Read Bibliya Yera 1951 EZEKIYELI 6 Bible Online

EZEKIYELI 6 - Bibliya Yera 1951 bible

EZEKIYELI 6

¹Maz’ ijambo ry’Uhoraho rinzako,

²riti Mwana w’umuntu, tungīra ijisho ryawe imisozi y’i Bgisirayeli, uyibūrire,

³uti Yemwe misozi y’i Bgisirayeli, ni mwumve ijambo ry’Umwami Uhoraho: Uku ni k’Umwami Uhoraho abgira imisozi n’uturambi, imigezi n’ imyonga, at’ Ehe jewe ubganje nyene nzobatērēra inkota, nkomvomvore ibitabo vyanyu vyo ku mpinga z’imisozi.

⁴Kand’ ibicaniro vyanyu bizosigara bitamāriwe, n’ibishushanyo vyanyu vy’izuba bizomenagurwa: kand’ abishwe banyu nzobashiburira hasi imbere y’ibigirwamana vyanyu.

⁵Nzorambika imivyimba y’Abisirayeli imbere y’ibigirwamana vyabo; kand’ amagufa yanyu nzoyatāgaguza impande zose z’ibicaniro vyanyu.

⁶Aho muba hose ibisagara bizogesezwa, n’ibitabo bitamārirwe, kugira ngw ibicaniro vyanyu bisangangurwe, bitamārirwe, n’ibigirwamana vyanyu bimenagurwe, biherengetezwe, n’ ibishushanyo vyanyu vy’izuba bicibge bitsindwe hasi, n’ibikorwa vyanyu bizimangane.

⁷Kand’ abishwe bazohindikirana hagati muri mwebge, namwe muzomenya yuko jewe nd’Uhoraho.

⁸Yamara nzosiga amasigarira, kuko muzogira bamwe bacika bagakira inkota, bakaja mu banyamahanga, igihe muzosābagirizwa mu bihugu.

⁹Kand’ abazoba baracitse bo muri mwebge bazonyibuka bari mu mahanga, aho bazoba barajanywe ar’ inyagano, bamenye ingene nashābijwe n’imitima yabo yabaye ibimaka ikamvako, kandi ko nashābijwe n’amaso yabo y’ubumaka bagenda banyuririza ku bigirwamana vyabo: baheze biyanke urunuka kubg’ ibibi bakoze n’ ibizira vyabo vyose.

¹⁰Kandi bazomenya yuko jewe nd’ Uhoraho: simbivugiye ubusa ko nzobatēza ivyo vyago.

¹¹Uku ni k’Umwami Uhoraho agize, ati Kubita amashi ku yandi, dida ikirenge hasi, uvuge uti Yō! Ewe bizira bibi vyose inzu ya Isirayeli yakoze! Kuko bazoririkwa n’inkota n’inzara n’ikīza.

¹²Ūri kure azokwicwa n’ikīza, ūri hafi azokwicwa n’inkota; kandi n’ ūsigaye asāgirijwe azokwicwa n’ inzara: uko ni ko nzokwimara uburake mbafitiye.

¹³Maze bazomenya yuko jewe nd’ Uhoraho, igihe imihindigiti yabo izoba irambaraye hagati y’ibigirwamana vyabo impande zose z’ibicaniro vyabo, ku gasozi kose gahagaze, no ku dutwe twose tw’imisozi miremire, no musi y’igiti cose gitotahaye, no musi y’igiti cose c’umweloni gihūritse, aho bāshikanirira ibigirwamana vyabo vyose ibizana imibabge imota neza.

¹⁴Kandi nzobabangurirak’ ukuboko kwanje, mpindure igihugu imisaka n’amatongo, uhereye mu bugaragwa burābana n’i Dibula, n’aho baba hose iyo hava hakagera: na bo bazomenya yuko jewe nd’ Uhoraho.