Read Bibliya Yera 1951 EZEKIYELI 7 Bible Online

EZEKIYELI 7 - Bibliya Yera 1951 bible

EZEKIYELI 7

¹Ijambo ry’Uhoraho ryongera kunzako,

²riti Nawe, mwana w’umuntu, uku ni k’Umwami Uhoraho abarira igihugu c’Abisirayeli, at’ Umuhero! Umuhero ushitse mu mpande zine z’igihugu!

³Noneh’ umuhero ugushitseko, ngira nguteze uburake bganje, ngucire urubanza ruhwanye n’ ingeso zawe; kand’ ibizira vyawe vyose nzobigusubiza ku mutwe.

⁴Ijisho ryanje ntirizokuziguriza, kandi nta n’akagongwe nzogira: arikw ingeso zawe nzozigusubiza ku mutwe, kand’ ibizira vyawe bizokubonekako: ni ho uzomenya yuko jewe nd’ Uhoraho.

⁵Uku ni k’Umwami Uhoraho agize, at’ Icago, icago c’ubugesera! Ehe kiraje!

⁶Umuhero urashitse, umuhero urashitse, urakuvundurukiye: eh’ uraje!

⁷Igihano cawe kiragushitseko, wewe wibera mu gihugu we! Igihe kirashitse, umusi uri hafi; n’ umusi wo kuvuza akarūru mu misozi, atar’ uwo kuvuza impundu.

⁸Non’ ubu mpava nkurekurirak’ ubushangashirwe bganje, ngushitsek’ uburake bganje, ngucire urubanza ruhwanye n’ingeso zawe: kand’ ibizira vyawe vyose nzobigusubiza ku mutwe.

⁹Ijisho ryanje ntirizoziguriza, kandi nta n’akagongwe nzogira: ariko nzogusubiza ku mutwe ibihwanye n’ingeso zawe, kand’ ibizira vyawe bizokubonekako; ni ho uzomenya yuko jewe Uhoraho, ari jewe mpana.

¹⁰Ehe wa musi, nguyu uraje: igihano cawe kirashitse; inkoni yabaye umusozo, ubgibone buratutuje.

¹¹Umuryano urisumbuye ucitse inkoni yo guhana ikibi; nta masigarira yo muri bo, haba no mu masinzi yabo, haba no mw itunga ryabo; nta n’ubukuru bukiba muri bo.

¹²Igihe kirashitse, umusi uri hafi: umuguzi areke kunezerwa, n’ūguzweko areke kuganya; kuk’ uburake bushitse ku masinzi yabo yose.

¹³Kuk’ ūguzweko atazosubira ku vyo yaguze, naho boba bakiriho: kukw ivyerekanywe vyerekana ku masinzi yabo yose, kw ata wuzosubirayo; kandi nta wuzokwitungira amagara mu kugabitanya kwiwe.

¹⁴Batabarishije inzamba, batunganije vyose, ariko nta n’umwe yagiye mu ntambara: kuk’ uburake bganje buri ku masinzi yabo yose.

¹⁵Inyuma har’ inkota, imbere har’ ikīza n’inzara: ūzoba ari ku musozi azokwicishwa inkota; ūzoba ari mu gisagara inzara n’ikīza bizomuyongobeza.

¹⁶Arikw abacitse bo muri bo bazocika bakire, bazoba ku misozi bameze nk’inuma zo mu myonga, bose bazoba bacura intimba, umuntu wese kubg’ ibigabitanyo vyiwe.

¹⁷Amaboko yose azodendebuka, n’amavi yose azoregarega acike nk’ amazi.

¹⁸Kandi bazokenyera amagunira, ubgoba bubatwikire, kandi mu maso ha bose hazogira ibitētērwa, no ku mitwe ya bose hazoba inkomvorera.

¹⁹Bazoshiburira amafeza yabo mu nzira, n’amazahabu yabo azobabera nk’igihumane; amafeza n’amazahabu vyabo ntibizoshobora kubarokora ku musi w’uburake bg’Uhoraho; ntibizohāza imitima yabo, canke ngo bihāze inda zabo: kuko vyababereye igitsitaza co kubagwisha mu bigabitanyo.

²⁰Ubgiza bg’ivyari bibasharije bgabateye ubgibone: babicuzemw’ ibishushanyo vy’ibizira vyabo n’ ibigirwamana vy’ubuyobe; ni co gitumye mbihindura igihumane kuri bo.

²¹Kandi nzobigabura mu maboko y’abanyamahanga ngo bibe iminyago, no ku banyakibi bo mu gihugu ngo bibe isahu, kandi bazobihumanya.

²²Nzobakūrakw amaso yanje ndore irya, ba bandi na bo bazohumanya ubgiherēro bganje, abambuzi bazohinjira bahahumanye.

²³Itegure iminyororo! Kukw igihugu cuzuye ubgicanyi, n’igisagara cuzuye umuryano.

²⁴Ni co gituma ngira nshikimure ihanga rirushije ayandi kuba ribi, begukire amazu yabo; kandi nzotuma ubgibone bg’abahizi buherengetera; n’ahantu habo hēra hazohumanywa.

²⁵Ubugesera buraje! Bazorondera amahoro, bayabure.

²⁶Ivyago bizogerekerana n’ibindi, n’impuha zigerekerane n’izindi; bazoja kuronderera k’ūvugishwa n’Imana ko yoba har’ ico yeretswe; kukw ivyagezwe bizobura ku muherezi, n’inama zibure ku bo hambere.

²⁷Umwami azocura akanihiro, n’umuganwa ubujonjogore bumufate, amaboko y’abantu bo mu gihugu ahinde agashitsi: nanje nzobagirira nk’ukw ingeso zabo zimeze, mbacire urubanza rukwiranye na bo; maze bazomenya yuko jewe nd’ Uhoraho.