Read Bibliya Yera 1951 Guharūra 35 Bible Online

Guharūra 35 - Bibliya Yera 1951 bible

Guharūra 35

¹Uhoraho abaririra Mose mu kiyaya c’i Mowabu kuri Yorodani, aharābana n’i Yeriko,

²ati Barira Abisirayeli baze bahe Abalewi ibisagara vyo kubamwo, babisobanuye mu mashamvu yabo beguriwe; uti Mubahe n’amaragiro inyuma y’ivyo bisagara impande zose.

³Ivyo bisagara bize bibe ivyabo vyo kubamwo, amaragiro na yo az’ abe ay’amasho yabo n’ibitungwa vyabo n’ibindi baragiye vyose.

⁴Uti Kand’ amaragiro y’ivyo bisagara muzoha Abalewi az’ ahēre ku ruzitiro rw’ igisagara agende aja hirya, amatambge igihumbi y’ukuboko uciriye mu nkokora, birtyo birtyo impande zose.

⁵Uti Kand’ inyuma y’igisagara i burasirazuba, amakīka muze mugere amatambge ibihumbi bibiri, amakīka y’i bumanuko abe ibihumbi bibiri nyene, ay’ i burengerazuba abe ibihumbi bibiri, n’ay’ i burārūko ibihumbi bibiri nyene; igisagara kibe hagati. Ayo ni yo azoba amaragiro yo ku bisagara vyabo.

⁶Uti Kandi mu bisagara muzoha Abalewi, bitandatu muri vyo bize bibe ivy’ ubuhungiro, ivyo mushizeho kugira ng’uwishe umuntu ahungireyo; uti Kandi mubahe ibindi mirongwine na bibiri bigeretse kur’ ivyo.

⁷Nukw ibisagara muzoha Abalewi vyose na vyose bize bibe mirongwine n’umunani; uti Muze mubitangane n’amaragiro agendanye na vyo.

⁸Ibisagara muzobasobanurira bivuye ku mashamvu y’Abisirayeli, abenshi mubāke vyinshi, abake mubāke bike; umuryango wose, ukw ishamvu yabo ingana, abe ari ko baha Abalewi ku bisagara vyabo.

⁹Uhoraho abarira Mose,

¹⁰ati Barira Abisirayeli, uti Ni mwajabuka Yorodani, mugashika mu gihugu c’i Kanani,

¹¹muze mwirobanurire ibisagara, ngo bize bibe ibisagara vy’ubuhungiro, kugira ng’ umukoracumu yishe umuntu atabigize ibigirankana, ahungireyo.

¹²Ivyo bisagara bizobabera ubuhungiro bgo guhunga umuhōzi, kugira ng’ uwo mukoracumu ntapfe atarahagarara imbere y’ikombe ngw acirwe urubanza.

¹³Uti Mu bisagara muzobaha, bitandatu bize bibabere ibisagara vy’ubuhungiro.

¹⁴Muze mushireh’ ibisagara bitatu hakuno ya Yorodani, bindi bitatu mu gihugu c’i Kanani; bize bibe ibisagara vy’ubuhungiro.

¹⁵Ivyo bisagara bize bibere Abisirayeli ubuhungiro, bo n’umunyamahanga n’inyambukira bari muri bo; kugira ng’ umukoracumu yishe umuntu atabigize ibigirankana, ahungireyo.

¹⁶Ariko ni yaba yamukubise ikintu c’icuma, akagwaho, azoba ar’ umwicanyi: kand’ umwicanyi ntaz’ abure kwicwa.

¹⁷Canke ni yaba yamuhondesheje ibuye afise mu ntoke, ryoshobora kwica umuntu, akagwaho, azoba ar’ umwicanyi: kand’ umwicanyi ntaz’ abure kwicwa.

¹⁸Canke ni yaba yamukubise ikintu c’igiti afise mu ntoke, coshobora kwica umuntu, akagwaho, azoba ar’umwicanyi: kand’ umwicanyi ntaz’ abure kwicwa.

¹⁹Ūhōra uwishwe az’ abe ari we amwica ubgiwe: aho bazohūrira, amwice.

²⁰Canke ni yaba yamucuranguje kubg’ urwanko, cank’ akamutera ikintu yamuryamiye, akagwaho;

²¹cank’ akamukubita igipfunsi kubg’ ubgansi, akagwaho; uyo amwishe ntaz’ abure kwicwa: azoba ar’ umwicanyi. Ūhōra uwishwe az’ amwice aho bazohūrira hose.

²²Mugabo, ni yaba yamucuranguje atavyitumye, atabitewe n’urwanko, canke ni yaba yamuteye ikintu atamuryamiye,

²³canke ni yaba yamuteye ibuye ryoshobora kwica umuntu, atamubona, akagwaho, kand’ atar’ asanzwe ar’ umwansi wiwe, atārondera kumugirira nabi;

²⁴abanyekombe baze bacire urubanza uwishe n’ ūhōra uwishwe, ruhwanye n’ayo mabgirizwa;

²⁵bakize uwo mukoracumu, bamukūre mu maboko y’ūmuhōra uwo yishe, bamusubize mu gisagara c’ubuhungiro aho yari yahungiye; az’ abe ari ho aba gushitsa ah’ umuherezi mukuru, yasutswekw amavuta yejejwe yo kumurobanura, azopfira.

²⁶Arik’ uwo mukoracumu ni yahīrahīra akarengana urugabano rw’igisagara abamwo c’ubuhungiro, aho yahungiye,

²⁷ūhōra uwishwe akamusanga inyuma y’urugabano rw’ico gisagara abamwo c’ubuhungiro, akamwica, amaraso y’uwo mukoracumu ntazomusubirako;

²⁸kuko yar’ akwiye kuguma mur’ ico gisagara yabamwo c’ubuhungiro gushitsa ah’umuherezi mukuru azopfira. Arik’ umuherezi mukuru amaze gupfa, uwo mukoracumu azobona gusubira i we mw ishamvu yiwe.

²⁹Ivyo bize bibabere ibgirizwa muzohora mukurikira mu guca imanza, ukw ibihe vy’urunganwe rwanyu bizogenda bikurikirana aho muba hose.

³⁰Ni hagira uwica uwundi, uwo mwicanyi aze yicishwe n’ivyabona bimwagirije; arikw icabona kimwe ntikize cagirize umuntu ngo yicwe.

³¹Kandi ntimuze mwemere ivyo gucungura umwicanyi yar’ akwiye gupfa: aze yicwe nta kabuza.

³²Kandi ntimuze mwemere ivyo gucungura uwahungiye mu gisagara c’ubuhungiro, ngw asubire kwībēra i wabo mu gihugu, umuherezi atarapfa.

³³Nuko ntimuze muhumanye igihugu murimwo; kukw amaraso ari yo ahumanya igihugu; kandi nta mpongano yaco yo kugihongera kubg’ ayo maraso yakiviriyemwo, atar’ amaraso y’uwayavishije.

³⁴Ntimuze muhumanye igihugu muzobamwo, ico nzoba ndimwo hagati: kuko jewe Uhoraho mba hagati mu Bisirayeli.