mbashire mu gihugu canyu bgite, maze muzomenya kw ari jewe Uhoraho nabivuze kandi ndabishikije, ni k’Uhoraho agize.

¹⁵Ijambo ry’Uhoraho ryongera kunzako,

¹⁶rit’ Ewe mwana w’ umuntu, abīra inkoni, uyandikeko, uti N’iya Yuda n’Abisirayeli bīherereje kuri we: wābīre n’iyindi nkoni, uyandikeko, uti N’iya Yosefu, inkoni ya Efurayimu, n’inzu yose y’Abisirayeli bīherereje kuri we:

¹⁷uheze uzungikanyemw’ inkoni imwe, kugira ngo zihinduke imwe mu kuboko kwawe.

¹⁸Maz’ abantu b’ubgoko bganyu ni bakubaza, bati Mbega ntiwodusobanurira ivyo uko bigenze?

¹⁹uz’ ubabgire, ut’ Uku ni k’ Umwami Uhoraho agize, ati Rāba ngira nābīre inkoni ya Yosefu, iri mu kuboko kwa Efurayimu, n’ imiryango y’Abisirayeli bīherereje kuri we; maze mbungikanye n’ inkoni ya Yuda, mbagire inkoni imwe, ngo babe umwe mu kuboko kwanje.

²⁰Kand’ inkoni wanditseko zize zibe mu kuboko kwawe mu maso yabo.

²¹Maz’ ubabgire, ut’ Uku ni k’Umwami Uhoraho agize, ati Rāba ngira nkūre Abisirayeli mu mahanga bāgiyemwo, mbakoranirize hamwe mbakūye mu mpande zose, mbashikane mu gihugu cabo bgite;

²²mbagire ihanga rimwe mu gihugu, ku misozi y’i Bgisirayeli; kand’ umwami umwe ni we azoba umwami wabo bose. Ntibazokwongera kuba amahanga abiri ukundi, canke ngo bagabanywemw’ ubgami bubiri ukundi.

²³Ntibazokwongera kwihumanisha ibigirwamana ukundi, cank’ ibizira vyabo, cank’ ibicumuro vyabo vyose; ariko nzobarokora mbakūre ahantu bibera bākoreye ivyaha, mbatunganye: uko ni ko bazoba abantu banje, nanje mbe Imana yabo.

²⁴Kand’ umusavyi wanje Dawidi azoba umwami wabo, bose bazogira umwungere umwe; kandi bazogendera mu vyagezwe vyanje, bitondere amabgirizwa yanje, bayashitse.

²⁵Bazoba mu gihugu nahaye umusavyi wanje Yakobo, aho ba sekuruza bāba: ni ho bazoba, bo n’abana babo n’abuzukuru babo, ibihe bidashira. Kandi Dawidi umusavyi wanje azoba umwami wabo gushitsa ibihe bidashira.

²⁶Kand’ ikigeretseko, nzosezerana na bo isezerano ry’amahoro, ribabere isezerano ritazoshira. Nzohabegurira ndabagwize, kand’ ahēra hanje nzohashinga hagati yabo gushitsa ibihe bidashira.

²⁷Ihema ryanje na ryo rizoba kumwe na bo; nanje nzoba Imana yabo, na bo bazoba abantu banje.

²⁸Maz’ amahanga azomenya yukw ari jewe Uhoraho nēza Abisirayeli, igihe ahēra hanje hazoba hagati muri bo gushitsa ibihe bitazoshira.