Read Bibliya Yera 1951 Guharūra 33 Bible Online

Guharūra 33 - Bibliya Yera 1951 bible

Guharūra 33

¹Izi ni zo ndāro z’Abisirayeli, uhereye aho baviriye mu gihugu ca Egiputa, ukw ingabo zabo zari ziri, barōngōwe na Mose na Aroni.

²Mose yandika ingendo zabo, uko bāgenda batāhīra, abibariwe n’Uhoraho: izi ni zo ndāro zabo, nk’ukw ingendo zabo zari ziri.

³Bāvudutse i Ramesesi mu kwezi kwa mbere, ku musi wakwo ugira icumi na gatanu: Pasika iraye iheze, Abisirayeli bavayo bakobagurije Abanyegiputa bose, bagenda babarorēra.

⁴Basiga Abanyegiputa bagihamba imfura zabo zose, Uhoraho yatsinze hagati muri bo; kand’ Uhoraho yari yaciriyekw iteka imana zabo.

⁵Nukw Abisirayeli ni kwo kuvuduka i Ramesesi, basagaza i Sukoti.

⁶Bavudukayo, basagaza muri Etamu, ah’ ubugaragwa butangurira.

⁷Bavuduka muri Etamu, barakebanuka, baja i Pi‐hahiroti, aharābana n’i Bayali‐sefoni, basagaza imbere y’i Migidoli.

⁸Bavuduka imbere y’i Pi‐hahiroti, baca hagati mu kiyaga, bafata ubugaragwa; bagenda urugendo rw’imisi itatu mur’ ubgo bugaragwa bgo muri Etamu, basagaza i Mara.

⁹Bavudukayo, bashika muri Elimu; kandi muri Elimu hār’ amariba cumi n’abiri, n’ibigazi mirongwirindwi, barahasagaza.

¹⁰Bavudukayo, basagaza ku Kiyaga Gitukura.

¹¹Bavudukayo, basagaza mu bugaragwa bg’i Sini.

¹²Bavudukayo, basagaza i Dofuka.

¹³Bavudukayo, basagaza muri Alushi.

¹⁴Bavudukayo, basagaza i Refidimu, abantu basanga hatagira amazi yo kunywa.

¹⁵Bavudukayo, basagaza mu bugaragwa bg’i Sinayi.

¹⁶Bavudukayo, basagaza i Kiburoti‐hatava.

¹⁷Bavudukayo, basagaza i Haseroti.

¹⁸Bavudukayo, basagaza i Ritima.

¹⁹Bavudukayo, basagaza i Rimoni‐Peresi.

²⁰Bavudukayo, basagaza i Libuna.

²¹Bavudukayo, basagaza i Risa.

²²Bavudukayo, basagaza i Kehelata.

²³Bavudukayo, basagaza ku musozi Sheferi.

²⁴Bavudukayo, basagaza i Harada.

²⁵Bavudukayo, basagaza i Makeloti.

²⁶Bavudukayo, basagaza i Tahati.

²⁷Bavudukayo, basagaza i Tera.

²⁸Bavudukayo, basagaza i Mitika.

²⁹Bavudukayo, basagaza i Hashimona.

³⁰Bavudukayo, basagaza i Moseroti.

³¹Bavudukayo, basagaza i Bene‐yakani.

³²Bavudukayo, basagaza i Hori‐hagidigadi.

³³Bavudukayo, basagaza i Yotibata.

³⁴Bavudukayo, basagaza muri Aburona.

³⁵Bavudukayo, basagaza muri Esiyoni‐geberi.

³⁶Bavudukayo, basagaza mu bugaragwa bg’i Zini, ari ho i Kadeshi.

³⁷Bavuduka i Kadeshi, basagaza ku musozi Hori, ku rubibe rw’igihugu ca Edomu.

³⁸Aroni umuherezi adūga uwo musozi Hori, abibariwe n’Uhoraho, agwayo, hāri mu mwaka ugira mirongwine uhēreye ah’ Abisirayeli bāviriye mu gihugu ca Egiputa, mu kwezi kwa gatanu, ku musi wakwo wa mbere.

³⁹Aroni yar’ amaze imyaka ijana na mirongwibiri n’itatu igihe yapfira kur’ uwo musozi Hori.

⁴⁰Umwami w’i Aradi w’Umunyakanani, w’i Negebu ho mu gihugu c’i Kanani, yumva kw Abisirayeli baje.

⁴¹Bavuduka kur’ uwo musozi Hori, basagaza i Salumona.

⁴²Bavudukayo, basagaza i Punoni.

⁴³Bavudukayo, basagaza ahitwa Oboti.

⁴⁴Bavudukayo, basagaza muri Iye‐abarimu ku rubibe rw’i Mowabu.

⁴⁵Bavudukayo, basagaza i Diboni‐gadi.

⁴⁶Bavudukayo, basagaza muri Alumoni‐dibulatayimu.

⁴⁷Bavudukayo, basagaza mu misozi yo muri Abarimu, aharābana n’i Nebo.

⁴⁸Bavudukayo, basagaza mu kiyaya c’i Mowabu kuri Yorodani, aharābana n’i Yeriko.

⁴⁹Mu gusagaza bagendana Yorodani, bāhēreye i Beti‐yeshimoti bakageza ahitwa Abeli‐shitimu, mu kiyaya c’i Mowabu.

⁵⁰Uhoraho abaririra Mose mu kiyaya c’i Mowabu kuri Yorodani, aharābana n’i Yeriko,

⁵¹ati Barira Abisirayeli, uti Ni mwajabuka Yorodani, mugashika mu gihugu c’i Kanani,

⁵²muze mwirukane ben’ ico gihugu bose, mumenagure ibibuye vyabo vyose bikorogoshoyekw ibishushanyo, mumenagure n’ibishushanyo vyabo vyose vyavugutiwe mu nkero, mukomvomvore ibitabo vyabo vyose vyo ku mpinga z’imisozi;

⁵³muheze mwegukire ico gihugu, kukw ari mwebge ngihaye kw ishamvu.

⁵⁴Kandi muzokwegurirwa ico gihugu n’ubupfindo, nk’ukw imiryango yanyu iri; umuryango munini muze muwuhe ishamvu nini, umutoya muze muwuhe ishamvu ntoya; ah’ ubupfindo buzokubitira umuntu amabango az’ abe ari ho haba ahiwe; muze mwegukire ahanyu nk’ukw imiryango ya ba sogokuruza iri.

⁵⁵Na ho ni mutirukana ben’ ico gihugu, abo muzosiga muri bo bazobamerera nk’amahwa abahanda mu maso, nk’ibisaganga mu mbavu zanyu, bababere ivyago mur’ ico gihugu mugiye kubamwo.

⁵⁶Kand’ ivyo nari ngeneye abo, nzobisubiza kuri mwebge.