Read Bibliya Yera 1951 EZEKIYELI 4 Bible Online

EZEKIYELI 4 - Bibliya Yera 1951 bible

EZEKIYELI 4

¹Nuko nawe, mwana w’umuntu, wiyabīrire itafari, urirambike imbere yawe, urishushanyekw igisagara, ari co Yerusalemu:

²maz’ ukiziguze, wubake ibihome vyo kuhatera, ukirundire ibigunguzi vyo kwūririrako, ugisagazeko n’ insago, ugikikizeko hirya no hino ibiti vy’imigogo vyo kugihomvora.

³Kandi wiyabīrire umubehe w’ icuma, uwukike ng’ukubere uruzitiro rw’icuma hagati yawe n’ igisagara: ugishinge ijisho ngo kiziguzwe, wewe ubgawe ukiziguze. Ivyo bizoba ikimenyamenya c’inzu ya Isirayeli.

⁴Utek’ uryamire urubavu rwawe rw’i bumoso, ururemeke ibigabitanyo vy’inzu ya Isirayeli: ukw igitigiri c’imisi uzoruryamira kingana, ni k’uzokwishirakw ibigabitanyo vyabo.

⁵Kuk’ ukw imyaka yo guhanirwa ibigabitanyo vyabo ingana, nguciriye igitigiri c’ imisi kingana na yo, n’imisi amajana atatu na mirongwicenda: uko ni k’uzokwishirakw ibigabitanyo vy’inzu ya Isirayeli.

⁶Maz’ urangije ivyo, uz’ uheze uryamire urubavu rw’i buryo, wishirekw ibigabitanyo vy’inzu ya Yuda: nguciriye imisi mirongwine, umusi‐umusi uhwana n’umwaka.

⁷Kand’ uz’ ushinge ijisho kuri Yerusalemu hajigujwe, ukumye impuzu ku kuboko kwawe; uhabūrire ibizoba.

⁸Kandi rāba, ngushize mu ngoyi, nta ho uzohindukirira urundi rubavu, gushitsa ah’ imisi yo kuhaziguza kwawe izoba irangiye.

⁹Kandi wironderere ingano na sayiri n’ibiharage n’inkōre n’amasaka n’uburo, maz’ ubishire mu nkono imwe, ubicemw’ uturobe tw’udutsima; nk’ukw igitigiri c’imisi kiri uzoryamira urubavu, ukw ar’ amajana atatu na mirongwicenda, ivyo ni vyo bizogutunga.

¹⁰Kand’ ivyo kurya vyawe uze wame ubirya ku rugero, ari rwo shekeli mirongwibiri mu musi mu musi: uzokwama urya rimwe ku musi.

¹¹Kandi n’ amazi uzokwama uyanywa ku rugero, ari rwo gihimba ca gatandatu c’ingero yitwa hini: na yo uzokwama uyanywa rimwe ku musi.

¹²Uzokwama ubirya nk’ udutsima twa sayiri, kand’ uzokwama uducaniriza amavyi y’ abantu imbere yabo.

¹³Kand’ Uhoraho aravuga, at’ Uko ni kw Abisirayeli bazorīra ivyo kurya vyabo vyandavuye mu mahanga nzobashwiragirizamwo.

¹⁴Maze ndavuga, nti Yo! Ewe Mwami Uhoraho! Erega kuva aho nakabereye nta ho nigeze mpumana: kuk’ uhereye mu buto bganje ugashitsa n’ubu ata ho nigeze kurya icipfiriye, cank’ icātabaguwe n’ igikōko; kandi nta ho inyama zihumanye zigeze kuja mu kanwa kanje.

¹⁵Maz’ arambarira, ati Rāba, nguhaye ibisheshe vy’amase y’inka mu gishingo c’amavyi y’ abantu: ivyo ni vyo uzocaniriza ukora utwo dutsima twawe.

¹⁶Arongera arambarira, ati Mwana w’umuntu, ehe ngira mvune inkoni ab’ i Yerusalemu bishimikije, ari wo mutsima; kandi bazosigara barya umutsima ku rugero, bahagaritse umutima; n’amazi bazoyanywa ku rugero bihebuye:

¹⁷uko ni ko bazokena ivyo kurya n’amazi, bazazanirwe iyo bava bakagera, bashire umunywera kubg’ ibigabitanyo vyabo.