Read Bibliya Yera 1951 Guharūra 23 Bible Online

Guharūra 23 - Bibliya Yera 1951 bible

Guharūra 23

¹Balamu abarira Balaki, ati Nyubakishiriza hano ibicaniro ndwi, unzanire aha nyene amamasa ndwi n’amasuguru y’ intama ndwi.

²Nuko Balaki abigenza nk’uko Balamu amubariye, maze Balaki na Balamu batangira ku gicaniro cose imasa n’isuguru.

³Balamu abarira Balaki, ati N’uhagarare hambavu y’ ibimazi vyawe vyoshejwe, nanje ndagiye: kumbure Uhoraho araza guhūra nanje; maz’ ico aribunyereke cose ndakikubarira. Nukw aragenda, aja ku mpinga y’umusozi mu ruharabuga.

⁴Maz’ Imana iraza, ihūra na Balamu, arayibarira, ati Natunganije ibicaniro ndwi, ntangira kuri kimwe‐kimwe imasa n’isuguru y’intama.

⁵Maz’ Uhoraho ashira amajambo mu kanwa ka Balamu, aramubarira, ati Subira kuri Balaki, uvuge urtya n’urtya.

⁶Nukw asubira kuri we, asanga agihagaze hambavu ya vya bimazi vyiwe vyoshejwe, bo na ba bamenyekana bose b’i Mowabu.

⁷Atangura kuvugishwa, ati Balaki yankūye muri Aramu, Umwami w’i Mowabu yankūye mu misozi y’i burasirazuba, Ati Ngwino umvumire aba Yakobo, Ngwino wīrabire akaranga Abisirayeli.

⁸Novuma nte abo Imana itāvumye? Nokwīrabira akaranga nte abo Imana itīrabiye akaranga?

⁹Kuko nababonye mpagaze hejuru ku bitandara, Nkabitegereza mpagaze ku misozi. Rāba, n’ihanga ryībēra ukwaryo, Ritīharūra mu yandi mahanga.

¹⁰Ni nde yoshobora guharūra umukungugu, ari bo ba Yakobo? Canke ngw aharūre n’ikigira kane c’Abisirayeli? Icompa nkazokwipfira nk’ukw abagororotsi bapfa, Iherezo ryanje rikazoba nk’ iryabo!

¹¹Maze Balaki abaza Balamu, at’ Unkoreye iki? Nakuzaniye kumvumira abansi, non’ urabahezagiye gusa!

¹²Aramwishura, ati Mbega sinkwiye kwirinda, ngw ico Uhoraho anshira mu kanwa abe ari co mvuga?

¹³Balaki aramubarira, at’ Enda ngwino tuje ahandi, ah’ ushobora kubabona; ubona uruhande rumwe rwabo rwonyene, si bose: uheze ubamvumire uhagazeho.

¹⁴Nukw amujana mu gahinga k’i Sofimu, amushikana ku gatwe ka Pisiga, ahubaka ibicaniro ndwi, atangira kuri kimwe‐kimwe imasa n’isuguru y’intama.

¹⁵Maze Balamu abarira Balaki, ati N’uhagarare hano hambavu y’ibimazi vyawe vyoshejwe, nanje nje guhūrira n’Uhoraho hariya.

¹⁶Nuk’ Uhoraho araza, ahūra na Balamu, ashira amajambo mu kanwa kiwe, aramubarira, ati Subira kuri Balaki, uvuge urtya n’urtya.

¹⁷Nukw asubira kuri we, asanga agihagaze hambavu ya vya bimazi vyiwe vyoshejwe, ari kumwe na ba bamenyekana b’i Mowabu. Balaki aramubaza, at’ Uhoraho yavuze iki?

¹⁸Atangura kuvugishwa, ati Haguruka, Balaki, wumve, Ntegera ugutwi, ewe mwene Sipori.

¹⁹Ereg’ Imana s’umuntu ngw ibeshe, Kandi s’umwana w’umuntu ngo yisubiremwo! Ivyo yavuze, mbega ntizobikora? Ivyo yashinze ntizobishitsa?

²⁰Rāba, nabariwe kubahezagira: Na yo yarabahezagiye, nanje sinshobora kubihindura.

²¹Nta bigabitanyo ibonye mu ba Yakobo, Nta bugoryi ibonye mu Bisirayeli: Uhoraho Imana yabo ari kumwe na bo, Muri bo hasēserezwa impundu z’Umwami.

²²Imana yabakūye muri Egiputa; Bītwaje amahembe nk’ay’ imbogo.

²³Ereg’ indagu nta co yotwara aba Yakobo, Cank’ ubupfumu ngo bugire ico butwara Abisirayeli. None biravugwa ku ba Yakobo no ku Bisirayeli, Ngw Ewe kuntu Imana yakoze!

²⁴Rāba, iryo hanga ribaduka nk’ intambge y’ingore, Rivumbuka nk’intambge y’ ingabo: Ntiriryama ritariye ico ryishe, Ritanyoye amaraso y’abishwe.

²⁵Balaki abarira Balamu, at’ Ar’ ukubavuma, ar’ ukubahezagira, pfuma ubireka vyose!

²⁶Maze Balamu yishura Balaki, ati Sinakubariye yukw ico Uhoraho azovuga cose ari co nkwiye gukora?

²⁷Balaki abarira Balamu, ati Ngwino nkujane ahandi: kumbure Imana yokunda k’ubamvumira uhagazeyo.

²⁸Nuko Balaki ajana Balamu ku gatwe ka Peyori gahanamiye ubugaragwa.

²⁹Balamu abarira Balaki, ati Nyubakishiriza hano ibicaniro ndwi, unzanire aha nyene amamasa ndwi n’amasuguru y’intama ndwi.

³⁰Nuko Balaki abigenza nk’uko Balamu amubariye, atangira ku gicaniro cose imasa n’isuguru.