Read Bibliya Yera 1951 Guharūra 13 Bible Online

Guharūra 13 - Bibliya Yera 1951 bible

Guharūra 13

¹Uhoraho abarira Mose,

²ati Tuma abantu, baje gutata igihugu c’i Kanani mpaye Abisirayeli; ukūre umuntu umwe‐umwe mu miryango ya ba sekuruza, asanzwe ari mukuru muri bo.

³Nuko Mose abatuma ari mu bugaragwa bg’i Parani, nk’uk’ Uhoraho yageze: abo yatumye bose bār’ abakuru bo mu Bisirayeli.

⁴Aya ni yo mazina yabo: mu muryango wa Reyubeni hatumwa Shamuwa mwene Zakuri.

⁵Mu muryango wa Simeyoni hatumwa Shafati mwene Hori.

⁶Mu muryango wa Yuda hatumwa Kalebu mwene Yefune.

⁷Mu muryango wa Isakari hatumwa Igalu mwene Yosefu.

⁸Mu muryango wa Efurayimu hatumwa Hoseya mwene Nuni.

⁹Mu muryango wa Benyamini hatumwa Paluti mwene Rafu.

¹⁰Mu muryango wa Zebuloni hatumwa Gadiyeli mwene Sodi.

¹¹Mu muryango wa Yosefu, ari wo muryango wa Manase, hatumwa Gadi mwene Susi.

¹²Mu muryango wa Dani hatumwa Amiyeli mwene Gemali.

¹³Mu muryango wa Asheri hatumwa Seturi mwene Mikayeli.

¹⁴Mu muryango wa Nafutali hatumwa Nakibi mwene Vofusi.

¹⁵Mu muryango wa Gadi hatumwa Geweli mwene Maki.

¹⁶Ayo ni yo mazina y’abantu Mose yatumye gutata ico gihugu; kandi yita Hoseya mwene Nuni, Yosuwa.

¹⁷Nuko Mose abatuma gutata ico gihugu c’i Kanani, arababgira, ati Mudūgane iyi nzira, ica i Negebu, mudūge muje mu mugamba,

¹⁸murābe ico gihugu uko kimeze, n’abantu bakibamwo kw ar’abahizi canke kw ar’ abanyantege nke, murābe n’ukw ari bake canke kw ari benshi;

¹⁹murābe n’ico gihugu babamwo kw ari ciza canke kw ari kibi, n’ibisagara babamwo uko bimeze, ko baba mu mahema canke mu bisagara bizitijwe inzitiro z’amabuye;

²⁰murābe n’ukw ico gihugu kimera canke ko kitamera, kandi ko kirimw’ ibiti canke ko bitarimwo. Kandi mushire ubgoba, muzane ku vyo ico gihugu ceze. Kand’ ico gihe car’ igihe insukoni z’isega zirungurije.

²¹Nuko baradūga, batata ico gihugu, bahereye mu bugaragwa bg’i Zini, bashitsa i Rehobu, hahereranye n’ahafata i Hamati.

²²Mu kudūga bari baciye i Negebu, bashika i Heburoni; Ahimani na Sheshayi na Talumayi, abākomōtse kuri Anaki, ni ho bāba. Kand’ igisagara c’i Heburoni cari kimaze imyaka ndwi cubatswe, igihe Sowani ho muri Egiputa hubakwa.

²³Bashika mu gihogoro citwa Eshikoli, bahaca ishami ririk’ umusoko umwe w’ inzabibu, bawutwara ku munzeganzega ari babiri; bazana no ku makomamanga yaho no ku nsukoni.

²⁴Aho hantu hitwa Igihogoro Eshikoli[8] kubg’ uwo musoko Abisirayeli baciyeho.

²⁵Nuko bagaruka hashize imisi mirongwine, bavuye gutata ico gihugu.

²⁶Bashitse, basanga Mose na Aroni n’ikoraniro ryose ry’Abisirayeli i Kadeshi, mu bugaragwa bg’i Parani. Babīgānira inkuru, hamwe n’iryo koraniro ryose, babereka n’ivyo bamuye mur’ ico gihugu.

²⁷Babarira Mose, bati Twarashitse mu gihugu wadutumyemwo, kandi n’ivy’ ukuri koko gitemba amata n’ubūki; kandi ngivyo ivyo twamuyeyo.

²⁸Mugabo, abantu baba mur’ ico gihugu n’abahizi, kand’ ibisagara vyaho bizitijwe inzitiro z’amabuye, kandi ni binini‐binini cane; eka mbere twabonyey’ Abānaki.

²⁹Kand’ igihugu c’i Negebu kibamw’ Abamaleki, n’umugamba waho ubamw’ Abaheti n’Abayebusi n’Abamori; kand’ ahaherereye ku kiyaga haba Abanyakanani, bo n’ahaherereye kuri Yorodani.

³⁰Maze Kalebu yamira abantu bariko baridodombera Mose, aravuga, ati Ni muze tudūge ubu nyene, tuhashikīre, kuko dushobora rwose kuhatsinda.

³¹Arikw abari baradūganye na we, bati Ntitwoshobora kudūga ngo turwanye abo bantu, kuko baturusha ubuhizi.

³²Babarira Abisirayeli inkuru z’agacavutu z’ico gihugu batase, bat’ Igihugu twanyuragiyemwo tugitata n’igihugu kimiragura abantu baho, kand’ abantu bose twahabonye n’abagabo barebare cane.

³³Kandi twabonyey’ ibigatanya, ari bo Bānaki, bakomōtse ku bigatanya nyene: ku ruhande rwacu twabonye ko tubamezeko nk’inzige, na bo kandi bakabona kw ari ko tumeze.