Read Bibliya Yera 1951 Guharūra 36 Bible Online

Guharūra 36 - Bibliya Yera 1951 bible

Guharūra 36

¹Abakuru b’amazu ya ba sekuruza bo mu muryango wa Gileyadi mwene Makiri, Makiri mwene Manase, umwe mu miryango ya Yosefu, bīgira hafi, bavugira imbere ya Mose n’abatware, ari bo bakuru b’amazu ya ba sekuruza y’Abisirayeli,

²bati Mugenzi, Uhoraho yakubariye kugabuza igihugu ubupfindo, ng’ ugihe Abisirayeli kw amashamvu; kandi mugenzi, Uhoraho yakubariye guha abakobga ba Selofehadi mwene wacu ishamvu yiwe.

³None ni barongorwa n’umuntu wese wo mu yindi miryango y’ Abisirayeli, ishamvu yabo izokūrwa kw ishamvu ya ba sogokuruza, ishirwe kw ishamvu y’ umuryango bazojamwo: nukw izoba ikūwe ku mugabane twahawe kw ishamvu.

⁴Maz’ umwaka wa yubile y’Abisirayeli ni washika, ishamvu yabo izoshirwa kw ishamvu y’umuryango bazoba baragiyemwo; nukw ishamvu yabo izoba ikūwe kw ishamvu y’umuryango wa ba sogokuruza.

⁵Nuko Mose ashikiriza Abisirayeli ivyo Uhoraho amubariye, at’ Ab’ umuryango w’Abayosefu, ivyo bavuze n’ivy’ ukuri.

⁶Iki ni co cagezwe Uhoraho ashinze ku vy’abakobga ba Selofehadi, ati Bararongorwa n’abo bagomba: ariko bo mu nzu yo mu muryango wa se.

⁷Ntihaze hagire ishamvu iva mu muryango ngw ije mu wundi; arik’ umuntu wese wo mu Bisirayeli aze yame yīzīziye ishamvu yo mu muryango wa ba sekuruza.

⁸Umukobga wese azogira ishamvu mu muryango wose w’Abisirayeli, az’ arongorwe n’uwo mu nzu yo mu muryango wa se, kugira ng’umuntu wese mu Bisirayeli agire ishamvu ya ba sekuruza.

⁹Ntihaze hagire ishamvu iva mu muryango ngw ije mu wundi; kukw imiryango yose y’Abisirayeli izoba ikwiye kwīzīzira amashamvu yayo ubgayo.

¹⁰Nukw abo bakobga ba Selofehadi babigenza nk’uk’ Uhoraho yabariye Mose.

¹¹Makila na Tirusa na Hogila na Miluka na Nowa, abo bene Selofehadi, barongorwa na basazabo.

¹²Barongorwa n’abo mu mazu y’aba Manase mwene Yosefu, bituma ishamvu yabo iguma mu nzu ya se, mu muryango wabo.

¹³Ivyo ni vyo vyagezwe n’amabgirizwa Mose yashikirije Abisirayeli atumwe n’Uhoraho, bari mu kiyaya c’i Mowabu kuri Yorodani, aharābana n’i Yeriko.