Read Bibliya Yera 1951 EZEKIYELI 38 Bible Online

EZEKIYELI 38 - Bibliya Yera 1951 bible

EZEKIYELI 38

¹Ijambo ry’Uhoraho ryanjeko,

²riti Mwana w’umuntu, tungīra ijisho ryawe Gogi wo mu gihugu c’i Magogi, umwami w’i Roshi n’i Mesheki n’i Tubali, umubūrire,

³ut’ Uku ni k’Umwami Uhoraho agize, at’ Ehe nzohigūra nawe, ewe Gogi, mwami w’i Roshi n’i Mesheki n’i Tubali:

⁴nzogukimiranya, nshire igera mu mibangabanga yawe, ngukwegane n’ingabo zawe zose, n’amafarasi n’abayagenderako, bose bambaye ivyuma vyo kwīkīngiriza, ar’ igitero kinini citwaje inkinzo nto‐nto na nini‐nini, bose bafashe inkota:

⁵ab’ i Buperesi n’abo muri Etiyopiya n’ab’ i Puti bazoba bari kumwe na bo, bose bari n’inkinzo n’inkofero z’ivyuma;

⁶na Gomeri n’ingabo ziwe zose, n’ab’ inzu ya Togaruma baba ahahera i burārūko, n’ingabo zabo zose: mbere bazoba ar’ amahanga menshi ari kumwe nawe.

⁷Kenyera witegure, mwe n’ibitero vyawe vyose bikoraniye ah’ uri, ubabere umugabisha.

⁸Hahise imisi myinshi uzovyutswa: mu myaka y’iherezo uzoza mu gihugu cābogowe gikūwekw inkota, kirimw’ ubgoko bgakoranirijwe hamwe bavuye mu mahanga menshi, bari ku misozi y’i Bgisirayeli yahoze ar’ amatongo; bākūwe mu mahanga, biberaho ata co binona, bose uko bangana.

⁹Nuk’ uzodūga, uje nk’ikirura, uzoba nk’igipfungu cubikije mu gihugu, mwe n’ingabo zawe zose, n’amahanga menshi muri kumwe.

¹⁰Uku ni k’Umwami Uhoraho agize, at’ Uwo musi ni washika, hazoza ivyiyumviro mu mutima wawe, wīgīre imigabo y’ibibi:

¹¹maz’ uzovuga, uti Hinge ndūge ntere igihugu c’imihana itubakiwe inzitiro z’amabuye, ngīre abibereye impore ata co binona, bose uko bangana baba ahatubakiwe inzitiro, ata n’imyugariro cank’ amarembo bagira;

¹²kugira ng’ uhasahure, uhanyage iminyago, ubangurire ukuboko kwawe ahāhoze ar’ imisaka hagasubira kubamw’ abantu, no ku bgoko bgākoranirijwe hamwe buvuye mu mahanga, bāmaze kwironkera amatungo n’ibintu, bakibera hagati mw isi.

¹³Ab’i Sheba n’ab’i Dedani n’abadandaza b’i Tarushishi n’abahambaye nk’ imigunza y’intambge baho bose, bazokubaza, bati Mbeg’ uzanywe no gusahura? Wakoranije ico gitero cawe kunyaga iminyago, no gutwara ifeza n’izahabu, no kwishorerera amasho no gutwara ibintu, no kunyaga iminyago myinshi?

¹⁴Nuko rero, mwana w’umuntu, būrira Gogi, ut’ Uku ni k’Umwami Uhoraho agize, ati Kur’ uwo musi, igihe abantu banje b’Abisirayeli bazoba bibereye impore, mbega ntuzobimenya?

¹⁵Ico gihe uzoza uvuye i wawe ahahera i burārūko, mwe n’amahanga menshi muzananye, bose bagendera ku mafarasi, ar’ igitero kinini n’ingabo nyinshi;

¹⁶maz’ uzotera abantu banje b’Abisirayeli, umeze nk’ igipfungu cubikije mu gihugu: maze mu misi y’iherezo nzokugomora utere igihugu canje, kugira ngw amahanga az’ amenye ico ndi co, igihe nzokwiyerekanira kuri wewe imbere yabo ko nd’ Uwera, ewe Gogi!

¹⁷Uku ni k’Umwami Uhoraho agize, ati Mbega si wewe navuze mu bihe vya kera, mvugiye mu basavyi banje b’Abisirayeli navugisha, bābūye imyaka myinshi mur’ ico gihe, yukw ari wewe nzorungika kubatera?

¹⁸Kur’ uwo musi, igihe Gogi azotera igihugu c’i Bgisirayeli, uburake bganje buzompfunduka mu mazuru, ni k’Umwami Uhoraho agize.

¹⁹Kuko navuganye ifuhe n’ uburake bgaka umuriro, nti N’ ukuri, kur’ uwo musi hazoba ugutigita gukomeye mu gihugu c’i Bgisirayeli;

²⁰bitume amafi yo mu kiyaga, n’ibisīga vyo mu kirēre, n’ibikōko vyo mw ishamba, n’ivyikwega vyose vyikwega hasi, n’abantu bose bari kw isi, bihindira agashitsi imbere yanje, n’imisozi yubikwe, n’ahantu h’agatembge hasiduke, n’inzitiro zose zisenyukire hasi.

²¹Nzohamagaza inkota yo kumurwaniriza ku misozi yanje yose, ni k’Umwami Uhoraho agize: inkota y’umuntu wese azoyirwanisha mugenzi we.

²²Nzomushitsakw iteka namuciriyeko, ndamuhanishe ikīza no kuvishwa amaraso; kandi we n’ingabo ziwe n’ amahanga menshi ari kumwe na we, nzobarekurirakw imvura y’ isegenya, n’imināna y’urubura, n’ umuriro n’amazuku.

²³Uko ni ko nzogaragaza icubahiro canje, niyerekane ko nd’ Uwera, kandi nzokwimenyekanisha mu maso y’ amahanga menshi; maze bazomenya yuko jewe nd’ Uhoraho.