Read Bibliya Yera 1951 Guharūra 25 Bible Online

Guharūra 25 - Bibliya Yera 1951 bible

Guharūra 25

¹Abisirayeli batebeye i Shitimu, abantu batangura gusambana n’Abanyamowabukazi:

²kuko bābatumira ngo baze gusangira na bo ibimazi vy’ibigirwamana vyabo: nukw abo bantu bakabiryako, bakūnamira ivyo bigirwamana vyabo.

³Abisirayeli bīfatanya na Bayali y’i Peyori, uburake bg’Uhoraho burabaziriringira.

⁴Uhoraho abarira Mose, ati Jana n’abakuru bose baganza abantu, umanike abakoze ivyo imbere yanje, ubānikire ku zuba, kugira ng’ uburake bganje bg’inkazi buve ku Bisirayeli.

⁵Nuko Mose abarira abacamanza b’Abisirayeli, at’ Umuntu wese muri mwebge ni yice mu bo atwara abīfatanije na Bayali y’i Peyori.

⁶Bagize bartya, umwe mu Bisirayeli azana Umumidiyanikazi amushikana mu b’i wabo, amwātātana imbere ya Mose n’imbere y’ ishengero ryose ry’Abisirayeli, aho bāriko bararirira ku muryango w’ihema ry’ibonaniro.

⁷Maze Finehasi mwene Eleyazari, Eleyazari wa Aroni umuherezi, abibonye, ava hasi hagati mw ishengero, ahitana icumu,

⁸akurikira wa mugabo w’Umwisirayeli haruguru mw ihema ryiwe, abatobekeranisha icumu bompi, wa mugabo w’Umwisirayeli na wa mugore, umugore rimutobekeranya mu nda. Uko ni kw ikīza cābogojwe mu Bisirayeli.

⁹Abishwe n’ico kīza bār’ ibihumbi mirongwibiri na bine.

¹⁰Uhoraho abarira Mose,

¹¹ati Finehasi mwene Eleyazari, Eleyazari wa Aroni umuherezi, ahwamitse uburake bganje, atumye buva ku Bisirayeli, kuko yarwaniye ifūhe ryanje muri bo, bigatuma ntarandura Abisirayeli kubg’ iryo fūhe ryanje.

¹²Ni co gituma ukwiye kuvuga yuko mmuhaye isezerano ryanje ry’amahoro,

¹³rizomubera isezerano ry’ubuherezi bg’intahava, bo n’uruvyaro rwiwe, kuko yagize ifūhe kubganje, jewe Imana yiwe, agatangira Abisirayeli impongano.

¹⁴Wa mugabo w’Umwisirayeli yicanwa na wa Mumidiyanikazi, yitwa Zimuri, yari mwene Salu, yar’ umukuru w’inzu ya ba sekuruza wo mu ba Simeyoni.

¹⁵Uwo Mumidiyanikazi bicanywe yitwa Kozibi, yari mwene Suri, umukuru w’inzu ya ba sekuruza wo mu Bamidiyani.

¹⁶Uhoraho abarira Mose,

¹⁷ati Genda ukubagure Abamidiyani, ubice,

¹⁸kuko bābakubaguye mu buryo bgiyorobetse, hamwe bābōhagiza mu vy’i Peyori no mu vya Kozibi, umwe w’i wabo, wa mukobga w’umukuru wo mu Bamidiyani, umwe yicwa ku musi w’ikīza catēye kubg’ ivyabaye i Peyori.