Read Bibliya Yera 1951 EZEKIYELI 41 Bible Online

EZEKIYELI 41 - Bibliya Yera 1951 bible

EZEKIYELI 41

¹Maz’ anjana ku rusengero, agera ibisapfu vyarwo, ubgaguke bgavyo buba amatambge atandatu ku ruhande rumwe, ayandi atandatu ku rundi, y’ukuboko uciriye mu nkokora, nk’uk’ ubgaguke bg’ihema bgāri buri.

²Ubgaguke bgo mw irebe buba amatambge cumi; kand’ impande z’irebe, rumwe ruba amatambge atanu, urundi ruba atanu nyene; maz’ agera uburebure bgarwo bg’ umurambararo, buba amatambge mirongwine, n’ubgaguke buba mirongwibiri.

³Maz’ adwēbēra imbere, agera ibisapfu vyaho vyompi, biba amatambge abiri, no mw irebe haba amatambge atandatu, n’ubgaguke bgo ku mpande z’irebe, buba amatambge ndwi‐ndwi.

⁴Agera n’uburebure bgaho bg’ umurambararo, buba amatambge mirongwibiri, n’ubgaguke buba mirongwibiri nyene, aharābana n’ahēra h’urusengero: maz’ arambarira, at’ Aha n’Ahēra Cane.

⁵Maz’ agera intimba y’inzu, iba amatambge atandatu; n’ubgaguke bg’akumba kose kometseko mu mbavu buba amatambge ane, twāri dukikije ku nzu impande zose.

⁶Kand’ utwo twumba two mu mbavu twāri mu mirongo itatu, umwe ugeretse ku wundi; mu murongo mu murongo hār’ utwumba mirongwitatu; imbaho zatwo zari zinjiye mu gisika, uko twubatswe inyuma ku ngoro impande zose; zari zifashe ahaniguye ku gisika c’ingoro ubgayo, ariko zitinjiyemwo.

⁷Utwo twumba two mu mbavu twagenda turutana uko tudūze dukikije ingoro, kukw aho haniguye hakikije ingoro, na ho hāgenda harutana uko hadūze, bigatuma igisika c’ingoro ubgayo kigenda gikeha uko kidūze; kand’ uwūrira mu kumba ko hejuru avuye mu ko hasi yaca mu ko hagati.

⁸Mbona yukw iyo ngoro yari n’ itanguriro rirerire impande zose; amatanguriro y’utwumba two mu mbavu yar’ irenga rimwe ry’ amatambge atandatu y’ukuboko uciriye mu nkokora n’ayandi atandatu y’intoke.

⁹Intimba y’ igisika cubakiwe utwo twumba two mu mbavu, ahahera hanze, yar’ amatambge atanu y’ukuboko uciriye mu nkokora; maz’ ahasigaye hār’ ahākebewe utwo twumba two mu mbavu two ku ngoro.

¹⁰Kandi guhera kur’ utwo twumba hār’ umwanya w’amatambge mirongwibiri ukikuje ingoro impande zose.

¹¹Imiryango y’utwo twumba two mu mbavu yari yerekeye ha handi hāsigaye; umuryango umwe wari werekeye i burārūko, uwundi i bumanuko: kand’ aho hāsigaye, ubgaguke bgaho bgār’ amatambge atanu impande zose.

¹²Kandi hār’ inzu yar’ imbere y’ uwo mwanya uciye hagati, ku ruhande rw’i burengerazuba, ubgaguke bgayo bgar’ amatambge mirongwirindwi y’ukuboko uciriye mu nkokora, intimba y’iyo nzu yar’ amatambge atanu‐atanu impande zose, n’uburebure bgayo bgar’ amatambge mirongwicenda.

¹³Nukw agera uburebure bg’ umurambararo bg’ingoro buba amatambge ijana; agera n’uwo mwanya uciye hagati bo na ya nzu n’intimba yayo, uburebure bgavyo buba amatambge ijana nyene;

¹⁴agera n’ubgaguke bg’imbere y’ urusengero bo na wa mwanya uciye hagati aharābana n’i burasirazuba, na vyo biba amatambge ijana.

¹⁵Agera n’uburebure bg’ umurambararo bga ya nzu irābana na wa mwanya uciye hagati inyuma y’ingoro, bo n’amabaraza yo ku mpande zompi, biba amatambge ijana nyene. Imbere mu rusengero, n’amabaraza y’inyubakwa,

¹⁶no mw irebe, n’amadirisha atugururwa, n’amabaraza aciye impande zose za twa twumba turi mu mirongo itatu igerekeranye, aharābana n’irebe, hāri haranze imbaho impande zose, uhereye hasi ugashika ku madirisha, kand’ ayo madirisha nyene yarimw’ inshingo;

¹⁷no gushitsa hejuru y’irebe, n’ahitereye imbere mu ngoro, bo n’inyuma, bo n’inzu impande zose imbere n’ inyuma, vyose vyāri ku rugero.

¹⁸Kandi vyāri bisharijwekw ibishushanyo vy’abakerubi n’ibigazi; hagati y’umukerubi n’uwundi hāri harobetse ikigazi; kand’ umukerubi wese yar’ afise mu maso habiri,

¹⁹ahasa n’ah’ umuntu harābana n’ikigazi ku ruhande rumwe, n’ahasa n’ah’ umugunza w’intambge harābana n’ikindi kigazi ku rundi ruhande. Uko ni ko vyashushanijwe guheza inzu yose impande zose.

²⁰Uhereye hasi ugashitsa hejuru y’irebe hari hashushanijwekw abakerubi n’ibigazi; uko ni ko vyashushanijwe guheza urusengero rwose.

²¹Ibisapfu vy’urusengero vyangana impande zose; kand’ uruhande rw’imbere rw’Ahēra Cane rwāsa kumwe n’urusengero.

²²Igicaniro car’ ikibazano; uburebure bg’igihagararo bgaco bgar’ amatambge atatu y’ukuboko uciriye mu nkokora, n’uburebure bg’ amakika bgar’ amatambge abiri; inkokora zaco no mu ntebe haco n’imbavu zaco, hose car’ ikibazano: maz’ arambarira, at’ Aya ni yo meza ar’ imbere y’Uhoraho.

²³Kand’ urusengero n’Ahēra Cane vyari bifise amarebe abiri;

²⁴amarebe yompi yar’ afise inzugi zibiri zisomana; irebe rimwe ryagira inzugi zibiri, irindi zindi zibiri.

²⁵Kand’ izo nzugi z’urusengero zāri zishushanijwekw abakerubi n’ibigazi, nk’uko vyari bishushanijwe ku nzu; kandi ku rubaraza ahahera inyuma hāri haranze imbaho z’intimba nini.

²⁶Kandi hār’ amadirisha atugururwa n’ibigazi bishushanijwe ku rubaraza hirya no hino mu mpande zarwo; utwumba two mu mbavu z’ingoro, bo n’imbaho, uko ni ko vyari bimeze.