Read Bibliya Yera 1951 Guharūra 10 Bible Online

Guharūra 10 - Bibliya Yera 1951 bible

Guharūra 10

¹Uhoraho abarira Mose,

²at’ Uz’ ukore inzumbete zibiri mw ifeza, uzikoze mu buryo bgo gucura; zize zikubere izo guhamagaza ikoraniro, n’izo guhagurutsa amagugu y’abantu aho bashagaje.

³Uko bazivugije, ikoraniro ryose rize rikoranire ah’ uri, ku muryango w’ihema ry’ ibonaniro.

⁴Ni bavuza rumwe gusa, ba bakuru batwara ibihumbi vy’Abisirayeli, abe ari bo bakoranira ah’ uri.

⁵Na ho iyo muvugije ijwi rirengēra, amagugu yo ku ruhande rw’i burasirazuba az’ abe ari yo atangura kugenda.

⁶Maze mwongeye kuvuza ijwi rirengēra, amagugu yo ku ruhande rw’i bumanuko az’ abe ari yo akurikira: ijwi rirengēra rize ribe iryo kuvuzwa ngo bahaguruke.

⁷Ariko ni mwagomba gukoranya ikoraniro, muze muzivuze, ariko ntimuzivuze ijwi rirengēra.

⁸Bene Aroni abaherezi az’ abe ari bo bavuza izo nzumbete, bibabere icagezwe c’intahava, uk’ urunganwe rwanyu ruzogenda rukurikirana.

⁹Kandi ni mwaba mu gihugu canyu, mugatabara kurwanya ababisha babateye, muze muvuze izo nzumbete ijwi rirengēra, maze muzokwibukwa nanje, Uhoraho Imana yanyu, mukizwe abansi banyu.

¹⁰No mu gihe c’umunezero wanyu, no mu misi mikuru yanyu yashinzwe, no ku musi ukwezi kubonetse, izo nzumbete muze muzivugirize hejuru y’ibimazi vyanyu vyo kwoswa, no ku bimazi vyanyu vy’amashikanwa y’ishimwe; zizobabera icibutso imbere yanje: nd’ Uhoraho Imana yanyu.

¹¹Mu mwaka ugira kabiri, mu kwezi kwa kabiri, ku musi wakwo wa mirongwibiri, ca gicu kiradūga, kiva kuri rya hema ry’ Ibishinga intahe.

¹²Abisirayeli barahaguruka, bagenda bakurikirana nk’uko vyashinzwe, bava mu bugaragwa bg’i Sinayi, ico gicu gihagarara mu bugaragwa bg’i Parani.

¹³Urwo rugendo ni rwo rwabaye urwa mbere bāgenda barōngōwe n’ivyo Uhoraho yatumye Mose.

¹⁴Habanje guhaguruka ab’ ibendera y’igugu rya Yuda, nk’ukw imice yabo iri: umukuru w’izo ngabo yari Nahashoni mwene Aminadabu.

¹⁵Umukuru w’ ingabo zo mu muryango wa Isakari yari Netaneli mwene Suwari.

¹⁶Umukuru w’ingabo zo mu muryango wa Zebuloni yari Eliyabu mwene Heloni.

¹⁷Rya hema riraheza rirashingūrwa: aba Gerushoni n’aba Merari, ari bo bājējwe kurirerura, baragenda.

¹⁸Maze hahaguruka ab’ ibendera y’igugu rya Reyubeni, nk’ukw imice yabo iri: umukuru w’izo ngabo yari Elisuri mwene Shedeyuri.

¹⁹Umukuru w’ingabo zo mu muryango wa Simeyoni yari Shelumiyeli mwene Surishadayi.

²⁰Umukuru w’ingabo zo mu muryango wa Gadi yari Eliyasafu mwene Duweli.

²¹Hatako hahaguruka bene Kohati, bareruye ivy’ Ahēra; basanga rya hema bamaze kurishinga.

²²Maze hahaguruka ab’ ibendera y’igugu rya Efurayimu, nk’ukw imice yabo iri: umukuru w’izo ngabo yari Elishama mwene Amihudi.

²³Umukuru w’ingabo zo mu muryango wa Manase yari Gamaliyeli mwene Pedasuri.

²⁴Umukuru w’ingabo zo mu muryango wa Benyamini yari Abidani mwene Gideyoni.

²⁵Maze hahaguruka ab’ ibendera y’igugu rya Dani, ari bo bāherukira izo ngabo zose, nk’ukw imice yabo iri: umukuru w’izo ngabo yari Ahiyezeri mwene Amishadayi.

²⁶Umukuru w’ ingabo zo mu muryango wa Asheri ni Pagiyeli mwene Okirani.

²⁷Umukuru w’ingabo zo mu muryango wa Nafutali yari Ahira mwene Enani.

²⁸Uko ni kw Abisirayeli bākurikirana, nk’ukw imice yabo yari, iyo bafashe urugendo.

²⁹Mose abarira Hobabu, mwene Ruweli sebukwe Umumidiyani, ati Turi mu rugendo tuja mu gihugu Uhoraho yatwemereye kw azoduha; enda n’uze tujane, natwe tuzokugirira neza: kuk’ Uhoraho yasezeranye kugirira Abisirayeli neza.

³⁰Na we aramwishura, at’ Eka ntitujana, ariko nisubiriye mu gihugu cacu no mu b’i wacu.

³¹Aramwishura, ati Ndakwinginze, ntudute; kuk’ urazi ko tugiye kugenda turatāhīra mu bugaragwa, nawe uzotubera kamenyanzira.

³²Kandi ni wajana natwe, ivyiza Uhoraho azotugirira vyose, nawe tuzobikugirira kuno.

³³Nuko barahaguruka, bava ku musozi w’Uhoraho, bagenda urugendo rw’imisi itatu; kand’ isandugu y’isezerano ry’Uhoraho ibaja imbere iyo misi itatu y’urugendo, kugira ngw ibaronderere aho baruhukira.

³⁴Ca gicu c’Uhoraho cirirwa hejuru yabo, iyo bahagurutse bashingūye amahema.

³⁵Maz’ ukw isandugu ihagurutse, Mose yaravuga, at’ Uhoraho, haguruka, ababisha bawe basanzare, abansi bawe baguhunge.

³⁶Iy’ ihagaze, akavuga, at’ Uhoraho, garuka mu masinzi y’ibihumbi vy’Abisirayeli.