Read Bibliya Yera 1951 EZEKIYELI 42 Bible Online

EZEKIYELI 42 - Bibliya Yera 1951 bible

EZEKIYELI 42

¹Maz’ ankūrayo, anshikana mu ntangaro, aherekeye i burārūko; anyinjiza mu nzu irimw’ ivyumba irābana na wa mwanya uciye hagati, irābana n’ingoro, ahahera i burārūko.

²Uruhande rwarimw’ urugi rw’aharābana n’i burārūko, uburebure bgaho bg’ amakika bgar’ amatambge ijana y’ukuboko uciriye mu nkokora, ubgaguke na bgo bgar’ amatambge mirongwitanu.

³Iyo nzu yari n’ amabaraza agerekeranye mu mirongo itatu, arābana n’ah’ amatambge mirongwibiri ho mu nyubakwa, kand’ arābana na wa musezero w’amabuye wo mu ntangaro.

⁴Imbere y’iyo nzu irimw’ ivyumba hār’ inzira, ubgaguke bgayo bgar’ amatambge cumi, hāri n’akayira k’itambge rimwe; kand’ imiryango y’ivyo vyumba yarāba i burārūko.

⁵Ivyumba vyo hejuru vyarutwa n’ivyo hasi bo n’ivyo hagati mur’ iyo nzu, kuko vyakehejwe n’amabaraza yavyo.

⁶Kuko vyubatswe mu mirongo itatu igerekeranye, ariko bidafise inkingi nk’izo mu rugo: bituma ivyumba vyo hejuru biba impfunda kurenza ivyo hasi n’ivyo hagati.

⁷Igisika c’ahahera inyuma y’inzu irimw’ ivyumba kirābana no mu ntangaro imbere y’ibindi vyumba, uburebure bgaco bgar’ amatambge mirongwitanu y’ukuboko uciriye mu nkokora.

⁸Kuko vya vyumba birāba mu ntangaro, uburebure bgavyo bgār’ amatambge mirongwitanu; arik’ ubg’ ibir’ imbere y’urusengero vyo bgar’ amatambge ijana.

⁹Musi y’ivyo vyumba hār’ icanzo, ahahera i burasirazuba, cācibgamwo n’abajayo bava mu ntangaro.

¹⁰Mu ntimba y’urugo rw’amabuye rw’inyubakwa ahahera i burasirazuba, na ho hār’ ivyumba, vyar’ imbere y’umwanya uciye hagati, imbere y’ingoro.

¹¹Inzira yaca imbere yavyo yasa n’iyaca imbere y’ivyumba vy’ aherekeye i burārūko; ivyo hino n’ ivyo hirya vyose vyari cabugerwe mu burebure no mu bgaguke, n’ imiryango yavyo yose na yo yar’ uburyo bumwe, n’inzugi zavyo ni nk’uko.

¹²Inzugi z’ivyumba vy’aherekeye i bumanuko na zo ni ko zari zimeze. Ku mutwe w’ inzira, ari yo nzira yo mu nyubakwa irābana n’i burasirazuba, hār’ icanzo, cācibgamwo n’abajayo.

¹³Maz’ arambarira, at’ Ivyumba vy’ahahera i burārūko n’ivy’ ahahera i bumanuko bihereranye na wa mwanya uciye hagati, ivyo n’ ivyumba vyera, ah’ ibintu vyera cane bizorīrwa n’abaherezi bahora bēgēra Uhoraho; aho ni ho bazotereka ivyera cane, n’ishikanwa ry’ifu, n’ikimazi gitangirwa ivyaha, n’ikimazi gitangirwa ibicumuro; kukw ar’ ahantu hēra.

¹⁴Abaherezi iyo binjiye ahēra, ntibaze baveyo ngo baje mu ntangaro, badasizey’ imyambaro yabo y’ubuherezi, kukw ar’ iyera; ariko bambare iyindi myambaro, babone kwegerana n’abantu.

¹⁵Nukw arangije kugera imbere mu ngoro, ancisha mu kirimba kirāba i burasirazuba, agera urugo impande zose.

¹⁶Agera ku ruhande rw’i burasirazuba, ageresheje irenga ry’ikigeresho, ruba amatambge amajana atanu y’irenga kur’ urwo ruhande rwose.

¹⁷Maz’ agera ku ruhande rw’i burārūko, ruba amatambge amajana atanu y’iryo renga ry’ikigeresho kur’ urwo ruhande rwose.

¹⁸Agera uruhande rw’i bumanuko, ruba amatambge amajana atanu y’iryo renga ry’ikigeresho.

¹⁹Maz’ ahindukirira mu ruhande rw’i burengerazuba, ahageresha iryo renga ry’ikigeresho, ruba amatambge amajana atanu nyene.

²⁰Uko ni ko yageze izo mpande ukw ari zine: urugo rwari ruhakikuje impande zose, uburebure bgarwo bgar’ amatambge amajana atanu, n’ubgaguke bgarwo yandi majana atanu nyene; urwo rugo rwar’ urwo gutandukanya ahēra n’ahatar’ ahēra.