Read Bibliya Yera 1951 Guharūra 12 Bible Online

Guharūra 12 - Bibliya Yera 1951 bible

Guharūra 12

¹Miriyamu na Aroni banegura Mose, kubg’ Umunyetiyopiyakazi yābiriye; kuk’ uwo Munyetiyopiyakazi yari yaramwābiriye koko.

²Baravuga, bati Mbeg’ Uhoraho avugisha Mose gusa? Tweho ntatuvugisha? Uhoraho aravyumva.

³Kand’ uwo mugabo Mose yar’ umugwaneza kurusha abantu bose bo mw isi.

⁴Ako kanya Uhoraho abarira Mose na Aroni na Miriyamu, ati Ni murenguke uko muri batatu, muze kw ihema ry’ibonaniro; nuko bararenguka, ukw ari batatu.

⁵Uhoraho amanuka ari muri ya nkingi y’igicu, ahagarara mu muryango w’iryo hema, ahamagara Aroni na Miriyamu, bompi baraza.

⁶Arababarira, ati Ni mwumve amajambo yanje; asangwa muri mwebge har’ uwo mvugisha, jewe Uhoraho nzomwimenyeshereza mw iyerekwa, mvuganire na we mu nzozi.

⁷Arik’ umusavyi wanje Mose si ko bimeze: ayoboka mu rugo rwanje hose.

⁸Uyo we twama twivuganira mu kanwa n’akandi, mfoboye, ntapfinze, kand’ ishusho yanje, jewe Uhoraho, arayibona. None rero n’iki catumye mwubahuka kunegura umusavyi wanje Mose?

⁹Maz’ uburake bg’Uhoraho burabaziriringira, arivumbura.

¹⁰Ca gicu kiva hejuru y’ihema, kiragenda; Miriyamu aca asēsakw imibembe, yera nka shelegi;[7] Aroni amukubisekw amaso, asanga yashēshekw imibembe.

¹¹Aroni abarira Mose, ati Ndakwinginze, mwami wanje, ntuduhōre ico caha, kuko twagize ubupfu, tugakora icaha.

¹²Ndakwinginze, yoye kumera nk’ikivutse gihwereye, kivuye mu nda ya nyina kiriko kirabora.

¹³Nuko Mose atakambira Uhoraho, ati Mana, ndakwinginze, mukize!

¹⁴Uhoraho aramwishura, at’ Iyaba se yamuciriye amate mu maso gusa, ntiyomaze imisi ndwi amāramāra? Ni bamwugaranire inyuma y’aho mushagaje, amare imisi ndwi, aheze abone kugaruka.

¹⁵Nuko bugaranira Miriyamu inyuma y’ aho bashagaje, amara imisi ndwi; maz’ abantu ntibāhaguruka, Miriyamu ataragaruka.

¹⁶Hanyuma barahaguruka, bava i Haseroti, basagaza mu bugaragwa bg’i Parani.