Read Bibliya Yera 1951 Guharūra 21 Bible Online

Guharūra 21 - Bibliya Yera 1951 bible

Guharūra 21

¹Umwami w’i Aradi w’Umunyakanani, wo mu gihugu c’i Negebu, yumva kw Abisirayeli baje bazananye inzira itumbereye Atarimu, arabarwanya, afata mpiri bamwe muri bo.

²Abisirayeli basezeranira Uhoraho isezerano, bati Ni wagabura aba bantu mu maboko yacu, tuzokomvomvora ibisagara vyabo.

³Uhoraho yumvira Abisirayeli, agabura abo Banyakanani mu maboko yabo; babakomvomvorana n’ibisagara vyabo: aho hantu haca hitwa Horuma.[11]

⁴Bavuduka ku musozi Hori, bajana inzira ija ku Kiyaga Gitukura kugira ngo bagendane urubibe rw’igihugu ca Edomu; abantu bīhebūzwa cane n’urwo rugendo,

⁵batonganya Imana na Mose, bati Mwadukūriye iki muri Egiputa, mukatuzana gupfira mur’ ubu bugaragwa? kw ata vyo kurya tuharonka, ata n’amazi ariho, kandi tubihiwe n’ibi vyo kurya bitagira ikimazi.

⁶Maz’ Uhoraho atērēra abantu inzoka z’ubumara buturira, zirabakomora; abantu benshi bo mu Bisirayeli barapfa.

⁷Abantu baza kuri Mose, bati Twakoze icaha, kuko twatonganije Uhoraho nawe; udusabire k’Uhoraho, adukūremw’ izi nzoka. Nuko Mose arabasabira.

⁸Maz’ Uhoraho abarira Mose, ati Cura inzoka isa n’izo, uyimanike ku giti c’intumba, maz’ uwakomowe wese ni yayirāba, arakira.

⁹Nuko Mose acura inzoka mu miringa, ayimanika ku giti c’ intumba, maz’ uwo inzoka yariye wese, yarāba iyo nzoka y’umuringa, agakira.

¹⁰Abisirayeli barahaguruka, basagaza ahitwa Oboti.

¹¹Bavuduka Oboti, basagaza ahitwa Iye‐abarimu, mu bugaragwa burābana n’i Mowabu ku ruhande rw’i burasirazuba.

¹²Bavudukayo, basagaza ku mwonga witwa Zeredi.

¹³Bavudukayo, basagaza hakurya ya Arunoni rwo mu bugaragwa, ruturuka mu gihugu c’ Abamori: kuko Arunoni ari rwo rugabano rw’i Mowabu, rugabanya Mowabu n’Abamori.

¹⁴Ni co gituma vyaravuzwe mu gitabo c’Intambara z’Uhoraho, ngo Vahebu h’i Sufa, Bo n’imyonga yo kuri Arunoni,

¹⁵N’agahanamo ko ku myonga Kamanuka kerekeye ah’i Ari hatabamye, Kakegamira urugabano rw’i Mowabu.

¹⁶Bavudukayo bashika i Beri; aho ni ha handi Beri Uhoraho yabaririra Mose, ati Koranya abantu, ndabahe amazi;

¹⁷Abisirayeli bagaca baririmba iyi ndirimbo, bati Dudubiza, wa Riba! Ni murivugirize impundu!

¹⁸Iri ni ryo riba ryimbge n’abaganza, Abakomeye baganza abantu bimbishije icumu ry’ubugabe, N’inkoni zabo. Bahaguruka mur’ ubgo bugaragwa, bashika i Matana;

¹⁹bavuduka i Matana, bashika i Nahaliyeli; bavuduka i Nahaliyeli bashika i Bamoti;

²⁰bavuduka i Bamoti bashika ku mwonga uri mu gihugu c’i Mowabu, hafi y’agatwe ka Pisiga gahanamiye ubugaragwa.

²¹Abisirayeli batuma intumwa kuri Sihoni umwami w’Abamori, ngo zimubgire,

²²ziti Bareke bace mu gihugu cawe; ngo Ntibazokevya ngo bagire umurima cank’ uruzabibu bakandagiramwo, canke ngo banywe ku mazi yo mu mariba; ngo Bazogumya inzira y’iroro gushitsa aho bazorangiriza igihugu cawe.

²³Ariko Sihoni ntiyakundira Abisirayeli ko baca mu gihugu ciwe; akoranya ingabo ziwe zose, aja kubategera mu bugaragwa. Ashitse i Yahasi, arumana na bo.

²⁴Abisirayeli bamutsindisha inkota, baca begukira igihugu ciwe, uhereye ku ruzi Arunoni ugashitsa ku ruzi Yaboki, bakagarukira ku gihugu c’Abamoni: kuko Yazeri hāri ku rugabano rw’Abamoni.

²⁵Abisirayeli banesha ivyo bisagara vyose, baba mu bisagara vyose vy’Abamori, i Heshiboni no mu bisagara vyose bihereranye na ho.

²⁶Kukw i Heshiboni war’ umurwa wa Sihoni umwami w’Abamori, yari yararwanije umwami w’i Mowabu wo ku ngoma yahise, akamunyaga igihugu ciwe cose gushitsa kuri Arunoni.

²⁷Ni co gituma abatika ibitiko bavuga, bati Ni muze i Heshiboni, muhubake, Umurwa wa Sihoni n’ukomezwe:

²⁸Kuk’ umuriro waturutse i Heshiboni, Urubeya rukaba rwavuye ku murwa wa Sihoni, Rugatōngōra Ari h’i Mowabu, Gushitsa no ku baba ku mpinga z’imisozi yo kuri Arunoni.

²⁹Ewe Mowabu, ubonye ibara! Murageseye, mwa bantu ba Kemoshi! Yagabuye abahungu biwe baba impunzi, N’abakobga biwe baba inyagano Ya Sihoni umwami w’Abamori.

³⁰Twarabarashe: i Heshiboni baratikira gushitsa n’i Diboni, Twaragesheje dushitsa n’i Nofaki, Hafi y’i Medeba.

³¹Uko ni kw Abisirayeli babaye mu gihugu c’Abamori.

³²Maze Mose atuma gutata i Yazeri, banesha ibisagara vyaho, birukana Abamori bābayo.

³³Barahindukira, baradūga, bajana inzira ija i Bashani: Ogi umwami w’i Bashani abategesha ingabo ziwe zose; intambara irumanira ahitwa Edireyi.

³⁴Uhoraho abarira Mose, ati Ntumutinye, kuko ndamugabuye mu maboko yawe, bo n’ingabo ziwe zose n’igihugu ciwe; nawe uz’ umugirire nk’uko wagiriye Sihoni umwami w’Abamori, yaba i Heshiboni.

³⁵Nuko bamukekana n’ abahungu biwe n’abantu biwe bose, ntihasigara n’uwa kirazira: baraheza begukira igihugu ciwe.