Read Bibliya Yera 1951 Guharūra 16 Bible Online

Guharūra 16 - Bibliya Yera 1951 bible

Guharūra 16

¹Kora mwene Isihari, Isihari wa Kohati, Kohati wa Lewi, agararizanya na Datani na Abiramu bene Eliyabu, na Oni mwene Peleti, bo mu ba Reyubeni.

²Bakūrira hasi Mose, bafatanije na bamwe mu Bisirayeli b’abakuru b’ishengero amajana abiri na mirongwitanu, abār’ imbere mw ikoraniro, ba rurangiranwa.

³Bikoraniriza hamwe kurwanya Mose na Aroni, barababarira, bat’ Ivyanyu biratunaniye! Ereg’ ishengero ryose n’iryera, iyo bava bakagera, kand’ Uhoraho ari muri bo: none n’iki gituma mwishira hejuru y’ikoraniro ry’Uhoraho?

⁴Mose avyumvise, arapfukama arūnama.

⁵Abgira Kora n’abo bīfatanije bose, at’ Ejo mu gitondo Uhoraho azokwerekana abiwe ab’ ari bo, n’uwera uw’ ari we, amwiyegereze: uwo azotoranya, ni we azokwiyegereza.

⁶Enda ni mugenze murtya: ni mwābīre ivyotero, wewe Kora n’abo mufatanije mwese,

⁷ejo muze mubishiremw’ umuriro, mugerekeko n’imibavu, aho nyene imbere y’Uhoraho: maz’ umuntu Uhoraho azotoranya ni we azoba ar’ uwera. Ivyanyu biratunaniye, namwe mwa Balewi!

⁸Maze Mose abarira Kora, at’ Enda ni mwumve, yemwe Balewi:

⁹mbega mwabigize ivyoroshe kw Imana y’Abisirayeli yabarobanuye mw ishengero ry’Abisirayeli bandi, kugira ngw ibiyegereze, ngo mukore igikorwa co mw ihema ryayo, ari we Uhoraho, ngo muhagarare imbere y’ishengero guhēreza ivyaryo?

¹⁰Ko yabiyegereje, mwe n’ab’i wanyu bose b’Abalewi, none mutayeko murondera n’ubuherezi na bgo?

¹¹Ereg’ Uhoraho ni we mugararije, mwe n’abo mufatanije bose: na we Aroni n’iki, aho mumwidodombera?

¹²Maze Mose ahamagaza Datani na Abiramu, bene Eliyabu; na bo baravuga, bat’ Eka ntitumwitaba na mba;

¹³mbega yabigize ivyoroshe kudukūra mu gihugu gitemba amata n’ubūki, ngw adutsinde mu bugaragwa, kand’ akagerekakw akīgira umutware wacu?

¹⁴Kandi ntiyatujanye mur’ ico gihugu kindi gitemba amata n’ubūki nyene, canke ngw aduhe amashamvu y’amatongo n’ inzabibu. Mbeg’ agomba kunogora aba bantu amaso? Eka ntitumwitaba na mba!

¹⁵Mose araraka cane, asaba Uhoraho, ati Ntiwemere amashikanwa yabo; urazi kw ata we nanyaze indogoba n’imwe, canke ngo hagire n’umwe nagiriye nabi.

¹⁶Maze Mose abarira Kora, ati Mwe n’abo ku ruhande rwawe bose, ejo muze muze imbere y’Uhoraho: wewe ubgawe, n’abo nyene, muzanane na Aroni;

¹⁷kand’ umuntu wese muri mwebge aze yābīre icotero ciwe, mubishirekw imibavu, mubizane imbere y’Uhoraho, umuntu wese icotero ciwe, ukw ar’ amajana abiri na mirongwitanu; nawe nyene mwe na Aroni muzane ivyotero vyanyu.

¹⁸Nuk’ umuntu wese muri bo yābīra icotero ciwe, agishiramw’ umuriro, agerekakw imibavu, bahagararana na Mose na Aroni ku muryango w’ihema ry’ibonaniro.

¹⁹Kora akoraniriza ishengero ryose ku muryango w’iryo hema kubarwanya. Maz’ ubgiza bg’ Uhoraho bubonekera iryo shengero ryose.

²⁰Uhoraho abarira Mose na Aroni,

²¹ati Ni mwitandukanye n’iri shengero, ndarirandure mu kanya isase.

²²Baca barapfukama barūnama, bati Mana, yewe Mana y’impwemu z’abari n’umubiri bose, umuntu umwe akoze icaha, mbega woca urakira ishengero ryose?

²³Uhoraho abarira Mose,

²⁴ati Barira ishengero, uti Ni mwīgireyo, muve ku mpande zose z’amahema ya Kora na Datani na Abiramu.

²⁵Nuko Mose ava hasi, aja aho Datani na Abiramu bari; abakuru bo mu Bisirayeli baramukurikira.

²⁶Abarira ishengero, ati Ni mwīgireyo, muve ku mpande zose z’amahema y’izi nkozi z’ibibi, ntimugire ikintu cabo na kimwe mukorako, kugira ngo ntimuranduranwe na bo mu guhanirwa ivyaha vyabo vyose.

²⁷Nuko bīgirayo, bava ku mpande zose z’amahema ya Kora na Datani na Abiramu; Datani na Abiramu barasohoka, bahagararana mu miryango y’amahema yabo n’abagore babo n’abahungu babo n’abana babo bato‐bato.

²⁸Mose aravuga, at’ Iki ni co kigira ngo kibamenyeshe yuk’ Uhoraho ari we yantumye gukora ibi bikorwa nkora vyose, kandi kw atari jewe nitumye.

²⁹Aba bantu ni bapfa urupfu rupfa abandi bantu bose, bakāzwako n’ibiza ku bandi bose, Uhoraho azoba atāntumye.

³⁰Arik’ Uhoraho ni yakora ikintu c’inzeduka, isi ikāsama, ikabamirana n’ivyabo vyose, bakamanuka i kuzimu bakibona, muca mumenya yukw aba bantu bakengereye Uhoraho.

³¹Agiheza kuvuga ayo majambo yose, aho nyene bahagaze isi irasaduka,

³²irāsama, ibamirana n’ingo zabo, n’abantu bose ba Kora, n’ibintu vyabo vyose.

³³Nuko bo n’ivyabo vyose bamanuka i kuzimu, isi ibarengako, bararanduka, bazimangana mur’ iryo shengero.

³⁴Abisirayeli bose bāri babakīkije barahunga bumvise ugutaka kwabo, bat’ Isi yoye kutumira natwe.

³⁵Umuriro uva k’Uhoraho, uyigiza ba bagabo amajana abiri na mirongwitanu bosheje imibavu.

³⁶Uhoraho abarira Mose,

³⁷ati Barira Eleyazari mwene Aroni umuherezi, yōkōre ivyotero vyabo mur’ uwo muriro, nawe usēse umuriro wo muri vyo hirya; kukw ivyo vyotero ar’ ivyera, vyacitse inyegu.

³⁸Maz’ ivyo vyotero vy’ abo banyavyaha nyene bīhamagariye kugesera, babicuremw’ ibintu bibāse vyo kwomeka ku gicaniro, kuko bāvyīgije hafi imbere yanje, jewe Uhoraho, bigatuma biba ivyera, bigacika inyegu: kandi bizobera Abisirayeli ikimenyetso.

³⁹Nuko Eleyazari umuherezi yābīra ivyo vyotero vy’imiringa, ivyo abāyigiye bari bīgije hafi; babibādikamw’ ivyo kwomeka ku gicaniro,

⁴⁰ngo bibere Abisirayeli icibutso, kugira ngo ntihagire umuntu atar’ uwo mu ruvyaro rwa Aroni yīgira hafi kwosereza imibavu imbere y’Uhoraho; kugira ngo ntabe nka Kora n’abafatanije na we. Nuko Eleyazari abikora nk’uk’ Uhoraho yari yarabariye Mose.

⁴¹Bukeye bgaho, ishengero ryose ry’Abisirayeli ryidodombera Mose na Aroni, riti Ni mwebge mwishe abantu b’Uhoraho.

⁴²Maz’ iryo shengero rikoraniye kurwanya Mose na Aroni, bagize ngo bararāba ihema ry’ibonaniro, babona ca gicu kiritwikiriye, ubgiza bg’Uhoraho buraboneka.

⁴³Mose na Aroni baja imbere y’iryo hema.

⁴⁴Uhoraho abarira Mose,

⁴⁵ati Ni mwīgireyo, muve mur’ iri shengero, ndarirandure mu kanya isase. Baca barapfukama, barūnama.

⁴⁶Mose abarira Aroni, at’ Abīra icotero cawe, ugishiremw’ umuriro uwukūye ku gicaniro, ugerekekw imibavu, ukijane n’ingoga mw ishengero, ubahongere: kuko haje uburake buvuye k’Uhoraho, ikīza kikaba gitanguye gutēra.

⁴⁷Nuko Aroni aracābīra, nk’uko Mose amubariye, arirukanga, aja mw ikoraniro hagati, asanga ikīza kimaze gutangura gutēra mu bantu: ashirakw iyo mibavu, ahongera abantu.

⁴⁸Ahagarara hagati y’imivyimba n’abagikomeye, ikīza kirashira.

⁴⁹Abishwe n’ ikīza bār’ abantu ibihumbi cumi na bine n’amajana ndwi, udashizemw’ abicishijwe n’ivya Kora.

⁵⁰Aroni araheza asubira aho Mose ari ku muryango w’ihema ry’ibonaniro; nukw ikīza kirashira.