Read Bibliya Yera 1951 Guharūra 34 Bible Online

Guharūra 34 - Bibliya Yera 1951 bible

Guharūra 34

¹Uhoraho abarira Mose,

²ati Barira Abisirayeli, uti Ni mwashika mu gihugu c’i Kanani, ari co gihugu muzohabga kw ishamvu iyo kiva kikagera,

³urubibe rw’aho muzogeza ku ruhande rw’i bumanuko ruze ruhēre mu bugaragwa bg’i Zini, rugende rubangikanye n’igihugu ca Edomu. Urwo rubibe rwanyu rw’i bumanuko ruze ruhēre kw iherezo ry’ Ikiyaga c’Umunyu ahahera i burasirazuba;

⁴ruheze rukebanuke, ruce hirya y’umudūgo w’i Akurabimu ahahera i bumanuko, rugende rushike i Zini, rugarukire hirya y’i Kadeshi‐baruneya ahahera i bumanuko nyene; ruheze rugende rushike i Hasaradari, rukomeze rushike muri Asimoni:

⁵ruvuye muri Asimoni, rukebanuke, rushike ku mugezi wa Egiputa, rugarukire ku Kiyaga Kinini.

⁶Urubibe rw’i burengerazuba ruze rube ico Kiyaga Kinini nyene: kuri co az’ abe ari ho mugarukira; ico kize kibe urubibe rwanyu ahahera i burengerazuba.

⁷Urubibe rwanyu rw’i burārūko ruze rube uru: muhēreye ku Kiyaga Kinini murucishe ku musozi Hori;

⁸muhēreye ku musozi Hori murucishe ahafata i Hamati, rugarukire i Sedadi;

⁹ruheze rugende rushike i Zifuroni, rugarukire i Hasar‐enani: urwo ruze rube urubibe rwanyu rw’i burārūko.

¹⁰Urubibe rwanyu rw’i burasirazuba, muhēreye i Hasar‐enani nyene muze murucishe i Shefamu;

¹¹ruvudutse i Shefamu, rumanuke, rushike i Ribula, hirya ya Ayini ahahera i burasirazuba; ruheze rumanuke rujane inkōkoro y’ikiyaga Kinereti ihera i burasirazuba;

¹²rumanuke rujane Yorodani, rugarukire ku Kiyaga c’ Umunyu. Ico ni co kizoba igihugu canyu, ukw imbibe zaco zigikīkūje impande zose.

¹³Mose abishikiriza Abisirayeli, at’ Ico ni co gihugu muzohabga kw ishamvu, mukigabanganijwe n’ ubupfindo, ico Uhoraho yageze ko gihabga imiryango cenda n’igihimba;

¹⁴kuk’ umuryango w’ Abareyubeni, nk’ukw amazu ya ba sekuruza ari, n’uw’ Abagadi, nk’ ukw amazu ya ba sekuruza ari, n’igihimba gisigaye c’umuryango w’Abamanase, bamaze guhabga amashamvu yabo.

¹⁵Iyo miryango, ukw ar’ ibiri n’igihimba, bamaze guhabga amashamvu yabo hakuno ya Yorodani aharābana n’i Yeriko, ku ruhande rw’i burasirazuba.

¹⁶Uhoraho abarira Mose,

¹⁷at’ Aya ni yo mazina y’abantu bazobagabanganya igihugu kw amashamvu: Eleyazari umuherezi na Yosuwa mwene Nuni.

¹⁸Muze mukūre umukuru umwe‐umwe mu muryango wose, kugira ngo bagabanganye igihugu kw amashamvu.

¹⁹Aya ni yo mazina y’abo bantu: mu muryango w’Abayuda ni Kalebu mwene Yefune;

²⁰mu muryango w’Abasimeyoni ni Shemuweli mwene Amihudi;

²¹mu muryango w’Ababenyamini ni Elidadi mwene Kisiloni;

²²mu muryango w’Abadani umukuru az’ abe Buki mwene Yogili;

²³mu Bayosefu baze babe aba: mu muryango w’ Abamanase umukuru az’ abe Haniyeli mwene Efodi;

²⁴mu muryango w’Abefurayimu umukuru az’ abe Kemuweli mwene Shifutani;

²⁵mu muryango w’Abazebuloni umukuru az’ abe Elisafani mwene Parunaki;

²⁶mu muryango w’ Abisakari umukuru az’ abe Palutiyeli mwene Azani;

²⁷mu muryango w’Abasheri umukuru az’ abe Ahihudi mwene Shelomi;

²⁸mu muryango w’Abanafutali umukuru az’ abe Pedaheli mwene Amihudi.

²⁹Abo ni bo Uhoraho yageze kugabanganya Abisirayeli amashamvu yabo mu gihugu c’i Kanani.