Read Bibliya Yera 1951 EZEKIYELI 46 Bible Online

EZEKIYELI 46 - Bibliya Yera 1951 bible

EZEKIYELI 46

¹Uku ni k’Umwami Uhoraho agize, at’ Ikirimba c’inyubakwa kirābana n’i burasirazuba kize came kijishwe mu misi y’ ibikorwa ukw ar’ itandatu; ariko ku musi w’isabato kijishurwe, bo no ku musi ukwezi kubonetseko.

²Segaba az’ ashikeyo aciye mu rubaraza rw’ikirimba ruhera inyuma, maz’ ahagarare i ruhande y’ igikingi c’ikirimba; abaherezi baze bamutangire ikimazi ciwe co kwoswa n’ibimazi vyiwe vy’ishimwe, maz’ asengere mw ishikiro ry’ico kirimba, aheze aveyo; arikw ico kirimba ntikize kijishwe gushitsa ku mugoroba.

³Kand’ abantu bo mu gihugu baze bahore basengera imbere y’Uhoraho bar’ inyuma y’ico kirimba ku masabato no mu mboneko z’ukwezi.

⁴Ibimazi vyo kwoswa segaba azohora atanga k’Uhoraho ku musi w’isabato bize bibe imyagazi y’intama itandatu itagira agasembga, n’ impfizi y’intama imwe itagira agasembga nyene;

⁵kand’ ishikanwa ry’ifu rigerekwa kur’ iyo mpfizi y’ intama rize ribe ingero yitwa efa, n’irigerekwa ku myagazi y’intama az’ atange ibimushobokeye, no kuri efa yose y’ifu hajekw amavuta, ingero yitwa hini.

⁶Kandi ku musi ukwezi kubonetseko, haze hatangwe imasa y’umukangara itagira agasembga, n’imyagazi y’ intama itandatu n’impfizi y’intama; bibe ibitagira agasembga.

⁷Kand’ az’ ashikane ishikanwa ry’ifu, ku masa hajekw ingero imwe yitwa efa, no ku mpfizi y’ intama hajeko efa imwe nyene, no ku myagazi y’intama hajekw ibimushobokeye, kandi kuri efa yose y’ifu hajekw amavuta, ingero yitwa hini.

⁸Kandi segaba iy’ ashikayo, ace mu rubaraza rw’ikirimba, maz’ ahindukiye ajane iyo nzira nyene.

⁹Arikw abantu iyo baje imbere y’ Uhoraho mu misi mikuru ishinzwe, ūzoza aciye mu kirimba giherereye i burārūko aje gusenga, ni yavayo az’ ace mu kirimba giherereye i bumanuko; kand’ ūzoza aciye mu kirimba giherereye i bumanuko, ni yavayo az’ ace mu kirimba giherereye i burārūko: ntaz’ ahindukire mu kirimba yazananye, ariko ni yavayo akomeze atumbere imbere yiwe.

¹⁰Kandi segaba iy’ ashikayo, agende hagati yabo, bavuyeyo bavireyo rimwe.

¹¹Mu misi mikuru no mu yindi misi mikuru ishinzwe, ishikanwa ry’ifu rize ribe efa imwe igeretswe ku masa yose, na efa imwe nyene igeretswe ku mpfizi y’intama yose, n’irigerekwa ku myagazi y’intama az’ atange ibimushobokeye, no kuri efa yose y’ifu hajekw amavuta, ingero yitwa hini.

¹²Kandi segaba, igihe azotanga ikimazi avyigombeye, ar’ ikimazi co kwoswa cank’ ar’ ibimazi vy’ishimwe, abitanze k’Uhoraho avyigombeye, haze hagire ūmujishurira ikirimba kirābana n’i burasirazuba, atange ikimazi ciwe co kwoswa n’ibimazi vyiwe vy’ishimwe, nk’ukw asanzwe abikora ku musi w’isabato, aheze agende; amaze kugenda hagire ūjisha ico kirimba.

¹³Kandi nawe uz’ utange uko bukeye umwagazi w’intama umaze umwaka umwe, kand’ utagira agasembga, kuba ikimazi co kwosereza Uhoraho: uze wame uwutanga mu gatondo mu gatondo uko bukeye.

¹⁴Kand’ uze wame uwugerekakw ishikanwa ry’ifu mu gatondo uko bukeye nyene, ribe ikigira gatandatu ca efa y’ifu igogōretse, n’ikigira gatatu ca hini y’ amavuta, yo kuvanga n’iyo fu; ribe ishikanwa ry’ifu k’Uhoraho ry’intahava, icagezwe c’ibihe vyose.

¹⁵Ukw abe ari ko bazotanga umwagazi w’intama, bo n’ishikanwa ry’ifu n’amavuta, mu gatondo mu gatondo uko bukeye, kuba ikimazi co kwoswa c’intahava.

¹⁶Uku ni k’Umwami Uhoraho agize, ati Segaba ni yagira aho akebera umwe mu bana biwe, hazoba ishamvu yiwe, hazotoranwa n’abana biwe; hazoba inyegu yabo kukw ar’ ishamvu.

¹⁷Ariko ni yaramuka akebeye umwe mu basavyi biwe kw ishamvu yiwe, hazoba ahiwe gushitsa kuri wa mwaka w’umwidegemvyo; ico gihe haze hasubizwe segaba; arikw ishamvu azoba yahaye abana biwe izoba iyabo bgite.

¹⁸Yamara segaba ntakanyage amashamvu y’abantu, ngw abasohore mu mashamvu yabo; ariko ni yakebera abana biwe ishamvu, ayikūre ku ho yiganziye ubgiwe, ngw abantu banje boye kuzosābagizwa, ngo hagire umuntu akūrwa mw ishamvu yiwe.

¹⁹Maz’ ancisha mu canzo kibangikanye n’ikirimba, anshikana ku vyumba vyera vy’abaherezi, birābana n’i burārūko: kandi har’ ahantu ahahera inyuma yavyo herekeye i burengerazuba.

²⁰Arambarira, at’ Aha ni ho abaherezi bazoteka ibimazi vy’impongano n’ibimazi bitangirwa ivyaha, kandi ni ho bazokaranga amashikanwa y’amafu; kugira ngo boye kubijana mu ntangaro, bakavyezesha abantu.

²¹Maz’ anjana mu ntangaro, angenduza imfuruka zine z’urugo; nsanga izo mfuruka zose z’urugo zubatswek’ utunyubakwa.

²²Ukw imfuruka z’urugo ari zine, hāri harumitsekw akanyubakwa; uburebure bgatwo bgār’ amatambge mirongwine y’ukuboko uciriye mu nkokora, amakika yar’ amatambge mirongwitatu: utunyubakwa two mu mfuruka ukw ari tune twār’ urugero rumwe.

²³Muri two ukw ari tune, hārimw’ imirongo y’amatafari itugendanye, yubatswemw’ amaziko impande zose.

²⁴Maz’ arambarira, at’ Utu n’ utuzu two gutekamwo, ah’ abasuku bo mu ngoro bazoteka ibimazi abantu bazanye.