Read Bibliya Yera 1951 Guharūra 20 Bible Online

Guharūra 20 - Bibliya Yera 1951 bible

Guharūra 20

¹Ishengero ryose ry’Abisirayeli rishika mu bugaragwa bg’i Zini mu kwezi kwa mbere: abo bantu bamara igihe i Kadeshi. Miriyamu agwaho, bamuhamba aho nyene.

²Iryo shengero ribura amazi: bakoranira kurwanya Mose na Aroni.

³Abo bantu batonganya Mose, baramubarira, bat’ Es’ iyo dupfa ca gihe bene wacu bapfira imbere y’Uhoraho!

⁴Kandi mwazaniye iki ishengero ry’ Uhoraho mur’ ubu bugaragwa, ngo tubugwemwo, twe n’ivyo dushoreye?

⁵Mwadukūriye iki muri Egiputa, mukatuzana aha hantu habi? S’ahantu harimwa, s’ahantu hamera imisukoni cank’ imizabibu cank’ amakomamanga; kandi ntihagira n’amazi yo kunywa.

⁶Mose na Aroni bava imbere y’iryo koraniro, baja ku muryango w’ihema ry’ibonaniro, barapfukama barūnama; maz’ ubgiza bg’ Uhoraho burababonekera.

⁷Uhoraho abarira Mose,

⁸at’ Abīra ya nkoni, muheze mukoranye iryo shengero, mwe na Aroni mukurwawe, mubaririre igitandara imbere yabo gisendanishe amazi yaco; ubakūrire amazi mur’ ico gitandara, uhe iryo shengero n’ ivyo bashoreye amazi yo kunywa.

⁹Nuko Mose yābīra iyo nkoni, ayikūye imbere y’Uhoraho, uko yamubariye.

¹⁰Mose na Aroni bakoraniriza iryo koraniro imbere y’ico gitandara, maze Mose arababarira, ati Ni mwumve, mwa bagarariji mwe! Mbega twebge twobakūrira amazi mur’ iki gitandara?

¹¹Mose araheza amanika ukuboko, akubita ico gitandara inkoni yiwe kabiri: amazi menshi aca arasendanisha, iryo shengero riranywa, bo n’ivyo bashoreye.

¹²Uhoraho abarira Mose na Aroni, ati Ko mutanyizeye, ngo mwerekane ukwera kwanje imbere y’Abisirayeli, ntimugishikanye iri koraniro mu gihugu nemeye ko nzobaha.

¹³Ayo ni yo mazi y’i Meriba,[10] kukw Abisirayeli batonganije Uhoraho, akerekanira ukwera kwiwe muri bo.

¹⁴Bar’ i Kadeshi, Mose atuma intumwa ku mwami wa Edomu, ngo zimubgire, zit’ Isirayeli murumunawe ng’ Urazi amagorwa babonye yose,

¹⁵ingene ba sekuruza bamanutse muri Egiputa, bakahamara igihe kirekire, Abanyegiputa bakabagirira nabi, bose uhereye no kuri ba sekuruza.

¹⁶Maze batakambiye Uhoraho, yumva ijwi ryabo, atuma umumarayika, abakūra muri Egiputa. Ngo Non’ ehe rāba, bar’ i Kadeshi, igisagara co ku rubibe rwawe.

¹⁷Ngo N’ubemerere bace mu gihugu cawe; ngo Ntibazogira umurima cank’ uruzabibu bacamwo, canke ngo banywe ku mazi yo mu mariba; ngo Bazogumya inzira y’iroro, ngo Ntibazokevya ngo baje i buryo cank’ i bumoso, gushitsa aho bazorangiriza igihugu cawe.

¹⁸Umwami wa Edomu arishura, at’ Eka ntimuzoca mu gihugu canje, nobategesha inkota.

¹⁹Abisirayeli barishura, bati Tuzoca mu nzira y’iroro gusa, kandi twebge n’ivyo dushoreye ni twanywa amazi yo mu gihugu cawe, tuzotanga ic’ uzocira: reka twihitire gusa, nta kindi tuzokora.

²⁰Arabahakanira, at’ Eka ntimuzohaca. Umwami wa Edomu abategesha ingabo nyinshi, ziri n’ubuhizi bginshi.

²¹Uko ni k’umwami wa Edomu yanse kw Abisirayeli baca mu gihugu ciwe; ni co catumye Abisirayeli bahindukira bakahareka.

²²Bava i Kadeshi, baragenda; ishengero ryose ry’Abisirayeli rishika ku musozi Hori.

²³Uhoraho abaririra Mose na Aroni ku musozi Hori, ku rubibe rw’igihugu ca Edomu,

²⁴ati Aroni agiye gutāmbūra, ahamvye ababo; ntakigiye mu gihugu nemeye guha Abisirayeli, kuko mwanse kwumvira ijambo ryanje, muri ku mazi y’i Meriba.

²⁵Jana Aroni na Eleyazari umwana wiwe, ubadūgane umusozi Hori:

²⁶uheze wambure Aroni imyambaro yiwe, uyambike Eleyazari umwana wiwe; aho ni ho Aroni aja gupfira, ahamvye ababo.

²⁷Nuko Mose abigenza nk’uk’ Uhoraho yamubariye: badūga uwo musozi Hori, ishengero ryose rirorēra.

²⁸Mose yambura Aroni imyambaro yiwe, ayambika Eleyazari umwana wiwe; maze Aroni apfira ngaho, ku mpinga y’uwo musozi. Mose na Eleyazari baramanuka.

²⁹Ishengero ryose ribonye ko Aroni apfuye, iyo nzu yose ya Isirayeli bamara imisi mirongwitatu bamuririra.