Read Bibliya Yera 1951 Hagayi 1 Bible Online

Hagayi 1 - Bibliya Yera 1951 bible

Hagayi 1

¹Mu mwaka ugira kabiri umwami Dariyo ari ku ngoma, mu kwezi kwa gatandatu, ku musi wakwo wa mbere, ijambo ry’Uhoraho ryavugiye muri Hagayi uwavugishwa na we, ritumwe kuri Zerubabeli icēgēra c’uwo mwami i Buyuda, mwene Sheyalitiyeli, no kuri Yosuwa umuherezi mukuru, mwene Yehozadaki,

²rit’ Uku ni k’Uhoraho Nyen’ ingabo agize, at’ Iri hanga rivuga ngw Igihe ntikiragera, igihe co kwongera kwubaka ingoro y’Uhoraho.

³Maz’ ijambo ry’Uhoraho rivugira muri Hagayi uwavugishwa na we,

⁴riti Mbeg’ iki n’igihe kibereye c’uko mwebge mwokwibera mu mazu yanyu ajererenze amagarwe, na yo iyi ngoro igihomvaguritse?

⁵None rero, uku ni k’Uhoraho Nyen’ ingabo agize, ati Ni mwitegereze uko mumeze!

⁶Mubiba vyinshi, mukimbura bike; kurya murarya, ariko ntimushira inzara; kunywa muranywa, ariko ntimushira inyota; kwambara murambara, ariko ntimushira imbeho; kand’ ūca amahera ayacira mu mupfuko utobotse.

⁷Uku ni k’Uhoraho Nyen’ ingabo agize, ati Ni mwitegereze uko mumeze!

⁸Enda ni mudūge mu mugamba muzane ibiti, mwubake iyo ngoro; nanje nzoyinezererwa, bimpeshe icubahiro, ni k’Uhoraho agize.

⁹Mwaziga vyinshi, mugize murtya musanga ni bike; kandi n’iyo mubizanye i muhira ndabitūvya. Biva ku ki? ni k’ Uhoraho Nyen’ ingabo abajije. Biva ku ngoro yanje irekewe ngaho igihomvaguritse, namwe mweho umuntu wese agakobereza inzu yiwe ubgiwe.

¹⁰Ni co gituma ata n’akame ijuru rikibarekurira, n’isi ikabima ivyimburo vyayo.

¹¹Kandi nahamagaye uruzuba ngo rwice isi n’imisozi, rukūreho n’impeke na vino, n’amavuta ya elayo, rwice n’ibimera mu ndimiro, n’abantu, n’amasho, n’ibikorwa vyose bikoreshwa amaboko.

¹²Maze Zerubabeli mwene Sheyalitiyeli, na Yosuwa umuherezi mukuru mwene Yehozadaki, hamwe n’amasigarira yose yo mur’ iryo hanga, bumvira ijwi ry’ Uhoraho Imana yabo, n’amajambo ya Hagayi uwo yavugisha, nk’uk’ Uhoraho Imana yabo yamutumye; kand’ abantu baterwa n’ubgoba imbere y’Uhoraho.

¹³Maze Hagayi, intumwa y’Uhoraho, abgira abantu ubutumwa batumweko n’Uhoraho, at’ Uhoraho agize ngw Ari kumwe namwe.

¹⁴Maz’ Uhoraho akangura umutima wa Zerubabeli yaganza i Buyuda, mwene Sheyalitiyeli, n’umutima wa Yosuwa umuherezi mukuru, mwene Yehozadaki, n’imitima y’amasigarira yose y’iryo hanga; baraza batangura gukora ku ngoro y’Uhoraho Nyen’ ingabo Imana yabo,

¹⁵hāri ku musi wa mirongwibiri na kane w’ukwezi kwa gatandatu, mu mwaka ugira kabiri umwami Dariyo ari ku ngoma.