Read Bibliya Yera 1951 Guharūra 24 Bible Online

Guharūra 24 - Bibliya Yera 1951 bible

Guharūra 24

¹Balamu abonye yuk’ Uhoraho akunda guhezagira Abisirayeli, ntiyagenda nk’ubga mbere kurondera ubumenyi, ariko yerekeza amaso yiwe mu bugaragwa.

²Balamu yunamura amaso, abona Abisirayeli bashagaje nk’ukw imiryango yabo iri; Mpwemu w’ Imana amuzako.

³Atangura kuvugishwa, at’ Uku ni ko Balamu mwene Beyori avuga, Ni k’umuntu yar’ ahumirije amaso avuga,

⁴Ni k’uwumva amajambo y’ Imana avuga, Akerekwa Īshobora vyose nko mu nzozi, Akīkubita hasi, arikw ahumūye amaso:

⁵At’ Ewe kuntu amahema yanyu ari meza, yemwe aba Yakobo, Ukuntu imihana yanyu ari myiza, yemwe Abisirayeli!

⁶Imeze nk’imishoka y’imyonga ishika kure, Nk’imirima igendanye uruzi, Nk’imibazibazi itewe n’Uhoraho, Nk’ibiti vy’amasederi bimeze i ruhande y’amazi.

⁷Imibindi yabo izosesekara amazi, Imbuto zabo zizoba ahar’ ibigera vy’amazi menshi; Umwami wabo azosumba Agagi, Ubgami bgabo buzoshirwa hejuru.

⁸Imana yabakūye muri Egiputa; Bītwaje amahembe nk’ay’ imbogo. Bazotsontsomera amahanga ari bo barwanizi babo, Bamenagure amagufa yabo, Babatobekeranishe imyampi yabo.

⁹Barabunze, baryama nk’intambge, Mbere nk’intambge y’ingore: ni nde yohāngāra kubavyutsa? Ūzobahezagira na we ahezagirwe, Ūzobavuma na we avumwe.

¹⁰Maz’ uburake bga Balaki buziriringira Balamu, akubita amashi ku yandi; abarira Balamu, ati Naguhamagariye kumvumira abansi, non’ ehe rāba, urabahezagiye gusa ibihetangabo gatatu kose!

¹¹None genda mva imbere, taha i wawe. Nari niyumviriye kuguha icubahiro, ariko non’ Uhoraho arakikwimishije!

¹²Balamu yishura Balaki, ati Sinabariye intumwa zawe wantumyeko,

¹³nti Balaki naho yompa ifeza n’izahabu vyuzuye inzu yiwe, sinoshobora gukora ikinyurana n’ijambo ry’Uhoraho, ngo nkore iciza cank’ ikibi nigeneye? Nt’ Ico Uhoraho azombarira cose ni co nzovuga?

¹⁴Nuko rero ndatashe, ariko hinge nkumenyeshe ivyo bariya bantu bazogirira abawe mu bihe bizoza.

¹⁵Nukw atangura kuvugishwa, at’ Uku ni ko Balamu mwene Beyori avuga, Ni k’umuntu yar’ ahumirije amaso avuga,

¹⁶Ni k’uwumva amajambo y’ Imana avuga, Agatakw akamenya ubgenge bg’ Īsumba vyose, Akerekwa Īshobora vyose nko mu nzozi, Akīkubita hasi, arikw ahumūye amaso:

¹⁷Ati Ndamubona, ariko s’ubu nyene; Ndamwitegereza, ariko ntari hafi. Inyenyeri izokomōka muri Yakobo, Icumu ry’ubugabe rizosokoroka muri Isirayeli, Ritobekeranye aba Mowabu mu mvuridahita, Rimene umutwe aba Sheti bose.

¹⁸Edomu bazohagira inyurwa, Bagire inyurwa i Seyiri, ahāhora ar’ umwansi wabo; Abisirayeli bazokora ivy’ ubuhizi.

¹⁹Muri Yakobo hazova ūganza, Azogeseza amasigarira yo mu bisagara.

²⁰Maz’ atuma amaso Abamaleki, yongera kuvugishwa, at’ Abamaleki bār’ aba mbere mu mahanga; Arikw iherezo ryabo n’ukuzorandurwa.

²¹Maz’ atuma amaso Abanyakeni, yongera kuvugishwa, at’ Aho mwībēra harakomeye: Icāri canyu kiri hejuru ku gitandara!

²²Yamara mwa Banyakeni, muzogesezwa! Bizoba ryari? Bizoba ah’ Abashuri bazobajana mur’ inyagano.

²³Yongera kuvugishwa, at’ Emwe n’ibara! Ni nde azoshobora kubaho, igihe Imana izokora ivyo?

²⁴Arikw amato azoza, aturutse ku nkombe y’i Kitimu, Aneshe Ashuri, aneshe na Eberi, Maze na bo nyene bazorandurwa.

²⁵Nuko Balamu ava hasi, aragenda, ataha i we; Balaki na we arīgīra.