Read Bibliya Yera 1951 Nahumu 2 Bible Online

Nahumu 2 - Bibliya Yera 1951 bible

Nahumu 2

¹Ūjonjanga arakudūgiye: mera magabo ku ruzitiro rw’amabuye, shibama mu nzira, kenyera zigume, iyungunganye uk’ ushoboye kwose!

²Kuk’ Uhoraho agarukanye icubahiro c’aba Yakobo, nk’icubahiro c’Abisirayeli; kukw abasahuzi babasahuye, bagahanyagura amashami y’imizabibu yabo.

³Inkinzo z’abahizi biwe ziratukura, intōre ziwe zambaye iz’ agahama: ivyuma vy’imikogote yiwe y’intambara birakayangana ku musi wo kwitegura kwiwe, amacumu arikw aranyugutwa.

⁴Imikogote y’intambara igenda akābushūngwe mu mayira, igenda iranyuranwa mu nzira z’ibihamo; uyibonye wogira ngo n’imuri, yidunya nk’umuravyo.

⁵Ahamagara abahizi biwe, ariko bagenda baratsitara; bihutira kuja ku ruzitiro rwaho rw’amabuye, kandi bakitegura kwirwanira.

⁶Imigomero y’inzūzi iragomorowe, n’ingoro y’umwami irasenyeranye.

⁷Umwamikazi yambitswe ubusa, ajanywe ar’ inyagano; incoreke ziwe zicura intimba nk’ inuma, zikagenda zirīshishitira.

⁸Ninewe hameze nk’ikidengeri c’amazi gisenzwe: barasemerera, bati Hagarara, hagarara! ariko ntihagira ūhindukira.

⁹Ni musahure amafeza, musahure n’amazahabu, kukw itunga ririho ritimirije gushira, bo n’isinzi ry’ ibintu vyose vy’imbombovu bihimbaye.

¹⁰Hasigaye ubusa, barahogeje, bahasize ar’ umusaka; umutima wahavuyemwo, amavi arakomangana, ukwihebura kuhaciye umugongo, mu maso ha bose harajonjogoye.

¹¹Urwobo rw’intambge rwabaye iki, n’irīro ry’imigunza, ah’ intambge n’ingore yayo n’ivyana vyazo vyatahukira, ata co vyicura?

¹²Ereg’ intambge yahora itabagura ivyo guhimvya ivyana vyayo, ikanigira ingore zayo, ikuzuza amasenga yayo ivyo yishe, n’ivyobo vyayo ivyo yasahuye.

¹³Ehe nzohigūra nawe, ni k’Uhoraho Nyen’ ingabo agize, kandi nzoturira imikogote yawe y’intambara, itūmūke, kand’ inkota izoririka imigunza yawe y’intambge; nzokūrah’ ugusahura kwawe kw isi, kand’ ijwi ry’ intumwa zawe ntirizokwongera kwumvikana ukundi.