Read Bibliya Yera 1951 Habakuki 2 Bible Online

Habakuki 2 - Bibliya Yera 1951 bible

Habakuki 2

¹Nzohagarara nshibamye, nje ku munara wo gushibamako, nkenguze ndābe ico aribumbarire, n’ico ndibumwishure, ku vy’ amaganya yanje.

²Maz’ Uhoraho aranyishura, at’ Andika ivyo weretswe, uvyandike ku bisate mu nyuguti zisomeka, kugira ng’ ūbisoma anyarutse.

³Kukw ivyerekanywe bifise igihe vyashingiwe, kandi vyihutira kugishikako, ntibizobesha; naho vyotebagana, ubirorēre, kuko bitazobura kuza, ntibizoteba.

⁴Rāba, umutima wiwe urīkakishije, ntutunganye: arik’ umugororotsi azobeshwaho n’ukwizera kwiwe.

⁵Kand’ ikindi, abo bantu n’imborerwa, n’abantu bihayagiza, bataragama i wabo; baromoye nk’i kuzimu, bameze nk’urupfu, ntibahāga; ariko biyegeranirizakw amahanga yose, bakikumakumirakw amoko yose.

⁶Mbeg’ abo bose ntibazobīvuga, bakabacakw akagani bakīkiriza, bati Bazobona ibara, abakuma ibitar’ ivyabo, bagatako bakīremēka amasahu! Mbega bazogeza ryari?

⁷Mbeg’ abazobarya ntibazobūbīra giturumbuka, n’abazobajegenyura ntibazokwikangura, namwe mugacika inyagano zabo?

⁸Ko mwanyaze amahanga menshi, namwe amasigarira yose y’amoko azobanyaga, abahōye amaraso y’ abantu, n’umuryano igihugu cabonye, bo n’ibisagara n’ababibamwo bose.

⁹Azobona ibara, ūronderera inzu yiwe inyungu mbi, kugira ngo yiyarikire icāri ciwe hejuru iyo bigwa, ngw abone gukira ukuboko kw’umunyakibi!

¹⁰Inzu yawe wayihamagariye gutētērwa, kuko wagesheje amoko menshi, ugacumuza ubugingo bgawe.

¹¹Kukw ibuye ryo mu yubatse inzu rizosemerera, kand’ umutambikwa wo mu vyayimanitse uzoryishura.

¹²Azobona ibara, uwubakisha igisagara amaraso yavishije, akaninaharisha igisagara ibigabitanyo!

¹³Mbega ntibiva k’Uhoraho Nyen’ ingabo kw amoko atamishwa n’ibizoturirwa n’umuriro, amahanga akiruhiriza ubusa?

¹⁴Kuko kumenya icubahiro c’ Uhoraho kuzoba kwuzuye mw isi, nk’ukw amazi abugereye mu kiyaga.

¹⁵Azobona ibara, ūha mugenzi we ibinyobga, na wewe umwongerakw ibituriranije, ukamuboreza, kugira ngo wirābire ubgambure bgiwe!

¹⁶Utumbaraye ibitētērwa mu gishingo c’icubahiro: enda nywa nawe, wisige ubusa! Igikombe kiri mu kuboko kw’i buryo kw’Uhoraho kizoruha kigushikeko nawe, kand’ ivy’ isoni biteye ishishi bizoba ku cubahiro cawe.

¹⁷Kuk’ umuryano wabaye i Lebanoni uzokwubikizako, n’ukugesera kw’ibikōko kuzogutera ubgoba, uhōwe amaraso y’ abantu, n’umuryano igihugu cabonye, bo n’ibisagara n’ababibamwo bose.

¹⁸Igishushanyo kibājwe kimaze iki, vyotuma umubāji akibāza, cank’ igishushanyo kivugutiwe mu nkero kiragura ibinyoma, vyotuma uwakivugutiye acizigira, akironkera ibigirwamana vy’ibiragi?

¹⁹Azobona ibara, ūbgira igiti, ati Ni wikangure! akabarira n’ ibuye ry’ikiragi, ati Haguruka! Mbeg’ ivyo vyoragura? Erega vyayagirijwekw izahabu n’ifeza, arikw imbere nta mpwemu bigira na mba.

²⁰Yamar’ Uhoraho we, ari mu rusengero rwiwe rwera: isi yose n’ihwēkērere imbere yiwe.