Read Bibliya Yera 1951 Guharūra 19 Bible Online

Guharūra 19 - Bibliya Yera 1951 bible

Guharūra 19

¹Uhoraho abarira Mose na Aroni,

²at’ Ibi ni vyo bibgirijwe n’icagezwe jewe Uhoraho nshinze: Barira Abisirayeli bakuzanire inka y’iriza y’akagajo itagira ibara cank’ agasembga, itigeze gukoreshwa igikorwa na kimwe.

³Muyihe Eleyazari umuherezi, ijanwe inyuma y’aho mushagaje, ikerererwe imbere yiwe.

⁴Maze Eleyazari umuherezi akoze urutoke mu maraso yayo, ahagarare ahatumberanye n’umuryango w’ihema ry’ibonaniro, ayacucagire ibihetangabo ndwi.

⁵Iyo nka iheze ituririrwe aho nyene imbere yiwe; iturirwe yose, uhereye ku rusato rwayo n’inyama zayo n’ubuseri bgayo n’amayezi yayo.

⁶Maz’ umuherezi yābīre ingegene y’igiti c’isederi, n’utubabi twa ezobu, n’utunyuzi dusa n’agahama, abiterere hagati mu muriro ah’ iyo nka ituririwe.

⁷Uwo muherezi aheze amesure impuzu ziwe, yiyuhagire, abone gusubira aho mushagaje, akomeze abe ūhumanye gushitsa ku mugoroba.

⁸Uwayituriye na we nyene amesure impuzu ziwe, yiyuhagire, akomeze kuba ūhumanye gushitsa ku mugoroba.

⁹Umuntu adahumanye ayore umunyota w’iyo nka, awubīke inyuma y’aho mushagaje, ahantu hadahumanye, ubīkirwe ishengero ry’Abisirayeli, ngo baze bawutobe mu mazi, abe ayo guhumanura: ivyo bizoba ivyo gukūra ivyaha.

¹⁰Ūyoye umunyota wayo amesure impuzu ziwe, akomeze kuba ūhumanye gushitsa ku mugoroba. Ivyo bize bibere Abisirayeli n’ umunyamahanga aba muri bo, ibgirizwa ry’intahava.

¹¹Ūzokora ku kiziga c’umuntu uw’ ari we wese azoba ahumanye kumara imisi ndwi:

¹²aze yihumanuze ayo mazi ku musi ugira gatatu no ku wugira indwi, abone guhumanuka; ariko n’atihumanura kur’ uwo musi ugira gatatu no ku wugira indwi, ntazoba ahumanutse.

¹³Ūzokora ku kiziga c’umuntu uw’ ari we wese, ntiyihumanuze, azoba ahumanije ihema ryanje, jewe Uhoraho; uwo muntu az’ acibge mu Bisirayeli. Kw azoba atāmījwekw ayo mazi ahumanura, azoba agihumanye: azoba akirik’ ubuhumane bgiwe.

¹⁴Iki ni co cagezwe co ku muntu aguye i we mw ihema: umuntu wese azokwinjira mur’ iryo hema, n’ūzoba yari muri ryo wese, bazoba bahumanye kumara imisi ndwi.

¹⁵Kand’ ikintu cose gisanzwe kirāngāye, kitarumijek’ umutemere, kizoba gihumanye.

¹⁶Kand’ umuntu azoba ari ku gahinga, agakora ku kiziga c’ umuntu yishwe n’inkota, canke ku kindi kiziga cose, canke kw igufa ry’umuntu, canke ku mva, azoba ahumanye kumara imisi ndwi.

¹⁷Ūhumanye bamukamatire kuri wa munyota wa ca kimazi co gukūra ivyaha caturiwe, bawutobe mu mazi yavomwe mu mbizi, babikoreye mu rwavya.

¹⁸Umuntu adahumanye aheze yābīre utubabi twa ezobu, atujobeke mur’ ayo mazi, ayacucagire kuri rya hema, no ku mbombovu zose, no ku bantu bāri muri ryo, no ku wakoze kw igufa canke ku wishwe canke ku kiziga kindi canke ku mva.

¹⁹Kand’ uwo muntu adahumanye az’ acucagire k’ūhumanye ku musi ugira gatatu no ku wugira indwi: nuko ku musi ugira indwi amuhumanure; na we aheze amesure impuzu ziwe, yiyuhagire, maze ku mugoroba azoba ahumanutse.

²⁰Arik’ umuntu azoba ahumanye, ntiyihumanuze, uwo muntu az’ acibge mw ishengero, kukw azoba ahumanije Ahēra hanje, jewe Uhoraho; ayo mazi ahumanura kw azoba atayamijweko, azoba agihumanye.

²¹Iryo rize ribabere ibgirizwa ry’ intahava. Kand’ ūzoba acucagiye ayo mazi ahumanura az’ amesure impuzu ziwe; ūzoyakorako azoba ahumanye gushitsa ku mugoroba.

²²Kand’ ikintu cose ūhumanye azokorako na co kizoba gihumanye: ūzogikorako azoba ahumanye gushitsa ku mugoroba.