Read Bibliya Yera 1951 Nahumu 3 Bible Online

Nahumu 3 - Bibliya Yera 1951 bible

Nahumu 3

¹Igisagara kivisha amaraso kirakabona ibara! Cuzuye ibinyoma n’isahu; nta ho gisība kunyaga.

²Humvikana inyobozo, n’uguhinda kw’amakurudumu abomborana, n’imirindi y’amafarasi agenda yiginagura, n’uguhinda kw’imikogote y’intambara isimbagurika;

³uwisuka mu rugamba ari kw ifarasi, inkota ziravya indimi, amacumu aca ibibatsi, abishwe n’indiri, har’ ibirundo vy’imirambararo, imivyimba ntiyoharūrika, ingabo zitsitara ku mivyimba yabo!

⁴Ivyo vyose vyatewe n’ubusambanyi burenze urugero bga maraya ateye igomwe, umurozikazi w’umuhanga, aresha amahanga kubg’ ubusambanyi bgiwe, n’imiryango kubg’ uburozi bgiwe.

⁵Ehe nzohigūra nawe, ni k’ Uhoraho Nyen’ ingabo agize; nzogukūrakw impuzu, mfate ku musozo ndenze ku mutwe wawe, nereke amahanga ubgambure bgawe, n’ibihugu ndavyereke ibiteye isoni vyawe,

⁶ngutere ivyatsi, nguhindure agashinyo, nkugire akabarore.

⁷Nukw abazokurāba bose bazoguhunga, bati Ninewe harageseye! Ni nde azoharirira? Nokūra hehe abo kukwirura?

⁸Mbega har’ ico urusha No‐Amona, hāba hagati y’inzūzi, amazi akahubakira nk’urugo, kand’ ikiyaga kikahahindukira uruzitiro?

⁹Isinzi ry’Abanyetiyopiya n’ Abanyegiputa ni bo bār’ inkomezi zaho; Abaputi n’Abalubimu bār’ abatabazi baho.

¹⁰Ariko hāranyazwe, hajanwa ar’ inyagano; n’ibibondo vyaho vyāhondaguriwe mu mayirabiri yose: n’abanyacubahiro baho bābagabanganishije ubupfindo, n’abahambaye baho bābabohesheje iminyororo.

¹¹Nawe n’uko, uzoborerwa, uje kwinyegeza; kand’ uzokwironderera ubuhungiro kubg’ abansi.

¹²Amaboma yawe yose azoba nk’ibiti vy’imisukoni, birikw insukoni z’isega: iyo binyiganyigijwe zigahungurukira mu kanwa k’ umuryi.

¹³Eh’ abantu bawe bari muri wewe bameze bga bagore; amarembo y’igihugu cawe yugururiwe abansi bawe: umuriro watōngōye imyugariro yawe.

¹⁴Enda ni wivomere amazi azomara igihe uzoba wugarijwe; amaboma yawe n’uyakomeze; ja mw ibumba, ukāte urwondo; fata iforoma ry’amatafari.

¹⁵Aho ni houmuriro uzogutōngōrera; uzotikizwa n’inkota, ikurye nk’ukw intoteza zirya. Enda ni wigwize nk’intoteza, n’ugwire nk’inzige!

¹⁶Abadandaza bawe wabagwijije kurusha inyenyeri zo kw ijuru; bameze nk’inzige zizingurura amababa yazo, zikigurukira!

¹⁷Abagaba bawe bameze nk’inzige, n’ abagabisha bawe bameze nk’intoteza zāraraye ku mirombero mu kabeho k’umugoroba, maz’ izuba ryarasa zikigurukira, kandi nta wuba akimenya aho zaroye.

¹⁸Ewe kuntu abungere bawe bisinziriye, ga mwami wa Ashuri; abanyacubahiro bawe bakiruhukira! Abantu bawe bāsābagiriye ku misozi, kandi nta wo kubegeranya.

¹⁹Uruguma rwawe nta kōyōkwe rugira; igikomere cawe ntikizokira: abumvise inkuru zawe bose bakubita amashi ku yandi; mbega ni nde utāhora ugirira nabi?