Read Bibliya Yera 1951 Habakuki 3 Bible Online

Habakuki 3 - Bibliya Yera 1951 bible

Habakuki 3

¹Isengesho ry’uwavugishwa n’ Imana Habakuki, ryaririmbishwa mw ijwi ryitwa Shigiyonoti.

²Uhoraho, numvise inkuru zawe, nabonye igikorwa cawe: Ewe Uhoraho, hēmbūra ico gikorwa cawe hagati mur’ iyi myaka, Hagati mur’ iyi myaka ukimenyekanishe; Mu burake wame wibuka kugira akagongwe.

³Imana yaje ivuye i Temani, Uwera yaje ku musozi Parani. Sela . Ubgiza bgiwe bgakwiye ijuru, Kand’ isi yuzuye ishimwe ryiwe.

⁴Gukayangana kwiwe kwari nk’umuco, Ibishwārara vy’umuco vyava mu kuboko kwiwe, Aho ni ho yatwikirira ububasha bgiwe.

⁵Ikīza camugendera imbere, Na Kizimire akamuja inyuma.

⁶Arahagarara, agera ubunini bg’isi; Arāba igitsure, amahanga agahinda agashitsi; Imisozi y’intahava irasanzara, Uturambi tw’inyame turanyika; Ajana inzira ziwe za kera.

⁷Nabonye amahema y’i Kushani ari n’umubabaro, N’ibihuzu vy’amahema yo mu gihugu c’i Midiyani bihinda agashitsi.

⁸Mbeg’ Uhoraho, inzūzi ni zo warakiye? Cank’ uburake bgawe bgari ku nzūzi? Ikiyaga ni co wagiriye uburake mbega, Vyotumye ugendera ku mafarasi yawe, No mu mikogote yawe y’intsinzi?

⁹Watekuruye umuheto wawe, Ushira imyampi mu ruge. Sela . Wasatuje isi inzūzi.

¹⁰Imisozi yarakubonye, irasambagirika; Amazi arahondogana: I bgina humvikanisha ijwi ryaho, Hatarika amaboko yaho.

¹¹Izuba n’ukwezi vyigumiye i wavyo, Kubg’ imyampi yawe yagiye ibishwārara, N’ugukayangana kw’icumu ryawe rica ibibatsi.

¹²Wogoze igihugu ushangashiwe, Wasiribanze amahanga uri n’uburake.

¹³Wasidukanywe no kuzanira abantu bawe agakiza, No kuzanira agakiza uwo warobanuje amavuta. Wasābije agatwe k’inzu y’ umunyakibi, Urayisangangura ushitsa no mu rukerēro. Sela .

¹⁴Wasogotesheje umugabisha w’ ingabo ziwe ibimīto vyawe; Baje kudushwiragiza bameze nk’agashururu; Umengo vyarabahimbara kuyongobeza umugorwa mu mpisho.

¹⁵Ikiyaga wagisiribangishije amafarasi yawe, Bo n’umukuba w’amazi menshi.

¹⁶Ndavyumvise, amara yanje aradobangana, Iminwa yanje iradegezwa kubg’ iryo iwi; Ikimungu cinjira mu magufa yanje, mpindira agashitsi aho ndi; Nkwiye guhangana n’umusi w’amagorwa nduhutse, Igihe abansi bazotēza ubgoko bgacu ibitero.

¹⁷Nah’ umusukoni utoshurika, Canke n’imizabibu ngw igire ico yama, N’icimburo c’imyelayo kikabura, N’imirima ntiyere indya na mba, N’umukuku ugahenebera mu ruhongore, Ntihabe hakigira n’inka mu rugo:

¹⁸Na ho nyene jewe nzonezererwa Uhoraho, Mpimbarwe n’Imana y’agakiza kanje.

¹⁹Uhoraho, Umwami, ni we nkomezi zanje; Ni we ahindura ibirenge vyanje nk’ivy’ impongokazi, Kand’ azompa gutambagira ku dutwe tw’imisozi yanje. Vyahawe umukuru w’abaririmvyi: bavugira inanga zanje.